The Definitive Guide to Living in the Capital , Cairo , Egypt

مطاعم
أولديش – oldish

أولديش.. مكان جميل في وسط البلد

مطاعم وسط البلد مقال نقدي
  • 20 شارع محمد محمود، وسط البلد
  • 09:00 - 23:00
تم التقييم بواسطة
Mohamed Talaat
قيم
قيم الآن
أولديش.. مكان جميل في وسط البلد

سمعنا عن مطعم  اسمه أولديش في وسط البلد، فقررنا إننا نجربه ونعرف حكايته، ووصلنا شارع محمد محمود وعلى بعد خطوات من ميدان التحرير لقينا بوابة خشبية على طراز قديم وواجهة زجاجية بتظهر بار المشروبات، وبتبين كمان الناس اللي قاعدة داخل المكان.

دخلنا ممر صغير، بينقلك من عالم لعالم تاني خالص، هتلاقي فيه أجمل قاعدة في وسط البلد، وسط طراز بيتي قديم بتزينه بلكونات ديكورية وقصاري الورد والأشجار.

اتفرجنا على المكان اللي حقيقي بهرنا بجماله وبالتنظيم الجميل وخلية النحل من الموظفين في المكان، وقعدنا وبدأنا بطلب القهوة بتاعتنا، قبل ما نجرب الأكل والحلويات، صحيح هي اتأخرت شوية بس كانت حلوة ومعمولة زي ما قال الكتاب، وسعرها 22 جنيه بالخدمة، وكمان جربنا السموزي وكان ممتاز وسعره 50 جنيه، وده شجعنا إننا نطلب أكل علشان نجربه.

المكان فيه دور تاني شكله مميز وتحس انه بعيد عن الناس وديكوراته كلاسيكية وهادئ بعكس الحديقة المفتوحة، وبالتالي المحل وفر الأوبن والكلوز إيريا علشان يرضى كل عملائه.

كان فيه أصدقاء لنا جربوا المطعم ونصحونا إننا نجرب طاجن كباب حلة وده سعره 96 جنيه، والطعم كان مقبول والتتبيلة كويسة جدًا.

أما طاجن الموزة فده طعم انسيابي رشيق مينفعش تاكل بعده أي حاجة، ولازم تتلذذ بكل قطعة منه، وسعره تقريبًا 100 جنيه.

أما الباستا فكانت اختيار موفق، لأنها عندهم حلوة، وجربنا النجرسكو بسعر 70 جنيه، وطعمها كان تحفة ومتميزة،  وكانت سخنة بس مش معاها أي مقبلات زي باقي الأصناف.

وبعد الأكل قررنا إننا نجرب الحلو بقى علشان إحنا انبسطنا من الأكل والشرب، وقررنا نطلب طاجن أم علي بالمكسرات وسعره كان 40 جنيه، ولكن للأسف، اليوم قفل بشكل مش حلو، لأن طعم أم علي كان سئ جدًا ولا يليق بالمستوى.

التجربة في حد ذاتها ممتازة، وإحنا في كايرو 360 بننصحكم تروحوا تقعدوا هناك لأنه من أفضل الأماكن في وسط البلد، ولو عاوزين مكان رومانسى أو عائلي أو شبابي، فأولديش بيجمع كل دول، بس متجربش أم علي، وخليك في الطواجن والباستا، وأي مشروبات تحبها.

 

نصيحة 360

بلاش تطلبوا أم علي

أحسن حاجة

ديكور المكان والحديقة

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح