هو ستوديو بروﭭـات في الأساس، فيه حجرتين للـ Rehearsal وحجرة خاصة بالتسجيل تم تجهيزها مؤخرًا. ستوديو «ويـﭫ – Wave» نقدر نعتبره من الستوديوهات العريقة بالمقارنة بباقي الستوديوهات اللي فتحت في آخر كام سنة، الخبرة اللي بـ تميز أصحابه "الموسيقيين المحترفين" وحتى العاملين فيه كانت سبب رئيسي في بقائه على الساحة خاصة بعد ما قفل العديد من الستوديوهات أبوابه بعد الافتتاح بفترة قصيرة. استمرارية «ويـﭫ» هي سر نجاحه، لأن بطبيعة الحال لما أي موسيقي بـ يكون متعود يروح ستوديو معين ويلاقي الستوديو ده قفل بشكل نهائي بـ يرجع يدور على مكان بديل وطبيعي أنه أول ما يدور في ذاكرته يلاقي اسم «ويـﭫ» حاضر وبقوة، وبمجرد ما يتصل به يلاقي المكان شغال وفيه مواعيد متاحة في واحدة من الحجرتين. ده طبعًا بالنسبة للناس اللي ساكنة بعيد عن الدقي والمهندسين، إنما الستوديو ده هو الواجهة رقم واحد لمزيكاتية الدقي والجيزة، وهم وبـ يروحوا هناك من غير تفكير.
ريسيبشن كبير وبوفيه للمشروبات في مدخل المكان، مش هـ تحس بالزنقة المعتادة لو بـ تروح ستوديوهات ضيقة ما بـ تلاقيش مكان تقعد فيها وقت الانتظار أو في البريك، هنا المكان واسع وممكن تتفرج على التليفزيون أو تسمع مزيكا.
الحجرة الكبيرة بـ 45 جنيه للساعة والصغيرة بـ 35 جنيه، ساعة التسجيل بـ 100 جنيه، وساعات بـ يبقى فيه عروض أنك تأخذ ساعتين هدية للتسجيل لما توصل لعدد معين من الساعات، وممكن تتفاوض على سعر ساعات التسجيل حسب الوقت اللي هـ تحتاجه لأن ده نظام معظم ستوديوهات الصوت. لأن تسجيل التراك الواحد غير تسجيل الألبوم وبـ تفرق في ساعات الميكساج والماسترينج، بس إحنا هنا كتبنا الأسعار المبدئية.
جودة الصوت في الغرفتين متقاربة جدًا، وإن كان الكبيرة أفضل طبعًا والتجهيزات اللي فيها أحدث زي الدرامز الـ Tama وأمبلفاير الجيتار والميكسر الكبير، مشكلتها الوحيدة في أمبلفاير الباص جيتار الـ Behrenger اللي مش بـ يطلع الصوت بالنقاء اللازم، ودي نقطة القوة في الغرفة الصغيرة اللي الدرامز والميكسر فيها مش قوي، لكن فيها أمبلفاير باص Carven قوي جدًا. الغرفة الكبيرة تكفي فرقة كبيرة مكونة من 6 لـ 8 أشخاص، إنما الغرفة الصغيرة آخرها 4 أفراد.
هـ تستمتع بالبروﭭـة هناك ده أكيد، ميكروفونات الصوت كويسة وعزل الحجرات ممتاز، ممكن بس الوصلات أو الأمبلفايرات يكون فيها بعض المشاكل القابلة للحل لو الفني الموجود هناك كويس وقدر يساعدك.
سمعنا تسجيلات من إنتاج الستوديو وعجبنا جودة الصوت والميكساج، سهل أنك تحكم بنفسك وقت ما تقرر تسجل هناك، ممكن تطلب أي Sample علشان تسمعها، والقرار يرجع لك ساعتها.
ستوديو «ويـﭫ» كان فيه بيع آلات وأدوات موسيقية، لكن ده بقى غير متاح دلوقت، بس ممكن تسأل على أي حاجة أنت عاوزها وهم هـ يحاولوا يساعدوك. وأخيرًا بـ نرشح المكان ده لأي مزيكاتي بـ يلعب أي نوع مزيكا، الستوديو ملائم لجميع "المزيكات" من الشعبي للـ Progressive Rock.