The Definitive Guide to Living in the Capital , Cairo , Egypt

لا جورمانديز – La Gourmandise

لا جورمانديز: كافيه مغرى فى الشيخ زايد

تم التقييم بواسطة
Yasmine Nazmy
قيم
قيم الآن
لا جورمانديز: كافيه مغرى فى الشيخ زايد

علشان ينتشر خارج نطاق المدينة، “لا جورمانديز”
فتح فرعه الجديد مؤخرًا فى أركان مول الموجود فى الشيخ زايد. مع ديكوراته المعتادة
بلونها الأبيض والوردى والرمادى، تحس أن جو المكان العام حريمى شوية، وكمان فيه
قعدة صغيرة خارج المكان.

منظر المعجنات الفرنسية والمكرونات والعيش
الطازج يخطف العين وأكيد هـ يثير
شهيتك، وثلاجة الآيس كريم على الشمال هـ
تضبطك فى أيام الصيف شديدة الحرارة. مجموعة مختلفة من
القعدات متاحة، منها ترابيزات طويلة ومعاها كنب وكراسى بذراعين علشان المجموعات
الكبيرة. القعدة فى خارج المكان لطيفة بس غالبًا بـ تبقى زحمة بالليل.

فى الأول، طلبنا مشروب “جرين أمازون”
وده عبارة عن ليمون بالنعناع مثلج بـ 20 جنيه. المشروب كان منعش، بنكهة النعناع
وقطعة ليمون على الكوباية للزينة، رغم أن نصف الكوباية الباقى كل اللى تبقى فيه
كان الثلج المجروش اللى مالهوش طعم.

بيتزا لا جورمانديزا سعرها 44 جنيه وعليها
من فوق طماطم، ولانشون مدخن، ومشروم، وموتزاريلا وجبنة بارميزان. البيتزا بـ تُقدم
من غير أصناف جانبية أو إضافات، وكانت مزيّتة شوية ومالهاش طعم. ساندويتش السلمون
المدخن بالبصل والمخلل سعره 49 جنيه وبـ يُقدم معاه بطاطس مقلية وخيار وجزر. رغم أن
شكله كان مبشّر، بس العيش الفرنساوى كان بـ يتفتفت والحشو نفسه كان ناقصه الطعم الشهى
المعروف عن ساندويتشات السلامون الجيدة. وكمان ما نقدرش نعتبرها وجبة متكاملة، حتى
مع البطاطس والخضار.

للتحلية، الجرسون نصحنا نجرب هوت شوكليت كيك
اللى سعرها 32 جنيه، ودى كيكة مخصوصة بـ تأخذ حوالى 20 دقيقة علشان تتحضر. ومرة
ثانية، شكل التقديم كان تحفة، مع الكراميل على الوجه والقشطة مع أيس كريم فانيليا جنب
الكيكة. أول ما تحط الملعقة فيها، الحشو السائل السخن هـ يتسرب من الكيكة على الطبق. وعلشان إحنا مش من مدمنين الحلويات،
فكان كويس أن الشوكليت كيك سكرها مضبوط، وكمان الكيكة مع صوص الشوكولاتة والآيس
كريم كانوا تركيبة لطيفة من الطعم السخن مع البارد. ورغم أنه كان أحسن طبق فى
الوجبة كلها، بس برضه طعم الكيكة كان قريب من كيكات الشوكولاتة المعتادة.

رغم أن الأكل عندهم متوسط، لكنه يعتبر مكان
مريح للشغل لو بـ تدور على نوع من التغيير، بس فى وقت زيارتنا الـ Wi-Fi كان لسه ما اشتغلش.

نصيحة 360

عندهم حمام واحد مشترك، فلو كان الموضوع هـ يضايقك، دوّر على حمام ثانى.

أحسن حاجة

وصف الأكل بأنك "ممكن تأكله بعينك" وصف مناسب، لأن الأكل شكله بس هو اللى لذيذ.

أسوأ حاجة

طعم الأكل أقل كثير من شكله الحلو.

Map Data
Map data ©2016
Map DataMap data ©2016
Map data ©2016

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح