The Definitive Guide to Living in the Capital , Cairo , Egypt

أ تابل – À Table

أ تابل: أول مطعم هولندي في مصر يفتح أبوابه في كابيتال بيزنس بارك الشيخ زايد

تم التقييم بواسطة
Omar Yousry
قيم
قيم الآن
أ تابل: أول مطعم هولندي في مصر يفتح أبوابه في كابيتال بيزنس بارك الشيخ زايد

ما بين الأكل الإيطالي والصيني ووصولًا للفرنساوي والأثيوبي، الحاجة الأكيدة أن مطاعم القاهرة عامرة بالنكهات المختلفة ودائمًا بـ تقدم لنا الجديد، وعلشان كده لما سمعنا عن "أ تابل – A' Table" المطعم الهولندي الجديد في كابيتال بيزنس بارك الشيخ زايد كان لازم نروح ونشوف المطبخ الهولندي أخباره إيه.

A' Table بـ يعتمد على فكرة اخدم نفسك بنفسك، وبـ يقدم أكلات أورجانيك طازجة مع منيو جديدة كل كام أسبوع بحيث تستمتع بتجربة جديدة كل مرة تروح فيها، أجواء المكان المريحة هـ تقابلك وأنت على المدخل، وأكيد محطات البيتزا والمكرونة هـ تبهرك ودي كلها أكلات أقرب للمطبخ الإيطالي، بس ده ما منعناش أننا نجرب أكلهم.

طلبنا طبق تشيكن ساتي (75 جنيه) وسلامون ستيك (85 جنيه) ومعاهم أرز وبطاطس مهروسة، وبعدها طلبوا منا نقعد والطلب هـ يوصل لترابيزتنا. الطبق كان عبارة عن ثلاثة أسياخ من قطع الفراخ المشوية –ثلاث قطع على كل سيخ– ونقدر نقول أنها كانت مشوية صح الصح، مع اللون الذهبي ولون الفحم الأسود المميز لعملية الشوي اللي أضافوا طعم رائع لقطع الفراخ، الأرز كان مسلوق وتتبيلته ممتازة مع مجموعة من الأعشاب أضافت له رائحة جميلة، أما البطاطس المسلوقة فكانت مغطاة بالجبنة وبـ يدخلوها الفرن، وبكده الجبنة عملت طبقة متماسكة على الوش، بس المشكلة أنها كانت متكتلة شوية.

السلامون كان عبارة عن قطعة ستيك متوسطة ومشوية للون بنّي مائل للذهبي، ومن بره كانت متماسكة ومن جوه طرية ولونها وردي فاتح، وبشكل عام طعمها كان روعة. صوص المشروم الأبيض والـ Thousand Island وصلوا متأخر شوية، بس بصراحة المفروض كانوا يتقدموا مع الأكل اللي كان جاف شوية.

بعد ما خلّصنا على الأطباق الرئيسية، كنا جاهزين ندخل على الحلو، ومن بين تشكيلة من المعجنات قررنا نطلب فطيرة التفاح والقرفة الهولندية (25 جنيه) وريد فيلفيت كريم سكوب (28 جنيه) ودي عبارة عن كيك ريد فيلفيت. الفطيرة للأسف كانت ناشفة ومش أسفنجية زي العادة، بس قطع التفاح الطازجة عملت دويتو هايل مع القرفة، بالنسبة للريد فيلفيت، الكريمة كانت مالهاش طعم خالص ومافيش أي وجود للسكر، أما الكيك نفسها فكانت مسكّرة بزيادة، فبالتالي قررنا نخلطهم ببعض علشان نوازن الموضوع.

 وصلنا لآخر موضوعنا، ونقدر نقول أن تجربة الأكل في "أ تابل" مقنعة جدًا، بس الأكل مش مبهر وفكرة المطعم المختلفة ممكن تكون غريبة شوية على الناس الجديدة على الموضوع خصوصًا مع الأسعار الغالية نسبيًا.

نصيحة 360

المطبخ الهولندي بسيط ولذيذ، والأهم من كل ده أنه بـ يتغير مع المواسم، الأكل فيA' Table  بـ يتغير يوميًا وبـ يستخدموا منتجات أورجانيك طازجة في الطبخ.

أحسن حاجة

السلامون كان تحفة، والموظفين هايلين.

أسوأ حاجة

الأسعار مبالغ فيها جدًا بالمقارنة مع الكميات.

Map Data
Map data ©2016
Map DataMap data ©2016
Map data ©2016

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح