The Definitive Guide to Living in the Capital , Cairo , Egypt

ذا تيبسي تي بوت – The Tipsy Tea Pot

ذا تيبسي تي بوت: كافيه فريد من نوعه في المعادي

تم التقييم بواسطة
Gaser El Safty
قيم
قيم الآن
ذا تيبسي تي بوت: كافيه فريد من نوعه في المعادي

المعادي هي أول منطقة تفكر فيها لو نفسك في إفطار هادئ، “ذا تيبسي تي بوت – The Tipsy Tea Pot” الموجود في منطقة سرايات المعادي الهادئة بـ يقدم لك الهدوء والجو الدافئ اللي بـ تدوّر عليه.

زي كافيهات كثيرة في المعادي، المكان أخذ فيلا قديمة وجددها، وبالتالي مساحة كبيرة زي دي بـ توفر لك اختيارات متنوعة للجلوس حسب المزاج… يعني كنب مريح، وركن لدود الكتب اللي مليء بأشكال وأنواع مختلفة من الكتب، ولمحبي البلياردو نصيب، لأن فيه مكان مجهز بترابيزة بلياردو علشان تلعب وتتسلى.

المكان بديكوراته البسيطة والأنيقة في الوقت نفسه صعبت علينا وصفه، تقدر تقول أنه حاجة ما بين جاليري فني وبيت صاحبك الأنتيم. الحوائط بـ تتكلم فلسفة بمجموعة من الأقوال الشهيرة العميقة واللي بـ تتماشى مع الأجواء الفنية اللي لا هي أناقة بالمسطرة ولا هي مرتبكة غير مرتبة… تقدر تقول ديكور عفوي بحساب… كلام كبير، فهمت حاجة؟

بـ يقدموا وجبة الإفطار من الساعة 9 صباحًا للساعة 1 مساءً، وجبات الإفطار متنوعة منها البان كيك باللحم المجفف، وساندويتشات جبن البري ومربى التوت البري.

منيو وجبة الغداء بـ تضم مجموعة من الساندويتشات، والباستا، ده غير ستيك اللحم والسلامون. منيو المشروبات مليء بالعصائر الفريش والسموزي، وبالنسبة لنا منيو الحلو كان مثير للاهتمام بمجموعة ظريفة منها البراونيز، وكيك الموز.

بما أننا وصلنا بعد ميعاد الإفطار، قررنا نجرب حلقات الكليماري بالليمون والفلفل الحار (30 جنيه) كمقبلات، بعدها برجر تيبسي بالجبنة واللحم المقدد (60 جنيه) كوجبة رئيسية.

الكليماري كان نائم على بساط سندسي من الجرجير (تشبيه لطيف مش كده؟)، ومعاه صوص التارتار وشرائح ليمون، الطبق ما كانش فيه شيء مميز، أما البرجر كان معاه بطاطس محمرة على الطريقة البيتي، ومجموعة من الخضروات المشوية، بالإضافة لسلاطة الكول سلو.

المكان بـ يدّعي أنه بـ يقدم “أحسن برجر فيكي يا قاهرة”، بس للأسف الإدعاء ده مش صحيح لأن القاهرة بـ تعج بالأماكن المتخصصة في البرجر واللي بـ تقدمه بشكل أفضل. بالرغم أن الطبق وصل بعد 20 دقيقة بالتمام والكمال، إلا أن قطعة اللحمة ما كانتش بالجودة من حيث النوعية، ده غير أنها مش طازة بالمرة. الساندويتش ككل مش متوائم مع بعضه بالرغم من بساطة مكوناته، لأنه ببساطة مش اختراع. علشان ننصفهم، يحسب لهم أن تسوية قطعة اللحم كانت ممتازة، بالإضافة لاستعمالهم اللحم المجفف الأصلي، ولكن للأسف ده كمان تسويته ما كانتش بالدرجة المرغوبة.

بعد الكلام ده كله، قلنا نحبس بشاي الأعشاب والفواكة (15 جنيه)، صُدمنا لأن المكان المفروض متخصص في المشروبات الساخنة، فقدم لنا شاي أحمد “Ahmed Tea” اللي ممكن نشتريه من البقال!! ده حتى اسم المحل فيه كلمة إبريق.

كيك الموز (30 جنيه) كان رائع وشهي، بالرغم من أنه كان إسفنجي زيادة عن اللزوم، إلا أن قطع الكيك مليئة بقطع من الموز اللذيذة… حلو ممتاز تكافئ به نفسك بعد يوم طويل.

الخبر السعيد لكل محبي ومقتني الحيوانات الأليفة، المكان بـ يرحب بك وبأصدقائك الأوفياء من غير بني البشر، وده أكثر شيء مميز للمكان بالنسبة لسكان المعادي لأن معظمهم بـ يقتني حيوانات أليفة.

نصيحة 360

جرب يوم الـ BBQ المميز كل يوم سبت.

أحسن حاجة

الجو العام للمكان خرافي.

أسوأ حاجة

الأسعار غالية بالنسبة لبساطة المكان.

Map Data
Map data ©2016
Map DataMap data ©2016
Map data ©2016

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح