The Definitive Guide to Living in the Capital , Cairo , Egypt

مطاعم
أيادينا – Ayadina

أيادينا: امتياز المطعم اللبنانى في فرع جديد فى جاليريا 40 الشيخ زايد

  • داخل جاليريا 40 - الشيخ زايد
  • لبناني
تم التقييم بواسطة
Angie El Batrawy
قيم
قيم الآن
أيادينا: امتياز المطعم اللبنانى في فرع جديد فى جاليريا 40 الشيخ زايد

روحناه قبل كده مرتين (منهم مرة فى رمضان) فى الفرع الأول فى هليوبوليس فى شارع كليوباترا، المرة دي رحناه فى اللحظات الأولى من بداية عام 2015 فى الفرع الجديد فى جاليريا 40 بالشيخ زايد، المطعم موجود فى المبنى بالداخل، بـ تدخل من الباب وتمشي شوية لحد الحائط المشهور هناك اللى مليان زرع هـ تلاقيه على اليمين، اتخضينا شوية لما لقينا المكان من قبل ما ندخل مليان دخان، وفيه رائحة رائعة للأكل شدتنا على أقرب كراسي وترابيزة.

المكان كان مزدحم، وحركة الجرسونات بلا توقف، المنيو لبنانية من بلادها وفيها أصناف مختلفة كمان ممكن تعرفوها من صفحتهم على الفيسبوك، قعدنا فى حيرة فترة عقبال ما اختارنا لكن أول حاجة شدتنا وطلبناها كانت شوربة عدس بالسبانخ (20 جنيه)، لأول وهلة افتكرناها شوربة العدس العادية، لكن هى عبارة عن شوربة فيها عدس أبو جبة البنى ومعاها سبانخ وقطع بطاطس وجزر مكعبات، طلبنا كمان سلاطة فتوش (25 جنيه)، ومن المقبلات حمص بشاورما اللحم (38 جنيه)، أما من الأطباق الرئيسية ميكس جريل (110 جنيه) وكبة لبنية (87 جنيه) بـ ينزل معاها أرز.

بعد ما طلبنا نزل لنا عيش صغير مدور مش متذكرين اسمه على حامل شكلها مبتكر بثلاثة أنواع Dipping هى الثومية وزيت الزيتون بالسمسم وزيتون أخضر، وزجاجة مياه (كبيرة بـ 14 جنيه)، أول حاجة لازم نقول أن شوربة العدس بالسبانخ اختراع، ما كناش متخيلين أنها هـ تكون جامدة كده لدرجة أننا جبنا الطريقة من على الإنترنت وعملناها فى البيت، طعم الحامض مع العدس والسبانخ ومكعبات البطاطس والجزر تخلى من الشوربة دي منافس لشوربة العدس المصرية للقضاء على البرد.

سلاطة الفتوش ذوقناها فى مطاعم لبنانية كثيرة، لكن المرة دي طعم دبس الرمان مع الحامض والمكونات كانت أكثر من رائعة، اهتمام بالتفاصيل وفى الكميات، فما بالكم باقى الأطباق؟ وده بالفعل اللى لقيناه، اللى كانت نجم الترابيزة الكبة اللى كان جواها صنوبر أضاف للطعم كثير وكمان صوص اللبن كان رائع، كنا بـ نحطه على كل حاجة بـ نأكلها، الميكس جريل كان أكثر من رائع برضه، طعم اللحم وخاصة كفتة الفراخ مع تتبيلتها وهمية، الكمية كبيرة ممكن اثنين يشاركوا فى الطبق، سلاطة الحمص مع الشاورمة ما تتخيرش عنهم برضه.

ختمنا قعدتنا بسموزى خوخ (28 جنيه) وغزل البنات (45 جنيه) المكون من آيس كريم مستكة معاها غزل بنات وفستق، لو فيه كلمة أكبر من وهمية كنا قلناها على التحلية دي، كل ما تحط غزل البنات فى فمك بـ يذوب مع طعم المستكة والفستق وبـ ينقلك لمكان كده خيالى مش هـ تحس به إلا وهى فى فمك، وبالتالى بـ تخلص قضمة تلاقى نفسك بـ تجرى تأخذ واحدة ثانية بسرعة لحد ما الطبق يخلص وتلاقى نفسك ضارب بوذ، السموزى كان حلو برضه لكن ما استمتعناش به زي غزل البنات.

من الآخر التجربة كانت استثنائية، إحنا لفينا على مطاعم لبنانية كثيرة لكن طوال عمرنا هـ نفتكر تجربتنا فى "أيادينا"، كل حاجة مضبوطة بالمللى ومافيهاش غلطة.. المكان ده إضافة لجاليريا 40 ونتمنى له دوام النجاح!

نصيحة 360

جرب سلاطة الباذنجان بتاعتهم، حكاية!

أحسن حاجة

مافيش غلطة، كل الأكل طعامته مالهش حل.

أسوأ حاجة

المكان كان كله دخان، محتاجين مدخنة أو شفاط!

Map Data
Map data ©2016
Map DataMap data ©2016
Map data ©2016

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح