دليل مطاعم القاهرة، أحدث المقالات عن مطاعم مصر

مطاعم

قدورة: أكلة سمك حلوة في المهندسين
اصدرت في: 16/07/2016

مافيش شك أن "قدورة" اسم مهم في عالم السمك، المطعم اللي موجود في شارع جامعة الدول العربية، نجح أنه يكون ماركة مسجلة غير قابلة للتقليد، فأكيد لما نحب نأكل أكلة سمك حلوة فهنفكر فيه على طول. المحل مشهور في المهندسين، لدرجة أنه اسم محطة من محطات الشارع، مكون من 3 أدوار، أول ما تدخل هتلاقي ثلاجة عرض الأسماك على الشمال فيها كل أنواع الأسماك، منها أنواع كنا أول مرة نشوفها أو نسمع اسمها، طريقة الطلب من قدروة مختلفة شوية، أنت بتقف أمام ثلاجة العرض، للي فيها سمك أغلبه صاحي وبيبلبط وبتختار بنفسك السمك اللي أنت حابب تأكله، سواء كان جمبري، كابوريا، فيليه، سمك التونة، أو بلطي، وموظف المحل بيحضر لك طلبك أدام عينك . ودي متعة كبيرة أنك تتفرج على السمك وهو صاحي لحد ما يتم تجهيزه علشانك. ومن الأفضل وأنت رايح قدورة يكون عندك فكرة عن أنواع الأسماك، لأن هناك مافيش منيو تقدر من خلاله تحدد اختياراتك، وننصحك بلاش تقول للموظف اختار لي أنت على ذوقك، لأنه في الغالب هيختار لك أنواع غالية جدًا. بعد ما بتختار أنواع الأسماك اللي أنت حاببها من ثلاجة العرض بتطلع الصالة، وتختار الترابيزة اللي حابب تأكل عليها، ومساحة الصالة ضخمة وده هيخليك دايمًا تلاقي مكان فاضي حتى في عز الزحمة، بعدها بييجي الموظف يعرف أنواع السلاطات اللي أنت حاببها، والاختيار من بين أنواع كتير، زي سلاطة خضرة، طحينة، سلاطة البقدونس، سلاطة الجمبري، والأطباق الجانبية زي الأرز والشوربة. بدأنا بشوربة السي فود المميزة، (ودي وسعرها 40 جنيه) وكانت حلوة جدًا، وكمية الجمبري والكالماري فيها كبيرة، وعرفنا ليه فيه انطباع إيجابي لناس كتير عن شورية السي فوود في قدروة، هي فعلًا معمولة حلو، سلاطة الطحينة كانت عادية، أما السلاطة الخضراء فكانت لذيذة وبتتميز بأنها طازة، دخلنا على الأرز الصيادية (10 جنيه للطلب) وكان طعمه تحفة وخلطة التوابل مضبوطة فيه، نيجي بقى للسمك اللي طلبناه؛ سمكة بلطي حجمها كبير وزنها أكبر من نصف كيلو (الكيلو ثمنه 45 جنيه)، وطبق جمبري كبير مشوي بالخلطة (سعره 113 جنيه)، وطبق فيليه (47 جنيه) الطلبات كلها كانت جودتها عالية، والخلطة مميزة جدًا ومختلفة عن أي خلطة جربناها في مكان تاني. الخدمة في قدورة" سريعة ومحترفة، والموظفين بيتعاملوا بطريقة محترفة جدًا، بعد انتهاء الأكل نزل لما شاي هدية مجانية من المطعم. خرجنا من المطعم وإحنا عندنا إحساس إننا كنا في الإسكندرية، نفس الجو والطعم الأصلي للسمك، الأسعار غالية شوية لكن جودة الأكل تستاهل. وأكيد هنرجع تاني.

...

الحوراني: أحلى أكلة سمك بسعر معقول في البحر الأعظم
اصدرت في: 11/07/2016

أول ما تسمع كلمة "أكلة سمك" أكيد بيجي لك رعب من الفاتورة، خصوصًا لو كنت أنت اللي عازم، السمك من الأكلات الحلوة، والاختيار دايمًا لما تيجي سيرته بين مطاعم عادية بطعم عادي أو أسماء كبيرة بأرقام مهولة، وبين الأتنين فيه كام محل بيحققوا لكم المعادلة الصعبة وبيدفعوا تمن ده ضغط كبير عليهم لكن كمان بيجنوا شهرة وسمعة محترمة . أسامي كتير بتلعب في المنطقة دي زي وادي النيل، وعروس البحر، لكن انضم ليهم أخيرًا الحوراني اللي خلق لنفسه مساحة خاصة جدًا، الموضوع مش مجرد أسعار معقولة، وطعم حلو، المسألة لها علاقة بطعم خاص، مش هتدوقه غير عنده. الحوراني بدأ من فترة قصيرة نسبيًا، لكن قدر في فترة قصيرة يحط نفسه على الطريق، البداية كانت مع فرع البحر الأعظم، واللي ناس كتير بتضايق أن مافيهوش مكان للقعاد، ديليفري بس، لكن حالة من التعويض بدأت مع فرع الشيخ زايد اللي فتح قريب، كمان المحل بيحاول يعوض قلة المكان بمجموعة افتكاسات زي رحلات نيلية ينظمها فيها وجبات من صنعه أو أنه ينصح اللي عاوز ياكل أنه يقعد على القهوة اللي جمبه، وده بالنسبة لفرع البحر الأعظم. نيجي بقى للسمك نفسه، المنيو غني بالحاجات اللي ممكن تطلبها، سواء وجبات أو طلبات خاصة، جربنا عنده كل حاجة تقريبًا، وماندمناش على أي حاجة، حتى السلطات مميزة جربنا البوري السنجاري واتبسطنا منه جدًا، الكيلو بـ 52 وكمان البلطي ماكنش بطال سعره 30 جنيه، والمرات الجاية هنجرب اللوت وسعره 80 جنيه للكيلو، وكمان الدنيس والقاروص بـ 120 . وجبات كتير بأسعار مختلفة بيوفرها الحوراني تيك أواي، زي الميكس المقلي الكبير بـ 58 والوسط بـ 28 والصغير بـ 21 جنيه، من الحاجات المميزة عنده الاستاكوزة بالبشاميل، واللي خلى سعرها 250 بدل 300، كمان عنده طبق سي فوود بالمكرونة عبارة عن فيليه وجمبري كبير، وجندوفلي وكابوريا وسبيط ومكرونة مع الصوص الخاص بيهم تمنه 60 جنيه. كيلو السلمون المشوي بالزبدة بـ 160 جنيه، في الأيام العادية الطلب بياخد وقت شوية، لكن في رمضان الوصول بالتليفون لهم صعب جدًا يفضل الاتصال بدري حبتين تلاتة ومن العيوب اللي جربناها أنه الطلب ممكن يبقى في شوية لخبطة، نظرًا للضغط الرهيب عليهم، لكن طبعًا واضح أن ده ظرف مرتبط برمضان لأن ده ماحصلناش قبل كدا. من عروض رمضان اللي وفرها المحل "وجبة الحوراني الرمضانية" مكوناتها شريحة بلطي مقلي، وشريحة بوري سنجاري، جمبري كبير مقلي راس وذيل، وجمبري كبير مشوي، وكفتة جمبري، وشيش فيلية ورز صيادية، وسلطة، وعيش، وعصير بـ 80 ج، كمان عمل وجبات بسيطة للناس اللي حابة توزع عبارة عن وجبة بـ 13 جنيه، قطعتين فيليه وشوية رز وطحينة ومخلل. في المجمل المحل لطيف وننصحكم بمحل الشيخ زايد ونتمنى أنه يفتح فروع في وسط البلد.

...

10 مطاعم ممكن تستمع بيهم في العيد
اصدرت في: 06/07/2016

ناس كتير بتحب تسافر في العيد أو تتقوقع في بيتها خوفًا من الزحمة والقلق في العيد، وإن كان فيه ناس تانية برضه بتحب جدًا تستمتع بأجازتها وتخرج في أماكن ممكن ما تكونش زحمة قوي، فحاولنا نجمع لكم أفضل الأماكن اللي أكلها حلو في مناطق القاهرة المختلفة. كراكاس – Caracas هو له أكثر من فرع في القاهرة، في المهندسين و6 أكتوبر والمعادي، المكان قعدته لطيفة، بس ما فيش أجمل من أنك تقضي العيد وسط أكل لبناني معمول بحب، وننصحكم تجربوا غزل بيروت، واللي هي عبارة عن آيس كريم مستكة مع فسدق وبسكوت وطبعًا عروس البنات اللبناني (حلاوة شعر) حاجة ما تتوصفش. كريف- Crave الحب الأول واللي مستمر مع مستوى الأكلات الهايلة، كريف ممكن تتغدى فيه، أو تشرب عصير مع حاجة حلوة لذيذة، زي الـ cheesecake اللي بـ 3 أنواع صوص مختلفة، كريف له فروع كثيرة، والجودة والخدمة في غنى أننا نتكلم عن جمالها. ديوكس – Dukes ناس كتير ما تعرفش أن ديوكس بيقدم منيو كامل غير الحلويات، يمكن علشان طبعًا سمعة حلوياته سبقته، وفي الفترة الأخيرة انتشر من التجمع، لحد ما وصل للمعادي ومدينة نصر والدقي. أكثر حاجة بنحبها عنده الـ Dirt Cake، بس ده ما يمنعش أننا برضه بنحتار نطلب إيه لأن كل حاجة هناك بتغرينا. بول – Paul ماحدش ينكر أن أصل الحلويات فرنسي، وأن في كل مرة نروح لازم نطلب حاجة مخبوزة، بس برضه منيو الأكل هناك حكاية، أما القعدة فما يتشبعش منها أبدًا. وطبعًا لازم تجربوا الباوند كيك مع الشاي، وتحسوا بجمال العيد مع أصحابكم وأهلكم. جريبس - Grapes من أجمل الأماكن اللي روحناها مش بس علشان الديكورات الجذابة الملونة، لكن كمان كل حاجة معمولة بحرفية، لازم تجربوه عنده الحلو كل حاجة عنده ممتعة بالذات الـ Crème brule صوت قرمشة السكر المحروق كافي أنه يوقعك في غرامه. نواب – Nawab أما بقى الأكيلة اللي مالهمش في جو لاقيني ولا تغديني، نواب في الزمالك بيعمل أكل هندي خطير مليان توابل والأطباق حجمها كبير، وما تنساش تجرب الشاي الهندي بعد الأكل الدسم هناك وممكن تجرب غلاب جامو اللي شبه الزلابية عندنا شوية بس طعمها مختلف. مينس – Mince كمان عشاق البرجر ممكن يتسمتعوا بأحسن برجر في مصر في مينس، واللي له فروع كثير، ولو لقيتوه زحمة ممكن تطلبوه دليفري، بس إحنا شخصيُا بنحب فرع المعادي، طبعًا انتم لو تبقى في بطنكم مكان بعد البرجر لازم تجربوا الـ Alvis Toast، لو لسه ما جربتهوش فده فرنش توست بالشوكولاتة والكراميل والآيس كريم، حاجة فظيعة في جمالها وبقلظتها كده. برو أند شو – Brew & Chew لو فيه مكان لمصنع حلويات مبهج زي فيلم Charlie chocolate Factory، فأكيد هيكون هناك، الشوكولاتة بتحلي أ حاجة تتحط عليها، غير القعدة المتميزة والخدمة الممتازة، هم برضه بيقدموا منيو أكل كامل، ومستنين نعرف هيعملوا لنا مفاجأة إيه في العيد؟ فطيرة – Fetra أما لو عاوزين تأكلوا حاجة خفيفة ومتبلة بمزاج يبقى عليكم وعلى فطيرة، واللي بيقدم فطائر حلو وحادق، فطيرة السجق عندهم حكاية، جربوا كمان فرع التجمع بيكون مش زحمة. ذا جريك- The Greek أكل يوناني من اللي قلبك يحبه في المعادي، سواء كرات اللحم اللي بالنعناع والبصل أو الكليماري بصوص تزاتزيكي، هتجرب أكل عمرك ما جربته في حياتك واللي يعتبر شبه أكلنا شوية بس بتوابل مختلفة.

