The Definitive Guide to Living in the Capital , Cairo , Egypt

كافيهات
Delight

ديلايت: حلويات ساحرة وراقية في المعادي

  • 2 Port Said Street
  • Bakeries & Patisseries
  • 9:00 am to 12:00 am -
تم التقييم بواسطة
Nagla Ashraf
قيم
قيم الآن
ديلايت: حلويات ساحرة وراقية في المعادي

لازم نعترف أننا من عشاق الحلويات الغربية، وبـ نحب تفاصيلها الجميلة، سواء كيك أو تارت، وده كان من الأسباب الرئيسية اللي وقعتنا في غرام ديلايت – Delight محل الحلويات الشهير.

ديلايت بدأ من كام سنة قريبة يشتهر وفتح بالفعل أكثر من فرع، وأكثر حاجة بـ تميزه تارت Banjia Crackers أو تارت الموز لأنها فعلًا أجمل حاجة ممكن تأكلها في حياتك، عبارة عن تارت جواها موز مع الكريمة وصوص الكراميل، حاجة كده تخطفك لعالم ثاني، بس اللي ما كناش نعرف أنهم متميزين فيه كمان الميني تارت والميني كيك والبافلوفا.

ديلايت بـ يقدم أنواع كثيرة للتارت زي تارت التوت وتارت الفاكهة وتارت المارس أو التوفي أو الشوكولاتة، ولأننا كنا حابين نجرب أكثر من حاجة، جربنا أكثر من ميني تارت وكيك، علشان نبقى ذوقنا أكبر قدر ممكن وننقل لكم التجربة بالضبط. وننصحكم بشدة لو أنتم بـ تشتغلوا وبـ تروحوا متأخر لازم تحجزوا اللي عاوزين تطلبوه من الصبح، علشان الحاجة بـ تخلص بسرعة.

طلبنا ميني تارت زبادي توت Yogurt Blueberry بـ 15 جنيه، وميني تارت توفي شوكولاتة بـ 13 جنيه، وميني Raspberry Cake بـ 28 جنيه، وميني Pavlova Mix Fruits بـ 18 جنيه. طيب إحنا هـ نبدأ بأكثر حاجة عجبتنا، وأقل ما يقال عليها أن جمالها فاتن وفتاك من حلاوته، يعني أكيد هـ تسحرك بجمالها، ألا وهي ميني كيك Raspberry، مبدأيًا هي كانت طازة جدًا، وطرية جدًا جدًا، الكيك من كثر ما هو هش وخفيف تحس أنك بـ تأكل كريمة بصوص التوت بس وعلى طرف لسانك تبدأ تحس بطعم عجينة هشة وخفيفة، ده غير أن عليها طبقة مارينج من فوق بـ تذوب في فمك، إحنا مع كل شوكة ما كناش بـ نقدر نوقف للشوكة اللي بعدها، وبعد ما خلصناها أكيد كنا عاوزين منها ثاني.

أما الاختراع الثاني هو الـ Mix Pavlova وده عبارة عن كب على شكل كمثرى كبيرة شوية من بره مارينج جاف ومن جوه بقى إيه؟ طبقة من الكيك تليها طبقة من كمبوت الفاكهة المتنوعة ما بين أناناس ومانجو وكيوي وموز وآخر طبقة كريمة غنية ومنعشة، يعني في الشوكة الواحدة تجمع ما بين الكريمة والفاكهة والكيك والمارينج، وبووووووم تستمتع بالطعم في فمك، المشكلة الوحيدة أنك لازم تأكلها على طول وإلا صوص الفاكهة هـ يخلي المارينج يبوش ويبقى طري، خاصة أن طبقة المارينج اللي على الجنب خفيفة على عكس القاع اللي متماسك جدًا لأن فوقه طبقة من الكيك الشهي.

كمان ميني تارت التوفي كانت حلوة قوي، وغنية بالكراميل، يعنى لو بـ تحبوا الحاجات المسكرة زيادة عن اللزوم، الميني تارت دي مثالية بالنسبة لكم، أما ميني تارت الزبادي بالتوت، في الأول ما حسيناش بقوة النكهات زي الباقي، خاصة أن العجينة التارت كانت ناشفة جدًا، لكن لما سيبناها شوية في الثلاجة العجينة بقيت أطرى واستمتعنا بكل قطعة منها لأننا بـ نحب العجينة تكون طرية شوية مش ناشفة.

ديلايت من الأماكن القليلة اللي تشتري منها حلويات وأنت مطمن أنك هـ تأكل حاجة ممتعة وجديدة، خاصة كمان لو رايح تزور حد، ديلايت عمره ما هـ يخذلك أبدًا أمام ضيوفك.

نصيحة 360

لو ما جربتش الـ Banjia Crackers فاتك كثير قوي.

أحسن حاجة

ميني كيك الـ Raspberry.

أسوأ حاجة

أن المنتجات بـ تخلص بسرعة جدًا، بس ممكن تحجز بالتليفون من قبلها.

أكتب تقييم

أضف تعليقاً

يجب أنت تكون مسجل الدخول لتضيف تعليقاً.

مقترح