The Definitive Guide to Living in the Capital , Cairo , Egypt

في ثاني مقالاتنا الخاصة عن الآلات الموسيقية وكيفية تعلم العزف عليها اختارنا الدرامز والآلات الإيقاعية الغربية والشرقية علشان نقول لكم مين أحسن المدرسين اللي ممكن تعتمد عليهم وإيه أحسن الأماكن اللي ممكن تروحها علشان تأخذ كورسات أو دورات تدريبية. كثير بـ يهتموا بالآلات الإيقاعية والطبول لأسباب ترجع بالطفولة المشردة لما كان التطبيل على الديسكات في الفصل من أمتع الأنشطة الفنية وساحة تنافس لا بأس بها بين الأولاد وأحيانًا البنات، اللي بـ يثبت موهبة حقيقية في المجال ده وهو صغير غالبًا الموضوع بـ يتطور معاه وبـ يفكر جديًا في دراسة الإيقاعات بشكل علمي لما يكبر لدرجة أنه ممكن يلتحق بكليات تربية موسيقية ومعاهد موسيقى، لكن اللي لسه عنده الرغبة في التعلم ومافيش مجال أنه يلتحق بكليات بـ نقول له أن الفرصة ما فاتتش وممكن تأخذ كام حصة مع شوية تدريب ومذاكرة وممكن تتقن آلتك المفضلة بشرط تعطي الموضوع اهتمام وتخصص وقت للمذاكرة والممارسة.

الآلات الإيقاعية لها نوتة موسيقية خاصة بها غير النوتة التقليدية للموسيقى، تعتمد أكثر على الأزمنة والسرعات بين النغمات، ومش كل المدرسين اللي بـ يدرسوا آلات إيقاعية بـ يهتموا بتدريس النوتة دي، لكن الأهم دائمًا بـ يبقى تعليم التكنيك الخاص بالآلة وغرس فكرة السرعات أو الـ Metronom (عداد السرعات) في نفس الدارس، لأن زي ما إحنا عارفين عازف الإيقاع دائمًا هو ضابط الفريق من حيث السرعة والدقة من بداية العزف لآخره. من آلات الإيقاع الغربية ذات الأصول الأفريقية الدرامز والكونجا والبونجز والدجيمبي ومن أسبانيا الكاخون ومن الآلات الشرقية الطبلة والرق والدف وآلات هندية زي الشاندي والدهولاك. عالم كبير هو عالم الإيقاعات ولكل آلة ستايل خاص في العزف ونوع المزيكا اللي ممكن تستخدم فيه. لكن السمة المشتركة بين كل آلات الإيقاع هو أن اللي  بـ يجيد أي منها بـ يبقى سهل عليه يتعلم آلات إيقاعية ثانية لأن النظريات وطريقة التعليم واحدة. دروس الآلات الإيقاعية لازم تبقى في ستوديو صوت أو غرف معزولة صوتيًا، يعني المبلغ اللي هـ تدفعه للمدرس مالوش علاقة بالمبلغ اللي هـ تحجز به الستوديو، وكل ستوديو حسب سعر الساعة فيه.

– أحمد هشام واحد من أفضل عازفي الدرامز في مصر، بـ يلعب مع فرق “صحرا” و”إفتكاسات” ولعب فترة طويلة مع “The Percussion Show” ممكن تتواصل مع هشام وتأخذ معاه حصص درامز من خلال ستوديو ويـﭫ في الدقي. اتصل على الرقم ده 01004765157 وحدد المواعيد اللي تناسبك. الساعة بـ 100 جنيه شاملة حجز الستوديو، لأن ده زي اتفاق بين هشام وستوديو ويـﭫ، لكن لو في مكان ثاني هـ تدفع حجز الستوديو بشكل منفصل عن ثمن الحصة.

– لو بـ تفضل منطقة مصر الجديدة وما حولها ممكن تتواصل مع مجد السوري وهو عازف درامز ومدرس محترف سوري الجنسية ومقيم بمصر، متمكن جدًا في التدريس وبـ يلعب أنواع مختلفة من المزيكا بمنتهى الحرفية. ده رقمه 01061363495 ممكن تتصل به مباشرة أو تتصل بستوديو فريكوانسي 01006019964 وهو يحدد لك ميعاد معاه. التعامل مع مجد بـ يكون بالكورس المكون من 7 حصص (700 جنيه) أو 14 حصة (1400 جنيه). بـ تتعلم من خلالهم الأساسيات وطرق لعب الإيقاعات المختلفة.

– لو عاوز تتعلم آلات إيقاعية ثانية غير الدرامز زي الكونجا والبونجز والدجيمبي والدف ممكن تتواصل مع الأستاذ عمرو الزناتي عازف الإيقاع بعدد من أفضل الفرق في مصر. دي أرقام عمرو 01110620950 أو 01006152283 اتصل به واتفق معاه على السعر والمكان.

– في ستوديو وسط البلد المملوك لأعضاء فرقة وسط البلد ممكن تتصل وتسأل على دروس آلات الكاخون والكونجا والدجيمبي (01112727973) والمدرس بتاعك غالبًا هـ يبقى حد من عازفي الإيقاع في الفريق؛ بوب أو ميزو. الستوديو في جاردن سيتي والمواعيد من 2 ظهرًا لـ 12 بالليل.

– مركز المساحة الثقافي فيه تعليم لجميع الآلات الموسيقية بما فيها الآلات الإيقاعية. مدرس الدرامز هو الأستاذ عمرو جلال اللي لعب مع أشهر الفرق ونجوم الغناء في مصر. هنا الاتفاق بـ يكون مع الإدارة (01111899998 ) وبـ يكون بالكورس الكامل مش بالحصة. المستوى الواحد في آلات الإيقاع بـ 900 جنيه. وفيه 5 مستويات عادة في آلات الإيقاع والموسيقى بشكل عام هم Beginner – Intermediate – Advanced – Professional – Expert ممكن تبدأ مع مدرس معين وهو يرشح لك حد ثاني تكمل معاه المستويات الأعلى لو هو مش بـ يجيد تدريسها.

فيه قاعدة مهمة جدًا لازم تعرفها قبل ما تقرر تتعلم أي آلة وهي Practice Makes Perfect أو التدريب هو اللي بـ يصنع الكمال. مش كفاية أنك تروح تأخذ حصة أو كورس في أي آلة، لازم تمارس وتتمرن بشكل يومي علشان توصل للمستوى اللي أنت عاوزه. وبما أن آلات الإيقاع مش بسهولة وضعها في المنازل إلا لو كانت الغرف مجهزة لها. فبـ ننصح أي حد ناوي يتعلمها أنه يحجز ساعات في ستوديوهات بروفات الصوت القريبة منه ويروح يتمرن لوحده في غير أوقات الدروس. و”اليوتيوب” اختراع عبقري ممكن تتعلم ذاتيًا من خلاله بس الموضوع عاوز شوية إرادة.

ارسلوا لنا لو عندكم أي استفسارات أو عندكم اقتراحات عن أماكن ثانية لتعليم الآلات المختلفة.