The Definitive Guide to Living in the Capital , Cairo , Egypt

سنين وسنين فاتوا، وبرضه موضة الكافيهات وقعدتها فى القاهرة عمرها ما هـ تنقرض، ومن ضمن موضات الأكل دلوقتي الكب كيك. بإضافة جديدة عادية جدًا لمحلات الحلويات الموجودة فى أرض الجولف هليوبوليس، “كب كيكر بيكر – CupCaker Baker” انضم لطوفان محلات الكب كيك.

بكشك فوشيا زجاجى داخل سويت كورنر، المكان يعتبر كبير وواسع، بس مش مريح إلى حد ما ومشتت. كل حوائط المكان يزينها ألوانهم من الوردى الفاتح والأصفر بدرجات صارخة قوية، وده أكيد بـ يجذب الشباب الصغير.

مع تخصصهم فى الكب كيكس (10 جنيه: 15 جنيه/ للواحدة)، كب كيكر بيكر كمان عنده قهوة ونكهات ميلك شيك متنوعة (15 جنيه)، أما الكيكات المصنعة حسب الطلب والطلبات الكبيرة ممكن تتحضر خلال يومين. رغم أنهم عارضين مجموعة مشوقة متنوعة أونلاين، الكب كيكس المتوفرة وقت زيارتنا كان أغلبها عادى ومعروف، طلبنا علبة فيها ست قطع كب كيك: فراولة، وريد فيلفيت، ونوتيلا، وفريرو روشيه، وقرفة، ونوتيلا موز وأبيليشوس.

طلبنا كمان ميلك شيك مانجو، اللى رغم أنه كان معمول بآيس كريم مانجو، كان طعمه مش ولابد؛ قوامه ممتاز وغنى باللبن، بس ينقصه طعم المانجو المميز.

الكب كيكس كانت برضه نوعًا ما محبطه؛ صحيح كل الطبقات اللى عليهم كانت كميتهم كبيرة ومنفوشة، الكب كيك نفسها بعيدة جدًا عن منافسة تجاربنا السابقة. كب كيك الفراولة والموز كانوا من ناحية الطعم –والشكل كمان- اصطناعيين بشكل بشع. الكمية الكبيرة المدهونة والمحشية من النوتيلا فى كل من الفريرو روشيه والموز بـ ننصح بهم لعشاق الطعم المسكر بزيادة، وطعمهم سهل جدًا يجيب لك مرض السكر مستريح. رغم العجينة الناشفة شوية، الريد فيلفيت كانت أجمد طعم بطبقتها السكرية اللذيذة الشبيهة بالزبدة. أقل حاجة من وجهة نظرنا كانت القرفة، اللى رغم طعم القرفة اللاذع وطبقة الكريمة الهايشة، القوام الأسفنجى للكيكة كان ناشف وفيه حبيبات بشكل غريب. أخيرًا، الأبيليشوس كان خليط مثير من الفانيليا، وقطع شوكولاتة مُرة، طبقة تفاح وصوص كراميل.

مع نكهات صناعية زيادة عن الطبيعى، للأسف كب كيكر بيكر بعيد عن المنافسة وسط عدد مهول من محلات الكب كيك المعروفة فى القاهرة.