في الفترة اللي فاتت جاء لنا رسائل كثير من قراء الموقع بـ يسألوا عن أماكن تعليم العزف على الآلات الموسيقية المختلفة، جيتار وبيانو وعود وكمنجة وتشيللو وآلات نفخ وآلات إيقاعية. فـ نقدر نقول أن بناء على رغبة السادة زوار الموقع قررنا نعمل دليل كامل لكل آلة موسيقية بشكل منفصل علشان نقول لكم أحسن الطرق لتعلم العزف عليها، وحاولنا قدر المستطاع نوفر معلومات وافية عن الأسعار ومواعيد الكورسات. تابعونا على مدار الأسابيع القادمة واعرفوا إزاي وفين ممكن تتعلموا العزف على آلاتكم المفضلة في القاهرة.
نبدأ بالجيتار؛ له أنواع متعددة وهي الكلاسيك أو Acoustic Guitars والجيتار الكهربائي أو الـ Electric Guitar والـ Semi-Acoustic أو الكلاسيك اللي ممكن توصله بأمبلفاير أو ميكسر. هو الآلة الأكثر شعبية من حيث الإقبال عليها من ناحية الموسيقيين الهواة، نظرًا للسهولة النسبية في تأليف وكتابة الأغاني باستخدامه. كورس بسيط للمبتدئين ممكن يخلي أي حد بـ يطلع منه النغمات الأساسية والكوردات اللي تمكنه من عزف الأغاني بشكل سماعي أو من خلال نوتة مكتوبة. التدرج في المستوى بـ يحتاج مذاكرة كثير وممكن الاعتماد على أكثر من مصدر للتعليم أو تغيير المدرس كل فترة حسب الحاجة للترقي في المستويات. البداية دائمًا بـ تكون بالجيتار الكلاسيك العادي وبعد إتقان الأساسيات من خلاله، يمكن الانتقال للجيتار الكهربائي لتعلم أساليب جديدة أكثر تعقيدًا في العزف زي الصولوهات والوضعيات المتقدمة للأصابع على الجيتار وتمارين السرعة ونهاية بالتأليف وكتابة المقطوعات للجيتار.
الجيتار بـ يستخدم في كل أنواع الموسيقى بلا استثناء، وفيه أنواع موسيقى قائمة على الجيتار بشكل منفرد زي الفلامنكو والـفولك وموسيقى الجيبسي وفيه أنواع موسيقى الجيتار فيها هو اللاعب الأساسي زي الروك والميتال والبوب، ولا غنى عنه في موسيقات الجاز والفانك والشرقي بالإضافة لوجوده في فرق الأوركسترا الكاملة، ويتم كتابة مقطوعات كلاسيكية وريسيتالات كاملة بشكل خاص للجيتار.
في القاهرة طرق كثير لتعليم العزف على الجيتار بأنواعه، مراكز تعليم ومدرسين محترفين بـ يدرسوا بشكل خاص أو Private في مكان يتم تحديده بالاتفاق، ممكن يكون في المنزل أو في ستوديو بروفات أو حتى في مكان عام.
عدد من الأماكن والأشخاص اللي بـ تعلم العزف على الجيتار:
– لو مبتدئ وحابب تتعلم الأساسيات من خلال حصص منفصلة مع مدرس متخصص ممكن تتصل بالرقم ده 01114565741. ده رقم أستاذ وسام سلطان وممكن تتفق معاه على المكان والميعاد اللي يناسبك. الحصة لمدة ساعة بـ 100 جنيه.
– في
ستوديو ويف في الدقي ممكن تتصل بالرقم ده 01004765157 وتسأل على الكورسات اللي بـ ينظمها المكان أو تحدد مواعيد حصص مع مدرسين زي أستاذ
سامر جورج “عازف باص جيتار فرقة إفتكاسات” وهو بـ يدرس الأساسيات ونظريات الموسيقى على الجيتار الأكوستك، وممكن تسأل على الأستاذ
أشرف منصور أو أستاذ
تامر برازيلي والتعليم هنا ممكن يكون بالحصة أو بالكورس الكامل 4 أو 8 حصص، والجلسة بـ 100 جنيه للساعة وبـ تكون في الستوديو في المواعيد من 2 ظهرًا لـ 11 بالليل.
– أستاذ بهاء الذهبي متخصص في موسيقى الروك والميتال لكن ممكن يبدأ معاك من أساسيات الجيتار الـ Spanish لحد ما يخليك متمكن من لعب موسيقتك المفضلة. اتصل به على 01224312950.
– فيه مركز تعليم آلات موسيقية في مدينة نصر خلف دار الدفاع الجوي اسمه «ليجاتو»، بـ يعمل كورسات ودورات مش أقل من 4 حصص، اتصل على الرقم ده لمعرفة التفاصيل والأسعار 01207666426 والمواعيد من 10 صباحًا لـ 8 مساءً.
– لو مستواك متقدم شوية وعديت مرحلة الأساسيات ممكن تتواصل مع الأستاذ مينا عزت على الرقم ده 01117179758 لتعليم الـ Scales والـ Modes على الجيتار الإليكتريك.
– أستاذ شريف واطسون له باع طويل في عالم البلوز والروك، حصته أغلى شوية (150 جنيه في الساعة) لكن لأنه هـ يعلمك على الجيتار الإليكتريك نظريات وتكنيك لعب الستايل اللي بـ تحبه. ممكن تتصل به على 01222829020
–
ستوديو فريكوانسي في روكسي في مصر الجديدة ممكن تتصل بهم وتعرف مين بـ يدرس جيتار هناك، لأن فيه أكثر من مدرس بـ يتعامل معاهم. الحصة بـ 100 جنيه لمدة ساعة. اتصل على الأرقام دي 01006019964 أو 01113566665
– معهد القيثارة لتعليم العزف على الآلات المختلفة بـ يقدم كورسات مكثفة وطويلة للجيتار. المركز موجود في مصر الجديدة بالقرب من نادي الغابة. رقمهم هو 01006566625.
–
ساقية الصاوي فيها تعليم العزف على آلات كثير من ضمنها الجيتار، هـ تلاقي هناك برضه الأستاذ تامر برازيلي، لكن التواصل بـ يكون من خلال إدارة الساقية ومواعيد الجلسات محددة وثابتة والأسعار أقل بكثير من الدروس الخصوصية مع المدرسين المختلفين. اتصل بهم على 0227368881 أو 0227366178.
– أخيرًا الأستاذ مصطفى فتحي مهندس الصوت والمتخصص في تدريس الجيتار وأساليب اللعب المختلفة ممكن تتواصل معاه وتتفق على الأسعار، وفيه مرونة في المواعيد والمكان وشكل الكورس. رقمه هو 01146165372.
وأخيرًا فيه عدد من
ورش تعليم الآلات المختلفة اللي بـ تتعمل كل فترة، ودي
واحدة منهم هـ تقام قريب لتعليم الجيتار ممكن تسجل دلوقت لو حابب.
بشكل عام التعليم بطريقة الحصص المنفصلة المتصلة بـ تكون أفضل من الكورسات والدورات التدريبية من حيث السرعة وكم المعلومات المشروحة في الجلسة الواحدة، يعني ممكن في كورس شخصي مكثف مكون من 4 حصص تنجز أكثر من اللي ممكن تأخذه في 12 حصة في أي مركز تدريبي. لكن طبعًا كل شخص بـ يختار طريقة التدريس اللي تناسبه وفي النهاية المذاكرة والتمرين الكثير هي اللي بـ تصنع الفارق. يفضل أنك يكون معاك الجيتار بتاعك قبل ما تبدأ أي دروس علشان تذاكر اللي هـ تأخذه في البيت. ممكن تشتري جيتار تتعلم عليه بأسعار من 300 لـ 500 جنيه من أي من محلات الآلات الموسيقية الموجودة عندنا في قوائم كايرو360. وانتظرونا الفترة القادمة علشان نقول لكم على طرق تعليم باقي الآلات.
معالم وسياحة
معالم وسياحة