...

قبل ما رمضان يخلص:  اطلب فطارك وريح بالك
اصدرت في: 04/07/2016

بعد يوم شغل رمضاني طويل وسط حر وزحمة ودوشة، أكيد كلنا بنواجه نفس المشكلة لما نرجع البيت خاصة كمان أن الشهر قرب يخلص، وهي إزاي بعد كل ده هندخل المطبخ ونحضر فطار يعوضنا عن اللي حصل! طيب، عندنا فكرة كويسة ممكن تنفع معاك. - إيه رأيك تطلع على بيت العائلة وتفطر هناك؟ - للأسف مش هينفع، أصل عمو محسن وطنط سوسن عزموهم انهاردة على الفطار والبيت فاضي. - طيب إيه رأيك تشوف أخبار الثلاجة إيه؟ - أه معلش نسينا إن معندكش وقت تشتري طلبات البيت لأن مع نهاية شغلك بيكون السوبر ماركت قفل وطبعًا مستحيل تدخل على مطعم في عز ساعة الفطار. سامع واحد بيقول طب نعمل إيه حيرتونا معاكم؛ إحنا هنساعدكم. من حسن الحظ إن ٩٩٪‏ من مطاعم القاهرة السنادي بيوصلوا طلبات في رمضان، وفي مطاعم عملوا عروض مميزة كمان لخدمة التوصيل. الراحة مطلوبة في رمضان مفيش كلام. كايرو كيتشين أخصائي الأكل المصري كايرو كيتشين بيقدم عرضين للفطار في رمضان، عندك منيو فطار شرقي (١١٠ جنيه) تختار فيها من بين فتة فراخ أو كشري أو ملوخية بالفراخ أو اللحمة أو ممكن تختار من منيو أكل غربي (١٢٥ جنيه) ما بين روست بيف تندرولين أو ميكس جريل أو نصف فرخة مشوية. أي منيو شاملة مشروب رمضاني وحلويات شرقية وسلاطة وشوربة وطبق مقبلات. اتصل على ١٦٦٦٩. دجاج تكا مين مايعرفش خبير الفراخ المشوية الأول دجاج تكا، واللي بيقدم السنادي تشكيلة كبيرة من الأطباق احتفالَا بشهر رمضان. ادفع ١٢٥ جنيه مقابل سلاطة وطبق مقبلات وتمر وعصير، مع اختيارك من الفراخ اللبناني المخلية أو فروج أو شيش طاووق وغيرهم. اتصل على ١٩٠٩٩. فروجة فروجة بيقدم أرخص عروض معانا النهاردة. ادفع ٥٩.٥٠ جنيه فقط واستمتع بوجبة فيها فروجة مشوية وأرز وسلاطة وعيش وقرع عسل بشاميل، أو ممكن تختار نفس العرض يكفي سبعة أفراد بسعر ٣٠٠ جنيه وبس. اتصل على ١٩٤٥٤. فرانكس فرانكس في النزهة الجديدة بيقدم واحد من أوفر العروض، يعني عندك منيو الفطار (٢٦-٤٤ جنيه) تشمل بامية ومولوخية وبطاطس فرن وطواجن متنوعة (١٢-٣٠ جنيه) أو عندك منيو ثانية تشمل تشيكن بيكاتا مشروم وفراخ بانيه ومعاهم باستا أو أرز (٣٠-٥٠ جنيه). اتصل على ٠١٠١٥٥٥٧٠٤٤ أو ٠١٠١٥٥٥٧٠٥٥ كيه كال - Kcal كيه كال يعتبر من أهم مطاعم الأكل الصحي في القاهرة اللي بتقدم فطار رمضاني صحي متكامل. اختار بين شوربة خضار أو عدس مع اختيارك من الفراخ أو الكفتة ومعاهم خضار سوتيه أو بطاطا حلوة أو أرز بني وطبق حلو عبارة عن فاكهة أو براوني كيه كال المخصوص، وبعدهم عصير فريش تهضم به الأكل، وكل ده بسعر 75 جنيه. اتصل على 19718. شاورمايستر المطعم الشرقي شاورمايستر هيحقق كل طلباتك في الفطار من شوربة لاختيارك من نوعين من المقبلات الساخنة والباردة، ومعاهم طبق رئيسي من اختيارك ما بين شاورما أو شيش طاووق أو كفتة، ومعاهم كمان أرز بسمتي وبطاطس محمرة، وعيش ومشروب رمضاني وحلويات وكل ده بسعر 80 جنيه للفرد. اتصل على 16229. فينيز بيتزا - Vinny's Pizzeria يمكن البيتزا تعتبر أغرب حاجة في الدنيا على الفطار، لكن فينيز بيقدموا عرضين لا يقاوموا للفطار في رمضان. الأول عبارة عن بيتزا نيو يوركر معاها فطيرة تفاح وخبز بالثوم، والوجبة دي تكفي من 2-3 أفراد (125 جنيه)، أما العرض الثاني فبيتكون من بيتزا كيك فينيز الشهيرة وبرضه معاها فطيرة تفاح وخبز بالثوم، وتكفي 3-4 أفراد (240 جنيه). اتصل على 19867. ويليز كيتشين Willy's Kitchen ويليز كيتشين الشهير بتقديم البيتزا ناتشو برجر عمل عرض مخصوص لرمضان عشان تستمتع بأصنافهم المميزة من البرجر. ادفع 85.90 جنيه وافطر بساندويتشين برجر ومعاهم بطاطس بقشرها ومشروب؛ في كمان كومبو مكون من ثلاثة برجر سعره 119.50 جنيه وخمسة ساندويتشات بسعر 174.50 جنيه. اتصل على ٠١٢٨٠١٠٨٨٥٨. وك أند واك أخصائي الأكل الصيني وك أند واك وفروعه في المعادي وهليوبوليس عاملين منيو رمضانية بنظام set menu (٨٥ جنيه) تشمل اختيارك من الأرز أو النودلز مع لحم أو فراخ ومشروب وطبق حلو. لفرع هليوبوليس، اتصل على ٠١٠٦١٤٧٧٧٧٣ أو ٠١٠٦١٤٧٧٧٧٢، ولفرع المعادي اتصل على ٠١٢٧٤٤١١٢١٤ أو ٠١٠٩٠٠١٠٣٦. رمضان كريم!

...

بلدينا: سحور لطيف في Club33  في الزمالك
اصدرت في: 30/06/2016

كل رمضان بنبقى أمام معضلة وهي "نفطر يوم مع بعض" أو "نتسحر يوم مع بعض" دول أكثر جملتين بيتقالوا في رمضان وقليل لما بيتحققوا بسبب أن الوقت في رمضان قليل جدًا وبنكون أمام اختيارات العبادات والزيارات والعزومات مع الأصدقاء، الحمد لله قدرنا نكلم أصدقائنا الحلوين وأخيرًا نزلنا نتسحر. من الاقتراحات كان السيدة زينب ومنها إلى الحسين، لكن بصراحة الزحمة والحر خلتنا نغير خطتنا ونتجه لجزيرتنا المفضلة، جزيرة الزمالك الجميلة بعد شوية بحث وتشاورات روحنا على Club 33 اللي اختلف تمامًا بعد التجديد، كان قدامنا اختيارات محدودة من المطاعم. حيث أننا رايحين لسحور يعني عاوزين مطعم مصري، علشان كده روحنا على مطعم بلدينا وهو مطعم ريفي (زي ما بيقولوا) موجود على دورين بكراسي وديكور مصري، حتى العمال لبسهم عبارة عن جلاليب بلدي وطواقي شكلها ظريف. المكان ماكانش زحمة قوي لكن الترابيزات على النيل كانت كلها مشغولة وانتظرنا شوية لغاية ما قدرنا نقعد على النيل الجميل، ماكانش فيه منيو للسحور لكن منيو الفطار تعتبر منيو السحور. المهم طلبنا من المنيو الجميلة المختصرة والبسيطة، وجبة بلدينا (50.95 جنيه) وهي عبارة عن فول – طعمية – بيض – سلاطة، طلبنا البيض مسلوق والفول بدون زيت (كان معانا واحد شبه نباتي) وكمان طلبنا فول اسكندراني (17.95 جنيه) وإسبانيش أومليت (16.95 جنيه) ووصينا على فطيرة مشلتتة (71 جنيه) بينزل معاها قشطة وعسل أبيض وعسل أسود، بس طلبنا أنها تيجي متأخر شوية كنوع من التحلية، كمان طلبنا عصير دوم (18 جنيه). عصير الدوم كان فريش وحلو بس كان سكره زيادة شوية، بعدها بشوية بسيطة وصلت أول الطلبات، وجبة بلدينا وهي عبارة عن قطعتين طعمية (فلافل) وبيضتين مسلوقتين وطبق سلاطة صغير وطبق فول معقول، الوجبة تكفي شخص واحد، الفول كان طازج بدون زيت وعليه ليمون، السلاطة كويسة وكميتها معقولة بس ملحها زيادة شوية والطعمية رائحتها بتتكلم عنها وعن قرمشتها وطعمها الحلو، الفول الإسكندراني كويس برضه عليه طماطم وفلفل وبصل وبهارات مضبوطة، أما الاسبانيش أومليت برضه كويس فلفل ألوان وبصل ومتسوي كويس وكمية تكفي أكثر من شخص، العيش بينزل بزيادة وممكن نزود. بعد ما كبسنا الدور الثقيل ده، كانت الفطيرة المشلتتة على وشك الدخول علينا، زي ما سعرها مبالغ فيه، الفطيرة كانت مبالغ فيها برضه (تحسوها معمولة بطريقة فرنساوي) طعمها حلو ومقرمشة بس حسيناها حاجة غريبة عن الفطير ممكن بان كيكس أو كريب، بس مش زي الفطير المشلتت البلدي بتاعنا اللي غرقان بالسمنة وطبقات من الفطير كده، بينزل مع الفطير قشطة وعسل أبيض وعسل أسود، القشطة كانت معقولة لكن العسل الأبيض والأسود كانوا رديئين النوع وشبه مياه بسكر. بعد الوجبة الجميلة دي طلبنا براد شاي علشان نحبس ونستعد للصيام بقى. مطعم بلدينا هو ضمن المطاعم اللي بتقول على نفسها مصري وبتقدم أكل مصري بجودة عالية، لكننا بنشوف أن بالرغم من الأسعار العالية إلا أن الجودة الموجودة في الأكل مش زي اللي بيقدمها مطاعم ثانية في نفس المستوى من الأسعار، لكنه يفضل مكان كويس وممتاز لقعدة جميلة على النيل وأكل مصري مضبوط لكن بسعر غالي شوية.

...

آبر ديك: فطار مميز في فور سيزونز نايل بلازا
اصدرت في: 29/06/2016

مين يقدر يستغنى عن الأنتخة في البيت وقت الفطار مع أكلة بيتي في عزومة العيلة، وبعدها تستريح على الكنبة وتتفرج على مسلسلات رمضان وأنت بتدلع نفسك بشوية أم علي. آبر ديك في فور سيزونز نايل بلازا عمل كل حاجة هتحتاجها للاستمتاع بتجربة رمضانية صعب تتنسي. آبر ديك مقسوم لثمانية لاونجات تصميماتها هتحسسك بالراحة كأنك في بيتك، فمثلًا كل لاونج فيه شاشة تليفزيون مجهزة بساوند سيستم، وده طبعًا علشان تستمع بجرعة الاكتئاب اليومية من مسلسل نيلي كريم وأنت في قمة التركيز. كل لاونج فيهم كمان فيه لمسة مميزة زي اللوحات الكبيرة والأثاث المختلف في كل واحد منهم. لو زودت على الكلام اللي فات الحوائط اللي من الخشب والأعمدة المعلق عليها الأسقف القماش والمنظر البانورامي من حمام السباحة على الروف أكيد هتقدر تستمع وتسترخي زي الملوك. الأجواء الرمضانية بتتجسد في مفارش الخيامية على الترابيزات والفوانيس الجميلة وطبعًا الأكل المميز في منيو الفطارSet Menu (330 جنيه للفرد) اللي تشمل مشروبات رمضانية وشوربة من اختيارك ومجموعة من المقبلات الساخنة والباردة وطبق رئيسي مع طواجن اليوم وحلويات شرقية. بدأنا فطارنا بعصير كركديه وصوبيا بالتمر، وبعدها وصلت أطباق الشوربة. نتكلم شوية عن شوربة العدس وقوامها السميك المميز وطعمها اللذيذ، أما شوربة الطماطم على الناحية الثانية فكانت خفيفة شوية، لكن ده ما يمنعش أن طعم الطماطم جميل في كل الأحوال. بعدها وصلت سلّة عيش طري مع تشكيلة من المزات الباردة. اللبنة كانت متواضعة الطعم بس بابا غنوج كان روعة خصوصًا مع إضافة الصنوبر اللي عمل نكهة عظيمة. نجم الشباك فعلاً كان المسقعة الخفيفة الرائعة، وهي عبارة عن مكعبات باذنجان مستوية صح الصح مع صلصة طماطم ممتازة ومافيهاش ثوم بزيادة زي المسقعة التقليدية، وفوق كل ده عليها حمص. أما المزّات الساخنة فكانت عبارة عن فطاير طرية بالسبانخ لسه بنحلم بطعمها لحد دلوقتي، مع سمبوسك جبنة لذيذة فيها نعناع قدر يعمل طعم مختلف تمامًا، وأخيراً السمبوسك باللحم مفروم وتتبيلته ممتازة والكبيبة اللي تستحق رسالة شكر بحشوها المضبوط وسطحها الخارجي المقرمش. نروح على طاجن اليوم اللي كان طبق فتة مصري رائع. الفتة بتتقدم في برام حمراء جميلة ومكعبات اللحم الطرية مرصوصة فوق العيش والأرز ومتغطية بصلصة فيها نكهة الثوم اللذيذة. أما اللازانيا للأسف فكانت ناشفة واللحم المفروم محتاج تتبيلة أحسن من كده ونقدر نقول أن مستواها بعيد عن باقي المنيو. وصلنا لطاجن السي فوود الغني بصوص الزعفران وطعمه الرائع، والسي فوود نفسه كان واضح عليه أنه طازة. أول أطباقنا الرئيسية كانت ميكس جريل عبارة عن كفتة وريش ضاني وفراخ مشوية ولحم مشوي. كل حاجة في الطبق تتبيلتها عال العال، الكفتة مثلًا كانت طرية وماسكة نفسها، والفراخ المشوية كانت طرية بشكل مش معقول والريش المستوية بامتياز كانت مسك الختام. العيب الوحيد كان في اللحم المشوي زيادة عن اللزوم، وللأسف أثر على طعم اللحم اللذيذ. لو هنقارن كمية الميكس جريل بالثعابين المشوية فأكيد المقارنة مش لصالح الثعابين خالص، بس عمومًا جودة السمك بتتكلم عن نفسها. بيتقدم مع الثعابين اللي بتذوب في فمك من جمالها أرز لذيذ وخضار سوتيه هايل. على العموم، الثعابين من وجهة نظرنا كانت محتاجة نكهة مميزة أو حتى رشة ليمون على الوش. خلصنا فطارنا مع طبق أم علي، هو في حلاوة زي حلاوة الحاجة أم علي؟ الوش الذهبي الجميل المائل للبني مع العجينة الطرية اللذيذة وكمية كبيرة من الفستق – يمكن بس كان محتاجة شوية جوز هند وزبيب – مع كمية مضبوطة من اللبن والسكر، وبصراحة نقدر نقول إنها أحسن أم علي أكلناها – لازم تفتخر بوالدتك يا علي. عمومًا، من الصعب نشتكي من تجربتنا في آبر ديك. خدمة ممتازة وأكل هايل وأجواء تعدل مزاجك، لكن طبعًا كل حاجة ولها ثمنها.

...

بول: فطار مش عادي في مول العرب
اصدرت في: 28/06/2016

بالرغم من أن المطبخ الشرقي بأنواعه واتجهاته المختلفة بيكون البطل الأساسي على أي ترابيزة فطار، لدرجة أن فيه أماكن كثيرة بتقلبها شرقي في رمضان، مع أنها في المعتاد بتقدم أطباق عالمية. ولأن الواحد شبع من الأكل الشرقي طول رمضان كام لازم نغير ونروح بول – Paul في مول العرب، واللي بيميزه عن أماكن ثانية كثير أنه بيحتفظ بأطباقه الفرنسية، ولكن بيقدمها بروح شرقية تناسب الجو الرمضاني. بعكس معظم الأماكن اللي بتطلب أنك تحجز بالتليفون أو تدفع تحت الحساب، بول ممكن تروح له قبل الفطار بساعة وتختار من المنيو الرمضاني (139 جنيه للفرد)، أو من المنيو العادي اللي عندهم. المنيو مكون من شوربة (عدس أو المينيستروني)، اختيارك لمشروب رمضاني (جلاب أو قمر الدين)، سلاطة (جبن حلومي مشوية – سلطة الروكا بالعدس الأخضر) وطبق رئيسي (مكونه الرئيسي يا إما سمك – لحم – فراخ). المكان مكانش زحمة وبالتالي الخدمة كانت ممتازة وكل حاجة كانت في وقتها على الترابيزة، العيب الوحيد أن ما فيش أي مؤشرات في المحل تدل على أن المدفع ضرب أو أن الآذان أذن وبالتالي اضطرينا ندي لنفسنا دقيقتين زيادة صيام علشان ما يروحش اليوم بلاش. و بما أننا كنا أكثر من فرد، قررنا أننا نجرب الاختيارات المختلفة اللي كانت موجودة في المنيو، وبالتالي إحنا هنحكي لكم عن التجربة مرة واحد. الشوربتين –سواء العدس أو المينيستروني- كانوا سخنين؛ شوربة العدس كان قوامها تقيل فما ننصحكش أنك تخلصها للآخر علشان هتشبعك، وخصوصًا أن كميتها كبيرة، ولكن ده ما يمنعش أنك هتستمتع بطعمها؛ الكمون بطعمه المميز ضاف كثير لشوربة زهقنا منها في البيت. أما شوربة المينيستروني –واللي هي عبارة عن شوربة خضار عادية جدًا بس بمرقة فيها طماطم- فكانت أخف كثير من الثانية وباالتالي تعتبر بداية حلوة للفطار. وبالرغم من أن نسبة الخضروات قليلة لنسبة المرقة، إلا أن المرقة لوحدها طعمها غني ولذيذ. وبما أننا لنا تجربة مش لطيفة مع الجلاب السنة اللي فاتت –وبرضه كانت في بول- قررنا أننا نختصر السكة ونطلب قمر الدين، والحقيقة أن من الواضح أن المشروبات الرمضانية في بول مش أحلى حاجة؛ لأن قمر الدين كان طعمه مسكر جدًا، ده غير أن طعم المشمش فيه كان صناعي. بالنسبة للسلاطات؛ سلطة الجبن الحلومي المشوية كانت خفيفة، وهي عبارة عن مجموعة من الخضروات المشوية بصوص البيستو مع جرجير وسبانخ طازة والدرسينج صوص الليمون. الخضروات المشوية كان طعمها رائع ومضبوطة – لا دبلانة ولا نية- أما المكونات الطازة فكانت فريش فعلًا وشكلها يفتح النفس. كان نفسنا الدرسينج يبقى أكثر شوية لأنها كانت شبه مش موجودة. سلاطة الروكا بالعدس الأخضر فما قلتش في جودة المكونات عن السلاطة اللي قبلها (جرجير، طماطم تشيري، عدس، فجل، تمر وجوز، ورمان والدرسينج بخل التفاح). واللي بيميز السلاطة دي عن اللي قبلها هو مكس النكهات المختلفة الموجودة فيها؛ ما بين حلو التمر ونكهة الجرجير والدرسينج مع قرمشة الجوز خلتها طبق مثالي. الأطباق الرئيسية كانت كالآتي؛ قطعتين فراخ مشوية مع مزيج من حبوب الكينوا، القمح والحمص ومعاهم خضار سوتيه (بروكولي وفاصوليا خضراء) وصوص المستردة. بالرغم من الفراخ كانت شهية في المجمل، إلا أن قطعة من القطعتين كانت تسويتها زائدة عن اللزوم، بعكس الأولى اللي كانت طرية وتتبيلتها ممتازة لدرجة أنها ما كانتش محتاجة صوص المستردة اللي كان لازم يكون على القطعة الثانية بوفرة علشان نعالج جفافها. مزيج الكينوا بالقمح والحمص يعتبر بديل ظريف وجديد عن الأرز اللي شبعنا منه، إلا أن لولا الحمص ما كانش هيكون للمزيج ده طعم نهائيًا، ونعتقد أن الموضوع كان محتاج توابل أو أي نكهة خارجية تحسن الموضوع شوية. أما الخضار السوتيه فالبروكولي مكانش فيه مشكلة ولكن الفاصوليا الخضراء ما كانتش مستوية كويس. أما الطبق الثاني فكان عبارة عن طبق ميداليون لحم بقري مع جراتان الكوسا وأرز أسمر. قطع اللحم كانت حلوة ولكن لو أنت بتحب اللحم يكون تسويته كاملة أكد عليهم لأنها بتتقدم متوسطة السواء، جراتان الكوسا كان عبارة عن قطع كوسا محشية بصوص البشاميل مع الجبنة الإمنتال والخضار، وكان طعمها رائع؛ وبالرغم من أن الموضوع يبان أنه دسم إلا أن قطع الكوسا صغيرة وبالتالي كميتها كانت مثالية. الأرز الأسمر كان هو كمان مثالي، وبالتالي نقدر نعتبر الطبق ده أفضل من اللي قبله. التجربة في المجمل كانت تغيير لطيف بعد أسابيع من الأكلات الشرقية، صحيح كان فيه ملاحظات لنا على الطبق الرئيسي الأول، إلا أن تنوع المنيو خلى فيه أطباق ثانية مميزة تخلينا نتغاضى عن العيوب.

...

أكل ماما أحلى ولا يوماميا؟ دلوقتي تقدر تطلب أكل بيتي أونلاين لرمضان من يوماميا
اصدرت في: 27/06/2016

رمضان هو شهر الإحسان والتواضع والعطاء، بس خلينا نكون صرحاء مع بعض ونقول إنه مايكملش من غير أكلة حلوة تدلع نفسك بيها، والأكلة دي أحسن حد يعملها هي "ماما" – الموضوع تطور اليومين دول مع "يوماميا" مجتمع الأكل الإلكتروني اللي بيحقق أحلام كل الأكيلة. قدر يوماميا من بدايته في مارس 2014 يقدم أوراق اعتماده كواحد من أجمد وأحلى المواقع التفاعلية اللي بتقدم طباخين من القاهرة بيعرضوا أكلهم المميز على باقي الناس – أيوه الكلام مضبوط، دلوقتي تقدروا تطلبوا أكل بيتي من على موقعهم الإلكتروني بكل سهولة. لكن كان واضح في السنتين اللي فاتوا أن يوماميا تطور، وبيقدم منيو سريعة لمدة 4 ساعات علشان تأكل أكلة ملوكي في وقت بسيط ومنيو ثانية شغالة 24 ساعة، مع منيو للأكلات المجمدة والنصف تسوية – الحد الأدنى للطلب 100 جنيه بس. الموضوع بسيط وسهل، خلونا نشرح لكم: الخطوة الأولى: اتفرج على المنيو وقاوم جوعك. الخطوة الثانية: اختار اللي نفسك فيه، بس خلي بالك أن الصيف داخل وفي بحر وفورمة مطلوبة. الخطوة الثالثة: استريح لغاية ما واحد من طباخين يوماميا يوافق على طلبك. من هنا ورايح تقدر تطلب الأكل اللي يخطر على بالك ويوصل لك لباب بيتك، والكلام ده طبعًا ممتاز في رمضان خصوصًا للناس اللي ماعندهاش وقت وعايزة تحتفل بالشهر الكريم وتستمع بأكلة حلوة. يوماميا كمان بيقدم منيو مخصوصة لرمضان بأسعار هايلة، منها أكلات نصف تسوية أو نيئة بدايًة من الشيش طاووق ومكرونة بالبشاميل لغاية السمبسوك والكبيبة. العظمة تكمل برجوع منيو الحلو مرة ثانية، وفيها هتلاقي مجموعة كبيرة ومبتكرة من الحلويات البيتي اللي تعتبر جزء لا يتجزأ من أجواء رمضان. لمعلومات أكثر عن عروض يوماميا في رمضان، من هنا.

...

6 أسباب تؤكد إن تورتينا هو الكسبان في سباق حلويات رمضان
اصدرت في: 27/06/2016

شوفنا في السنين الأخيرة سباق رهيب لتقديم أفكار جديدة لحلويات رمضان، وأصبح جزء لا يتجزأ من الأجواء الرمضانية في مصر. يمكن الوقت لسه بدري علشان نختار فائز لسباق سنة 2016 – أصل كمية أطباق الحلو الموجودة مش طبيعية يا جماعة – لكن الأكيد أن في اسم متصدر السباق لحد دلوقتي وهو: تورتينا. ووسط المنافسة الرهيبة اللي بنشوفها، أكيد يوم بعد يوم بيكون من الصعب أنك تبتكر حاجة جديدة ومختلفة، لكن عروض تورتينا الرمضانية اللي بقالها سبع سنين وتشمل كل أنواع الحلويات أكيد هي حديث المدينة – تعالوا معانا علشان تعرفوا السبب.. التعاون مع شركة Elvesلتوصيل الطلبات تورتينا السنة دي قرروا يتعاونوا مع تطبيق Elvesالمصري المتخصص في توصيل الطلبات، وبكده عشاق الحلويات اللي زينا هيوصلهم كل جديد في عالم الحلويات ويمتعونا بكل حلوياتهم الرمضانية وإحنا مستريحين في بيوتنا. عملوا خدمة استلام الطلبات لو Elves مش مناسبين بالنسبة لك – فعلًا الموضوع مخيف شوية أنا معاك – تورتينا عملوا خدمة جديدة وهي تسليم الطلبات بحيث تقدر تطلب حلوياتك قبل الوقت المطلوب وتستلمها من موظف هينتظرك خارج الفرع ومعاه طلبك وفكه كمان. يا سيدي على الجمال. اتفاقية مع أهل مصر رمضان السنة دي مش كله أكل وبذخ، تورتينا هيبترعوا بقيمة 10% من أرباحهم لجمعية أهل مصر الخيرية ضمن مبادرتهم الرمضانية. الكنافة مع تورتينا حكاية مختلفة الكنافة، يا سلام عليها، أكلة بسيطة صحيح بس خبراء الحلويات في تورتينا بيعتبروها لوحة يرسموا عليها أجمل الصور، يعني عندك كنافة تيراميسو وكيك كنافة ألاسكا وبولة كنافة Mont Blanc وغيرهم من الابتكارات المغرية. لا بجد، إيه الكنافة الرهيبة دي؟ ابدأ تورتينا بيقدم أكثر من 20 صنف حلو لرمضان، وفعلًا مافيش حد قدر يعمل مزج بين الحلويات الشرقية والغربية بالشكل الرائع ده غيرهم. لو بدأت النهاردة، ممكن تلحق تجرب صنف كل يوم – جاهز؟ علشان تعرف أكثر عن عروض رمضان من تورتينا، أدخل هنا

...

مرزوقة: أحلى سحور على عربية فول
اصدرت في: 26/06/2016

الصاحب اللي يصدقك و أنت بتحكيله أفكارك المجنونة ويدوس معاك في تنفيذها ده صاحب تحطه في خانة "صديق عمر" وأنت مغمض.. اشتري من غير ما تدوق! "عبدالرحمن وليّ الدين" شاب صاحب شركة تنظيم إيفينتات ودعم لوجيستي وتسويقي، جاتله فكرة مشروع "عربية فول" قبل رمضان بوقت ضيق نسبيًا، فقرر يطرح الفكرة على صديقه المهندس "صالح مسعود" اللي –على غير المنتظر- رحب بالفكرة جدًا وأبدى استعداده للمشاركة، وبس بقى.. واضح أن الشلة كلها كانت مجنونة كفاية أنها تقابل الفكرة بنفس الترحيب، والكفوف تضرب في بعضيها، والمشروع يطلع للنور! .. مشروع "مرزوقة".. عربية الفول اللي واقف عليها شلة مهندسين وناس أصحاب تعليم عالي من تخصصات مختلفة! تفاصيل كتيرة عدت من لحظة الفكرة لحد لحظة خروجها للنور.. هنتجاوز في حكينا كتير منها ونسيبكم تعرفوه بنفسكم من صفحة "مرزوقة" على فيسبوك.. ونروح دلوقتي للحكاية الأهم، حكاية زيارتنا لـ "مرزوقة" وقت السحور، وتجربتنا معاها، ونصايحنا ليكم لو حبيتوا تزوروها قريب. العربية موجودة في دخلة شارع متفرع من شارع 9 اللي هو أشهر وأكبر شوارع المقطم-قدام نادي مصر للتأمين بالضبط.. هتعرف الشارع من الزحمة الواضحة في دخلته، والعربيات الكتير اللي راكنة قريب منه.. دخلنا عند مرزوقة ولفت نظرنا التصميم اللطيف للعربية، وشغل الإضاءات الملعوب اللي خلى منظر العربية شيك جدًا، ولفت نظرنا كمان التيشيرتات اللي لابسها أفراد "الشلة" اللي شغالين في العربية، تيشيرتات بتصميم واحد جايبينها من نفس المكان علشان يبانوا بشكل كويس والناس تعرفهم من وسط الزحمة.. أول ما وقفنا عند العربية استقبلنا الأستاذ "سيف" المسؤول عن أخد الطلبات، اللي كان زيه زي بقية الناس اللي شغالين في مرزوقة، شخص مهذب جدًا في التعامل وروحه خفيفة وكلامه لطيف، مهندسين بقى يا جماعة! .. ولما قلناله عايزين نقعد قالنا انتو بين اختيارين: تستنوا نص ساعة لحد ما الترابيزات تفضى لأنها مشغولة كلها زي مانتو شايفين، أو تاخدوا الأكل على صينية وتتعاملوا! وطبعًا لأن الوقت كان ضيق نسبيًا قبل السحور فاحنا فَضَّلنا أننا ناخد صينيتنا المتينة ونتعامل.. وفعلًا عملنا كده.. طلبنا طبقين فول واحد اسكندراني (10 جنيه) وواحد بالزيت الحار (8 جنيه) وطبق بطاطس (5 جنيه) وطبق جبنة (5 جنيه) وطبق باذنجان (3 جنيه) وطبق بيض (5 جنيه).. وزي ما أنتم شايفين الأسعار في اللذيذ جدًا، خصوصًا لما تشوفوا الجودة المحترمة اللي معمول بيها الأكل، والنضافة الشديدة في تحضيره.. وبخصوص موضوع النضافة ده نحب نحكيلكم موقف لطيف جدًا حصل قدام عينينا.. احنا وصلنا في وقت متأخر نسبيًا والمكان كان زحمة جدًا، وبالتالي الناس كانوا متسربعين شويتين في العمايل، واحد من الشباب كان شايل كيس فيه الأطباق الفويل اللي بيتقدم فيها الأكل، ومن استعجاله الكيس اتقطع فشوية أطباق وقعوا منه على الأرض، قام واخد الأطباق اللي وقعت وفصلها عن بقية الأطباق، وطبقها ورماها علشان ماحدش يستخدمها.. الموقف حصل صدفة قدامنا وكان فاتح شهية لينا قبل مانشوف الأكل إيه ظروفه.. ده لأنه أكدلنا أد إيه فعلًا العقلية بتفرق، وحسسنا أد إيه الناس دول مركزين أنهم فعلًا يخدموا زباينهم بشكل محترم وجيد ويحافظوا عليهم.. المهم.. وقفنا حوالي تلت ساعة عقبال ما الأكل جالنا من الزحمة، وأخدنا الصينية وقعدنا في مكان على جنب في الشارع، والحقيقة -علشان نبعد عن المبالغات الفاضية يعني- أنه الأكل ماكانش أعظم حاجة في الكون يعني واللي هو طعم ماحصلش.. لكن كنا بناكل حاجة بطعم وريحة الأكل البيتي، وحاجة مضمون نضافتها كمان إلى أبعد الحدود.. لكن مايفوتناش نقول أن البطاطس كانت متحضرة بطريقة عظيمة جدًا ومرشوش على وشها رشة ملح وتوابل خلت طعمها حكاية، ومايفوتناش برضه نقول أنه الأكل رغم تحضيره السريع إلا أنه كان خفيف جدًا وماحسيناش أبدًا بالتقل أو قفلة المعدة.. ونحب نقول برضه أنه الجبنة القديمة بالطماطم كان طعمها جميل جدًا إلا أنها كانت حادقة بزيادة وده مش كويس لو حطينا في اعتبارنا أننا بنبقى داخلين على يوم صيام طويل مافيهوش شرب مية طول النهار. بعد ما خلصنا أكل قدمنا كام مقترح كده لـ "سيف".. أنهم يفكروا يحطوا "Name Tag" على ملابس العاملين علشان نعرف نتواصل مع اللي بنطلب منه بشكل أفضل، وطلبنا كمان أنهم يحاولوا يحطوا حنفية أو على الأقل مناديل أو وايبس علشان احترنا في مكان نغسل فيه إيدينا بعد الأكل، ولو في معالق بلاستيك للسلطة وللا حاجة يبقى فل أوي، وقلنا كمان أنه لو زودنا على ديكور العربية زينة رمضان وحطينا سماعتين وراها شغلنا عليهم شوية أغاني رمضانية.. أكيد ده هيخلي الموضوع يطلع السما أكتر ماهو!

...

شاهد المزيد
مواضيع خاصة

كل اللي محتاج تعرفه عن الخط الجديد لمترو الأنفاق

"زحمة يا كايرو زحمة، زحمة وتاهو الحبايب.." .. على الله بس ربنا يكرم كده والدنيا تروق والحبايب مايفضلوش طول العمر تايهين، علشان نلحق نعيش لنا يومين مبسوطين.. ولا إيه؟ وا