The Definitive Guide to Living in the Capital , Cairo , Egypt

180 درجة

تامر حسني: 180 درجة

  • تامر حسني
  • بوب
  • من الآن
  • روتانا
تم التقييم بواسطة
Mostafa Maher
قيم
قيم الآن
تامر حسني: 180 درجة

وسط زحمة الإشاعات، وكثرة الأخبار عن نزول ألبومات لنجوم زي أنغام وعمرو دياب، وصدور ألبوم إليسا “حالة حب”من كام يوم.. بـ يغامر  تامر حسني ويقرر  نزول بحر المزيكا بـ “180 درجة”،الألبوم رقم 12 في عمر تامر الغنائي، واللي بـ يضم 12 أغنية، من ضمنهم “Welcome  to the life” اللي صورها فيديو كليب مع المطرب العالمي “Akon” وتم عرضها  في منتصف أغسطس قبل صدور الألبوم بأيام.

“مين ممكن”.. أغنية استعراضية بـ يبين لنا بها تامرالتطور الموسيقي اللي ظهر في أعماله من 5 سنين، واللي الحقيقة ما تعبش فيه خالص لأنه في النهايةبـ ينقل تجارب وبـ يستخدم قوالب موجودة بالفعل، لكن يُحسب له أنه بـ يقدر يستغل ده في نجاح أعماله.. كلمات الأغنية أقل من عادية مفردات كثير فيها مكررة، ومحفوظة، فقدت مع الوقت قوتها ومعناها، زي: “قال أنساكي قال”،مجنون اللي عينه تشوف حد تاني”، اللحن ضعيف جدًا ومالوش أي طعم وكأنه مخلوق من روح الكلام اللي هو أصلًا ميت!.. الأغنية كلمات وألحان تامر حسني، والتوزيع لنور، اللي ما أبدعش في خلق أي جديد واعتمد على قوالب الهاوس العادية.

وعلى الرتم الشرقي البسيط بـ يرجع تامر لأصله في”دنا بابا”، أغنية مقسوم لحنها القديم أفضل من لحنه في الأغنية السابقة، وكلامها البسيط ماينفعش نلوم تامر عليه إطلاقًا، لأنه نابع من شخصيته المرحة ووعيه البسيط،ونقدر  نعتبر مزيكا عبد الرحمن شوقي هى أفضل وأرقى ما في الأغنية.. الأغنية كلمات وألحان تامر.

بـ يخرجنا تامر بره حدود سيطرته على اللحن والكلام بـ”كل ده على إيه”، أغنية مناسبة للشاعر المجتهد دايمًا أمير طعيمة اللي عمل اختلاف إلى حد ما في الألبوم بمساهمته، وبنفس المستوى بـ يقدم شريف بدر لحن أفضل رغم أن واضح أنه متأثر بضغوط تامر وأنه ما كانش حر في تأليفه للحن.. وبـ تندمج مزيكا شريف مكاوي مع أركان الأغنية وبـ تصنع حالة جيدة، خاصة في الاعتماد على البيز جيتار والبركشنز ودخول الكمان في الفواصل وكأنها بـ ترد على الكوبليه بكل حماس.

أغنية الـHead  “180 درجة” تستاهل تشيل اسم الألبوم لجودة صناعتها، خاصة من حيث مزيكا أحمد إبراهيم الراقية، رغم أنه ظهر بشكل تقليدي في استخدامه للكمان مع البيز جيتار، لكنه مع بداية الكوبليه الأول بـ يتضح قد إيه التوزيع منسجم جدًا مع لحن رامي جمال المتألق زي ما عَودنا في أعماله.. وبنفس المستوى قرر الشاعر المجتهد محمد عاطفأنه ما يخزلش اللي تعبوا في الأغنية وعمل كلام لائق.. وبـ يظهر تامر بأداء أعلى من تجاربه السابقة في الألبوم.

“زي النيل”.. عودة لكلام وألحان تامر حسني، بغض النظر عن اللحن المستهلك، الكلام متواضع بشكل غريب، والأغرب أن تامر بـ يغنيه بكل ثقة وكأن دي أعلى حاجة هو وصلها في الشعر الغنائي، توزيع جلال فهمي أقل تواضعًا من اللحن والكلام برضه واضح فيه تأثير سيطرة تامر، خاصة أننا ممكن نختصر التوزيع في مؤثر”التصفيق” وكأننا بـ نسمع مزيكا لحفلة عيد ميلاد أو حنة عروسة!

“العقدة اتفكت” أغنية سريعة، وعادية، وتقليدية، ومقبولة، كلمات صابر كمال، ولحن شريف بدر.. أداء تامر، وتوزيع عمر إسماعيل وخالد عصمت هو أبرز ما في الأغنية، مش لجماله، لكن لاستفزازه لخلايا العقل المتعلقة بالتذوق الفني للمزيكا.. وباختصار كان ممكن العقل يقبل يسمع المزيكا بالأداء الغنائي ده في زمن “لولاكي” و”ميال ميال”.

“نرجع زي زمان” أغنية رومانسية من روح شخصية تامر اللي بـ يظهر بها في البرامج والسينما.. كلمات السيد علي خالية من الفكرة وعلشان ما نتعبش لازم نتوقع دائمًا انعدام الفكرة في الأغنية قبل ما نسمع، بحيث ما نتفاجئش، وما نتصدمش، ونسمع الكلام بزاوية مختلفة، والكلمات هنا مُختصرة ومكتوبة كويس، ومتناسقة مع اللحن الميت لأحمد يوسف..  أما توزيع محمد شفيق فهو مش مؤثر بالدرجة، رغم أن دخلته في الأغنية مهمة ولها دور في دخول حالة الأغنية خاصة مع أنغام البيانو والكمان.

وبنفس الرومانسية، بـ يغني تامر “اطمني” اللي كتبها هشام صادق بشكل مناسب وموزون، وعلى نفس المستوى قدم شريف بدر لحن ممتع ونقبل نسمعه.. ورغم تكرار توزيع أحمد عبد السلام إلا أنه مفيد مع حالة الأغنية وأداء تامر.

“في الحياة” دخلة سبعيناتي بسبب الرتم الكلاسيكي أوتار الجيتار.. كلمات أحمد عبد السلام مقبولة وجذابة في بعض مفرداتها، ولحن محمد عبيه أقل من العادي ومؤثر بشكل سلبي عل  الكلام وبالتالي على أداء تامر وعلى انسجامه مع المزيكا المشتتة في بعض الجُمل.

“ما تتغيري بقى” من أول كلمة هـ تعرف أن مؤلف الأغنية هو تامر حسني، وده مش عيب، بالعكس ده معناه أنه له شخصية واضحة في كلماته حتى وإن تكررت في أعماله المختلفة.. لحن علي شعبان مش منسجم مع الكلام وكأن الكلام رافض يتلحن منحد ثاني غير تامر.. أما مزيكا كريم عبد الوهاب فهي ضعيفة ومكسورة جدًا وكأنها مستسلمة لسيطرة اللحن.

الألبوم بـ يضم كمان “بحبك بكل اللهجات” اللي غناها تامر من حوالي أسبوعين قبل نزول الألبوم، كتبها سيد علي بمشاركة تامر،ولحنها أحمد يوسف بشكل لائق على فكرة الكلام وبـ ينسجم معاه توزيع عبد الرحمن شوقي وخالد عصمت.

عجبك ؟ جرب

ألبوم "من قلبي بغني"لـ "محمد حماقي".

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح