The Definitive Guide to Living in the Capital , Cairo , Egypt

أكل بيتي

أكل بيتي: خدمة توصيل سريعة وأكل مغذي وطعمه لذيذ بأسعار قليلة في المعادي

  • المعادي الجديدة
  • مصري
  • 01093002002
تم التقييم بواسطة
Nagla Ashraf
قيم
قيم الآن
أكل بيتي: خدمة توصيل سريعة وأكل مغذي وطعمه لذيذ بأسعار قليلة في المعادي

في الفترة الأخيرة، ظهرت مطاعم كثيرة بـ تعتمد على التوصيل فقط، يمكن لأن المطاعم دي تكلفتها أقل وبـ تعتمد على جودة منتجاتها، وشهرتها بين الناس، والحقيقة أن المطاعم دي بـ تفيد ناس كثيرة جدًا خاص في المطبخ المصري، لما بـ يبقى فيه عزومة والوقت ضيق، المطاعم الدليفري بـ تنقذ الزوجة المصرية من مشاكل كثير بالذات لما تبقى التكلفة معقولة.

وده اللي بـ يميز "أكل بيتي"، اللي كنا كتبنا عنه قبل كده في 2011، وقلنا نشوفه ثاني في آخر 2014 لسه محافظ على مستواه ولا لأ؟

طلبنا دجاج برياني بـ 32 جنيه، وحمام محشي الواحدة بـ 31 جنيه، وأرز بالمكسرات بـ 8 جنيه، وورق عنب بـ 11.30 جنيه، وسلاطة زبادي بـ 6 جنيه، وأم علي بالمكسرات بـ 13 جنيه.

وإحنا بـ نطلب الطلب قالوا لنا أنه هـ يأخد حوالي ساعة وربع علشان الحمام بـ يأخد وقت، بعد ساعة ونص اتصلوا علشان يتأكدوا من العنوان وفي خلال نصف ساعة الأكل وصل، سخن ومتغلف بإتقان ومغري جدًا.

بدأنا بالدجاج البرياني، اللي كان مكون من أرز أصفر متبل كويس مع خلطة الفراخ اللي بالبصل والصلصة الحارة، واللي كانت معقولة بس كانت محتاجة بهارات أكثر من كده شوية.

أما اللي كانت تتبيلته خرافية، وكان مستوي تمام، هو الحمام المحشي، للأسف لما سألنا عن الحمام المحشي فريك ما كانش عندهم، بس  الحمام المحشي أرز قدر يبهرنا بطعمه المميز، اللي مش قادرين ننساه لحد دلوقت، خاصة أنه عمله زي ما بـ نحبه بالطريقة المصرية البيتوتية وحط جواه كبد وقوانص صغننة مع خلطة الأرز.

كمان الأرز بالخلطة كان حلو جدًا ومتوازن، لكن ورق العنب ما كانش على نفس المستوى، هو مش وحش بس مش حلو في نفس الوقت، ممكن كان نقصه صلصة أكثر.

أما الغريب جدًا أن سلاطة الزباي اللي مافيهاش أي حاجة غير زبادي وخيار، ما عجبتناش إطلاقًا، لأنها كانت بلا أي طعم ولا أي توابل، مجرد غيار مبشور وزبادي.

نيجي بقى للحلو، أم على كانت متألقة، خاصة أنها كانت سخنة وشهية، واللبن فيها مش كثير، برضه زي ما بـ نحبها بالضبط.

كمان هـ تلاقي في المنيو عندهم وجبات خاصة بالشركات والمصانع سواء ساندويتشات أو وجبة صغيرة، مكونة من أكثر من حاجة لحوم أو دجاج وأرز وسلاطة ومشروب غازي، وبـ يبقى لها تخفيض 5%.

وعنده كمان وجبات جاهزة مميزة توفر عليك عناء تفكير هـ تأكل إيه؟ زي وجبة الحمام المحشي والملوخية والأرز والسلاطة وعيش ومشروب بـ 47 جنيه.

وعنده كمان وجبة تخسيس علشان اللي متبعين نظام غذائي معين، مكونة من نصف فرخة وخضار سوتيه وشوربة خضار وسلاطة ومشروب دايت بـ 40 جنيه، وممكن تبدلوا الدجاج المشوي بالكفتة المشوية وبطاطس ويدجز محمرة بالفرن وسعرها أقل بـ 37 جنيه.

الحقيقة أنه عنده قائمة ساندويتشات عادية، الميزة الوحيدة أنه عامل قائمة ساندويتشات للعزومات أو الحفلات الكمية تبدأ من 25 ساندويتش كفتة أو لحمة باردة أو فراخ بانيه أو تونة أو فاهيتا، وأسعارهم بـ تختلف طبعًا.

كمان عامل قسم خاص بالطواجن والصواني ومقسمها حجم كبير وصغير، زي طاجن الأرز المعمر وطاجن لسان العصفور وطاجن العكاوي بالبصل والبطاطس، والصواني كانت متنوعة ما بين لازانيا ورقاق وكوسة بالبشاميل وبطاطس بيوريه باللحمة.

كمان هو ممكن يطبخ ديك رومي أو فخدة أو أوزي وبـ يبقى بسعر الكيلو في الوقت ده + 11 جنيه بس للتسوية.

الحقيقة أننا استمتعنا بأكل بيتي أصيل يقدر ييجي لك في أي مكان أنت عاوزه، وبتكلفة معقولة.

نصيحة 360

تقدر تطلبهم لو أنت خارج المعادي، لكن لازم يكون الطلب كبير.

أحسن حاجة

الحمام المحشي.

أسوأ حاجة

سلطة الزبادي.

Map Data
Map data ©2016
Map DataMap data ©2016
Map data ©2016

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح