مطاعم
-
-
رأفت: ساندويتش له تاريخ في مصر الجديدة
-
سيريانا: مطعم على قد حاله في الدقي
فضلنا سنين طويلة نسمع عن شكوى القاهريين من نقص مطاعم القاهرة اللى بـ تقدم بيتزا جامدة واستحملنا كلنا مطاعم مش عارفة تفرق أصلاً بين عجينة البيتزا وعجينة العيش. دلوقت نقدر نقول لك المشكلة اتحلت؛ سلسلة المطاعم العالمية روسو بومودورو Rossopomodoro، وصلت من نابولى –بعد أكثر من 120 فرع حول العالم– علشان تنقذنا. فكرنا شوية كده، طالما ده مطعم إيطالى فتح فى داون تاون القطامية، وكمان من نابولى المعروفة بأنها موطن البيتزا الإيطالية، يبقى أكيد هـ يقدم بيتزا حلوة؛ ولحسن الحظ، إحساسنا كان فى محله. تجربة الأكل الأنيقة فى روسو بومودورو بدأت بديكوراته من الخشب باللون الأبيض، كتابات متعددة على الحائط ومطبخ مفتوح على المطعم بطريقة لطيفة. المكان مش وهمى يعنى، بس الأكل عند روسو بومودورو هو أقرب حاجة ممكنة للأكل فى نابولى نفسها. جاء لنا حالة من خيبة الأمل أول ربع ساعة، والسبب كان الأسعار المكتوبة بخط اليد على المنيو ولبس الجرسونات اللى شبه ملابس مضيفين الطائرات فى الخمسينيات. عمومًا المنيو شدت انتباهنا وأخذنا وقت شوية علشان نقدر نحدد طلبنا، قبل ما نجرب البيتزا؛ مارجريتا (49 جنيه)، فور تشيز (59 جنيه) وفيجيتيريان (53 جنيه). بيتزا المارجريتا كانت رائعة؛ السطح الخارجى كان طري مع قرمشة خفيفة والعجينة نفسها طعمها كان روعة ومافيهاش طعم الدقيق. صوص الطماطم كان واضح فيه قد إيه الطماطم طازجة وطعمها مسكر بشكل جميل، والموتزاريلا كانت دسمة. بشكل عام، تتبيلة البيتزا كانت روعة مع طعم مملح بسيط ومش مزيتة خالص. بيتزا فور تشيز كانت عبارة عن جبن كاتشوكافالو، وموتزاريلا بقرى، وجبن ريكفورد وجبن بروفولونى المدخن، ونكهاتها كانت متوازنة بحيث طعم الجبن القوى ما يغطيش على البيتزا نفسها. الفيجيتريان بيتزا كان عليها باذنجان طازج، وكوسة، وفلفل أحمر وأصفر، وجبن بارميزان وريحان، وبرضه كان فيها نفس توازن النكهات. طبعًا يبقى تهريج لو زورنا مطعم إيطالى وما جربناش مكرونة من عنده، وعلشان كده طلبنا بينيتا (52 جنيه). الطبق ده بـ يُقدم مع طماطم شيري، وباذنجان مقلى، وكوسة وجبن Pecorino، وطعمه كان رائع زى البيتزا. كل مكونات الطبق كانت طازجة وشهية، بس كمية الخضروات والجبن كانت قليلة شوية. بالنسبة للحلو، اشتركنا فى ثلاث قطع لذيذة من Calde Calde بسعر 15 جنيه، وكانت عبارة عن عجينة بيتزا مقلية عليها شوكولاتة نوتيلا وسكر فانيليا. الطعم المالح للعجينة كان عامل تناقض جميل مع الإضافات المسكرة، ويعتبر اختيار رائع بالنسبة لعشاق الشوكولاتة. بعيد عن مستوى الخدمة الغريب –الجرسونات كانوا على راحتهم بزيادة فى التعامل مع الزبائن– نقدر نقول أن أكل روسو بومودورو يغطى على أى عيوب.
...
"ابن حميدو".. أيقونة إسماعيل ياسين الخالدة، "نورماندي تو" و"كلمتي مش هـ تنزل الأرض أبدًا" و"الباز أفندي" و"فتشني فتش" وفتحة صدر أحمد رمزي ودلع هند رستم!.. المطعم ما اكتفاش بالاسم المحبوب وبس، لكن رسم على جدرانه الداخلية بورتريهات بالحجم الطبيعي لأبطال الفيلم في مشاهد كثيرة، بجانب استخدام الإكسسوارات التقليدية لمطاعم الأسماك من شعب مرجانية وهياكل أسماك وشبكات صيد وغيره. مطعم «ابن حميدو» له شخصية مميزة قدر يفرضها علينا من أول ما دخلنا المكان. الفرع الرئيسي موجود في شارع بورسعيد في حي السيدة زينب، منطقة مشهورة بشركات النقل وتحميل البضائع والمعلمين والتجار الكبار، حيوية وزحمة جدًا ولها طابع شعبي واضح، علشان كده كنا محظوظين أننا نلاقي ركنة للعربية أمام المحل مباشرة وسط كل موتوسيكلات الدليڤري الخاصة بالمحل، وطلعنا للدور العلوي اللي فيه صالة الطعام الكبيرة "حوالي 20 ترابيزة" بعد ما عدينا ألقينا نظرة على ثلاجة العرض اللي في الدور الأول وفيها كميات مهولة من السمك والجمبري والكابوريا. المطعم متخصص جدًا ومش بـ يعمل أي اختراعات بجانب السي فوود، من أول الشوربة لحد البكلويز وطواجن السبيط وسمك السهلية، أسعاره معقولة وده بـ يفسر لنا الإقبال الشديد اللي لاحظناه وقت زيارتنا، ده غير الترابيزات اللي كان عليها لافتة بـ تقول "محجوز". يعني ممكن تأكل وجبة فيها سمك مقلي وجمبري وأرز وسلاطات وتدفع 40 أو 50 جنيه، لكن الجمبري بالحجم الكبير والأستاكوزا وبعض أصناف السمك سعرها بـ يتغير حسب اليوم، وبـ تبدأ أسعارها من 100 جنيه للكيلو وأنت طالع. شوربة ابن حميدو المخلية (30 جنيه) حجمها كبير وتكفي فردين قبل الأكل "علشان ما تشبعش قوي" وطعمها غير عادي وملحها وقوامها مضبوطين. أي نوع سلاطة بـ 4 جنيه ماعدا التونة بـ 15 جنيه وكوكتيل الجمبري بـ 25 جنيه. بعد الشوربة قعدنا ننأنأ في السلاطة الخضراء وبابا غنوج بالعيش المحمص، وما فاتش وقت كثير قبل ما ينزل أمامنا أجمل طبق جمبري مشوي بالخلطة الإسكندراني بالطماطم والبطاطس والبصل (الكيلو بـ 190 جنيه للحجم الكبير) وطلبنا سمكة قاروص تتعمل سنجاري (الكيلو 100 جنيه) ودي تأخرت شوية على ما نزلت، وبدل الأرز طلبنا مكرونة سباجيتي بالكريمة والسي فوود (20 جنيه) وبدأنا وجبتنا الرائعة. الأكل مافيهوش غلطة، كل حاجة مخدومة كويس جدًا والجمبري فريش "بـ تعرفه لما تيجي تقشره وتلاقي القشرة بـ تذوب في إيدك" والسمكة السنجاري العملاقة كان عليها خلطة ممتازة من الجزر والطماطم والبطاطس والتوابل "تقريبًا نفس خلطة الجمبري" والمكرونة بالسي فوود دي ممكن تيجي لها هنا مخصوص وتستمتع بها بدون ما تطلب أي حاجة ثانية، طعمها خطير وسعرها على القد. ما كانش فيه مكان على ترابيزتنا للطواجن اللي أسعارها بين 25 و35 جنيه، لكن شوفناها على ترابيزات حولنا وعجبنا شكلها والكميات اللي فيها، وبما أن الصنعة هنا حلوة وجربناها في المشوي والمقلي، أكيد في المسبك كمان هـ تبقى جامدة. وبعد الأكل جربنا عصير ليمون بالصودا والنعناع (6 جنيه) "زي الصن شاين في الكافيهات" مناسب جدًا بعد أكلة السمك، لكن مافيش منيو حلويات هنا، مشروبات باردة وساخنة بس. «ابن حميدو» مطعم أسماك زي الكتاب ما بـ يقول، قعدته حلوة وأكله أحلى، نظيف وشيك والخدمة فيه محترفة، دي خلاصة تجربتنا في فرع السيدة زينب.
...
أجمل حاجة في المحل ده أن شكله من الخارج مالوش علاقة باسمه خالص! يعني كلمة "عكاوي" اللي على اليافطة من بره مكتوبة باللون البرتقالي وبخط فانكي جدًا والمحل نفسه حجمه صغير وشكله أقرب لمحلات الكريب اللي انتشرت قوي في الفترة الأخيرة، وكان غريب أننا نلاقي مطعم بـ يقدم أكلات مصرية شعبية وطواجن في المنطقة دي بالذات اللي اشتهرت بالكافيهات والمطاعم الإيطالية والأمريكية. شارع أنقرة في مساكن شيراتون بقى واحد من أهم شوارع الخروج والأكل في مصر الجديدة بعد ما فتح فيه كل أنواع المطاعم وبقى مقصد كثير من الشباب والعائلات خاصة لو ما لاقوش اللي هم عاوزينه في ساحة طعام أواسيس اللي على أول الشارع. مطعم «عكاوي» متخصص في الأكلات المصرية، أكل بيتي وطواجن لحوم وخضار وفراخ محمرة ومكرونة بالبشاميل وفتة بالخل والثوم وشوربة كوارع وحواوشي وممبار وعكاوي طبعًا وما إلى ذلك من المطبخ المصري الأصيل. رغم المنيو المشجع إلا أن السكون اللي بـ يخيم على المحل وعدم وجود زبائن فيه وقت زيارتنا سبب لنا بعض القلق لأن عادة المحلات من النوع ده بـ يبقى الإقبال عليها مش عادي، لكن فسرنا ده أننا كنا خارجين من أجازة طويلة والناس قاعدة في بيوتها علشان الامتحانات قربت. دخلنا المحل الصغير اللي فيه 4 ترابيزات بالضبط ومافيش أي ديكور يذكر، ولا حتى شاشات تليفزيون، لكن فيه حمام صغير لحسن الحظ، والمطبخ في عمق المحل ممكن تختلس النظر من وراء الباب الخشبي وتشوف إيه اللي بـ يجرى بالداخل، خاصة أن الأكل المصري مغري أنك تعرف تفاصيله والقائم على صنعته. نوعنا في اختياراتنا على قد ما قدرنا فطلبنا طاجن لحم بالبصل (35 جنيه) وطبق فتة بالسجق (25 جنيه) ورغيف حواوشي بالجبنة الموتزاريلا الكومبو (28 جنيه) وأطباق من المقبلات زي البطاطس المحمرة (5 جنيه) وسلاطات الطماطم والطحينة والزبادي (4 جنيه). الجرسون تقريبًا رشح لنا كل حاجة في المنيو على أنها أحلى حاجة عندهم علشان كده قررنا نعتمد على نفسنا ونختار وبالتالى أخذنا وقت على ما حددنا أطباقنا، وكان نفسنا نجرب حاجات ثانية زي الملوخية (15 جنيه) وورقة اللحمة (38 جنيه) أو الأرز المعمر باللحم (18 جنيه) أو الممبار (25 جنيه)، أنتم عارفين المطبخ المصري مغري إزاي! بعد انتظار دام حوالي 40 دقيقة نزل الأكل أمامنا، كله بـ يُقدم في طواجن فخار حتى البطاطس المحمرة والسلاطة، الطعم حلو مافيش كلام وبيتي بجد، طاجن اللحم بالبصل كان مليان بصل مفروم وطعم السمن البلدي باين فيه، واللحم نفسه أحمر بدون أي دهون، والفتة بالسجق بالأرز بالشعرية والعيش المحمص كانت ممتازة وغنية بالطعم، حتى سلاطة الزبادي كانت كأنها معمولة حالاً في مطبخ بيتك، يمكن الحواوشي بس هو اللي فكرنا بأكل الشارع وأننا بـ نأكل بره البيت، لكن كان حلو ومقرمش برضه لكن إضافة الجبن عليه ما كانش لها أي معنى، لأنها كانت قليلة جدًا. وجبتنا في «عكاوي» كانت دسمة جدًا، وشبعتنا جدًا، الكميات هنا كبيرة والطاجن بـ يُقدم مخدوم والسمن البلدي كفيلة أنها تحسسك بالشبع بعد أول لقمتين. ده بالنسبة للأكل والمذاق، لكن بالنسبة للخدمة ومستوى العناية بالمحل فهم لسه ناقصهم كثير، المكان محتاج نظافة وتطهير من الحشرات الصغيرة الموجودة في كل مكان، ولأن المحل جديد "بقاله شهرين تقريبًا" فواضح أن لسه ما حدش علق على الجزئية دي، لكن إحنا بـ ننبههم للموضوع ده اللي ممكن يبقى سبب في أن الزبائن تقاطع المكان، وحرام تضيع مجهودات الشيف الشاطر اللي هنا بسبب العناية البسيطة بأبجديات النظافة. التأخير اللي حصل في تجهيز الأكل كان بسبب قلة العاملين، لكن دي حاجة هـ تتحل قريب زي ما قالوا لنا. جرب «عكاوي» وقول لنا رأيك، وعلى فكرة هو الوحيد من نوعه في مساكن شيراتون ويمكن في مصر الجديدة كلها.
...
مصر دائمًا وطن ثاني لأي حد في العالم وبالرغم من ظروفنا الاقتصادية اللي على قدنا إلا أننا بـ نرحب بأي حد اضطرته الظروف أنه يهاجر ويسيب وطنه من أول أخواننا الفلسطينيين والعراقيين وأخيرًا أخواننا السوريين، ربنا يفك كربهم وكرب كل مستضعف في الأرض. أهل الشام ساعات بـ يُقال عليهم الأحرار وتاريخهم معروف بالنضال، أهل الشام لما نوروا مصر ما رضيوش يقعدوا من غير شغل إلا أن المقتدر منهم ومتوسط الحال قرر أنه يفتح مشروع خاص به ويضربوا لنا مثال على مقولة بـ تقول "الرزق على الله" وبدأنا نشوف محلات ومشروعات أصحابها سوريين ملت القاهرة وضواحيها إلا أن كان أبرزهم المطاعم السورية اللي كانت موجودة في القاهرة، لكن بعد أحداث الثورة السورية وهجرة عدد كبير من السوريين على مصر محلات الأكل السوري زادت بنسبة كبيرة في القاهرة وفي بعض المحافظات بصورة أقل شوية. النهارده هـ نكلمكم عن شوية من المطاعم السورية والشامية اللي زرناها في الفترة اللي فاتت وفيه منها اللي فاجئنا بجودة "تأخذ العقل" باللهجة الشامية وفيه منها اللي كان في المستوى العادي، "صحتين" وما تتقلوش علشان الصحة تبقى دائمًا في الطالع. فرح يعتبر واحد من أول المطاعم اللي بـ تقدم فتة سوري بالشاورما وساندويتشات أكل سوري زي الشاورما والكبيبة والفلافل بالحمص وغيره، و"فرح" ببساطة مكان في الشارع في شارع جامعة الدول العربية لكن ما شاء الله الإقبال عليه قوي وتأثر بصور صغيرة من موجة المطاعم السوري اللي خلته يحسن من مستوى أكلاته، زوروه وقولوا لنا إيه الأخبار دلوقت؟ أبو عمار في 19 شارع إبراهيم في منطقة الكوربة بمصر الجديدة هـ يلفت نظركم يافطة محل أبو عمار السوري اللي بـ يقدم أكلات سورية وساندويتشات سورية في العيش البوري والفرنساوي والسوري، لكن المساحة الداخلية بتاعته صغيرة شوية بالرغم من وجود دورين إلا أن بالمقارنة مع فرع المهندسين في شارع سوريا المكان صغير قوي، بس ما ننكرش أننا قضينا وقت لطيف هناك مع أكل سوري مضبوط، لو جربتوا أي فرع من الاثنين قولوا لنا لسه فيه ثبات في المستوى ولا إيه؟ شاورما الريم يمكن الاسم يخدعكم وتفتكروا أن محل الريم متخصص شاورما بس، لكن ده مش صح المحل متخصص في الأكلات والمقبلات الشامية، المحل عنده اختراع اسمه الشابرجر وده عبارة عن برجر بتتبيلة الشاورما وفيه كمان كفتة الشاورما وبـ يقدم وجبات للأطفال بالإضافة للمقبلات الشامية زي السمبوسك اللي وقت ما جربناها للأسف كانت مزيتة لكن نتمنى أن المحل يكون غير من ده وصلحوا النقطة دي، زوروا شاورما الريم أو أقرب فرع لكم وخصوصًا أن له فروع في مصر الجديدة (توصيل فقط) والمهندسين. منقوشة المناقيش تقدروا تقولوا حاجة زي الـSnacks لطيفة مش ثقيلة وما تلكمش، مطعم منقوشة في شارع الثمار من شارع البطل أحمد عبد العزيز في المهندسين قدم لنا المناقيش زي ما الكتاب بـ يقول (كتاب إيه؟!) وتعتبر من المرات القليلة اللي نقابل فيها أكلة بـ تُقدم لنا زي ما هو مكتوب وصفها في المنيو، كمان المحل بـ يقدم مناقيش حلوة بالشوكولاتة غير طبعًا الخدمة المتميزة اللي تقدر تفهم بسرعة ونظافة المكان، لو الزحمة خنقاكم في المهندسين عدوا على "منقوشة" وممكن تفكوا شوية. الركن الشامي ليه فيه معتقد أنك علشان تأكل أكل لذيذ ومضبوط يبقى لازم تدفع كثير؟ السؤال ده كان بـ ينرفزنا مع أن فيه أماكن بـ تقدم أكل لذيذ وفي نفس الوقت سعره حلو، من الأماكن دي الركن الشامي في شارع النزهة في هليوبوليس اللي بـ يقدم ساندويتشات سوري زي البطاطس والفلافل والشاورما والحمص مع أطباق جانبية ومقبلات زي السمبوسك والكبيبة وورق العنب المحشي. دوميرا تعرفوا أن نفس المطعم بنفس كل حاجة في إسكندرية لكن له اسم ثاني "طربوش"؟ هل ده له علاقة بالتسويق أو الضرائب؟ ما علينا، المطعم بـ يقدم بجانب الأكل السوري أكلات خليجية وبيتزا إيطالي وساندويتشات سي فوود وغيرها، فيه مثل بـ يقول "صاحب بالين كداب" بس دوميرا صاحب بالين لكن مش كداب، يعني الأكل الخليجي 10/ 10 والأكل السوري 10/10 وكمان عندهم حلويات وعصائر فريش حلوة مع خدمة كويسة من جرسون مركز جدًا، جربوا كده وشوفوا المثل الشعبي تمام ولا غلط. العودة حقيقي مصر بلد مختلفة ودائمًا محتوية لثقافات متعددة وأي حد غريب عنها كأنه في بلده بالضبط والفلسطينيين والسوريين من الناس اللي منورانا في القاهرة وفي بقية بر مصر، مطعم "العودة" أول مطعم فلسطيني نزوره وقدرنا من خلاله نعرف الفروق اللي مش كبيرة بين المطبخ السوري والفلسطيني كمان أسعاره مش غالية وفي شارع عبد الحكيم الرفاعي الهادي قوي في مدينة نصر، يعني هـ تستمتعوا بالأكل والهدوء اللي كلنا بـ نفتقدهم. تشوروس & مور الحلويات الشامي مالهاش حل بس عاوزين نقول لكم حاجة ممكن تصدمكم شوية أن أغلب الحلويات الشامية جاية من تركيا ودول ثانية وحاجات مش كثيرة اللي أصلها شامي شامي، في مول العرب جانب بوابةG هـ تلاقوا زي كشك صغير مكتوب عليه Churros & More، طلعت التشوروس دي شبه بلح الشام لكنها حلويات أسبانية (شوف إزاي؟) بس كان طعمها يجنن وتقدروا تختاروا إيه الحشو اللي أنتم عاوزينه بداخلها (شوكولاتة أو كراميل) وبحجمين كبير وصغير كمان المكان بـ يقدم أصناف مالحة زي المعجنات السورية وكمان مشروبات سوري برضه، مكان لطيف جدًا وبدل ما تقفوا في زحمة الـ Food Court ممكن تستمتعوا بحلويات وحوادق ومشروبات Churros & More. بيسترو زيتونة اللبناني سواء كنتم عاوزين تقضوا وقت 5 نجوم أو مع شخص خاص عليكم، الأكيد أنكم هـ تقضوا وقت لطيف في بيسترو زيتونة في فيرمونت النايل سيتي اللي بـ يقدم أكلات لبنانية أصيلة مع ديكور تحفة يليق بالمكان اللي موجود فيه (فيرمونت النايل سيتي) وخدمة برضه مميزة.
...
مش باين قوي وسط المحلات الكثير المنورة في تقاطع شارعي النصر واللاسلكي في المعادي الجديدة، ولازم تنزل له 4 درجات سلم علشان تدخل المحل. مطعم «زنجر» موجود أمام ألبان المالكي اللي من علامات الشارع المميزة، وجنب محل فطائر «تيبيستي». المكان من الداخل كبير وفيه عدد من الترابيزات لو عاوز تأكل داخل المحل، لكن أغلب الناس بـ تأخذ طلباتها تيك آواي وفيه توصيل طلبات للمنازل اللي هو أساس شغل المطعم. وممكن تأخذ كام ساندويتش وتقف تأكل أمام المحل في عربيتك. أول ما تشوف كلمة «زنجر» على المحل أكيد هـ تتوقع دجاج مقرمش بالخلطة السرية زي بتاع كنتاكي، لكن هنا مافيش خلطة سرية، ولا فيه دجاج أصلًا، فيه كبدة ومخ وجمبري وسمك فيليه وسبيط مقرمش وكل حاجة لكن مافيش حاجة "زنجر" زي ما إحنا فاهمين. ومع ذلك قولنا نجرب، ودخلنا أخذنا مكان على أحد الترابيزات وطلبنا وجبة "زنجر" برضه اللي بـ 20 جنيه وبـ يبقى فيها أرز وبطاطس محمرة وسلاطات بجانب اختيارك من الكبدة او الجمبري أو السمك، إحنا أخذنا وجبة جمبري مقلي، وطلبنا طبق مشكل من الكبدة والمخ (الكيلو 120 جنيه). أجمل حاجة السرعة في الأداء، 5 دقائق وكل الأكل كان أمامنا وتشكيلة رائعة من السلاطات والباذنجان والخيار المخلل وسلاطة الكبدة. الكمية في الوجبة كويسة جدًا بالنسبة لمبلغ الـ 20 جنيه، والجمبري كان متوسط الحجم أو أقل من المتوسط شوية وكان مرشوش عليه خلطة من التوابل والكمون خلت طعمه مميز بس ما كانش فيه أي حاجة سبايسي في الأكل علشان كده كانوا حاطين لنا قرن فلفل أخضر حار على وش كل طبق علشان اللي عاوز يولع الدنيا. الأرز كان فريش ومفلفل على غير العادة في المطاعم اللي بـ تعمل وجبات بأسعار قليلة. الكبدة والمخ هنا أحسن حاجة ممكن تطلبها من المحل، مُقطعين رقيق قوي ومقرمشين ومش هـ تحس بطعم الزيت أو القلي. والميزان هنا كريم والكيلو بخيره، مع سلاطة الكبدة والطحينة هـ تستمتع بوجبتك مافيش كلام. ممكن تشتري جمبري بالكيلو (الحجم الكبير 140 جنيه) أو (الوسط 110 جنيه) وممكن تشتري أرز بالجمبري (16 جنيه) أو ساندويتشات سبيط أو فيليه (11 جنيه) ونضمن لك أنك مش هـ تقف كثير لحد ما تأخذ طلبك، كله في الإنجاز والطعم كويس وطريقة تقديم الأكل جيدة وفيه عناية بالنظافة وبالخدمة كمان داخل المحل. جرب كبدة ومخ من مكان غير "الشراقوة" اللي مسيطرين على السوق، وأكيد هـ تحب أكلات «زنجر» اللي مش اسم على مسمى زي ما قولنا.
...
ساندويتشات الكبدة والسجق أفضل مكان لها أنك تأكله من على عربية كبدة وسجق لكن مستوى النظافة في العربيات دي يقلق شوية، بس الكلام ده مش مع معدة الشعب المصري العظيم اللي تقدر تهضم الزلط (ما شاء الله)، في الوقت اللي إحنا عمالين ندور فيه على مطاعم جديدة لفت نظرنا إعلان مطعم على الفيسبوك اسمه "إسكندراني" وبـ يقول شعاره أنه بـ يقدم "أكبر ساندويتش كبدة في مصر"، كمان أنه بـ ينظم مسابقة لأكثر واحد يأكل أكبر عدد من الساندويتش ده هـ يفوز بموبايل سامسونج جلاكسي ميني 2 (هـ تكون آخر جولاتها يوم 1 – 5 – 2013)، تعالوا نشوف الكلام بجد ولا إيه؟ في مدينة نصر في شارع محمد حسنين هيكل المتفرع من شارع عباس العقاد خلف الجامعة العمالية هـ تلاقوا مطعم إسكندراني اللي له سلالم صغيرة ويافطة كبيرة باللون البرتقالي وعليها لوجو المطعم وفلفلتين شطة لونهم أحمر، أول ما تدخلوا هـ تلاقوا ترابيزتين على اليمين وثلاث ترابيزات أمام الباب والكاشير بجانبهم، الديكور بسيط خالص باللون البيج والأخضر على الحوائط وكان فيه أغاني سامي يوسف شغالة بصوت معقول. بصينا على المنيو الصغيرة اللطيفة اللي مقسمة إلى ساندويتشات الكبدة والسدق (السجق) والسدق بالصلصة (السجق برضه)، وفيه قسم الأطباق اللي بـ يحتوي على أطباق مكرونة بالكبدة الإسكندراني ومكرونة بالسدق الإسكندراني ومكرونة بالصوص الإسكندراني، وفيه الطلبات اللي عبارة عن طبق كبدة (14 جنيه) مكون من 250 جرام كبده مع خبز شامي وليمون، وطبق السدق (25 جنيه) بـ يتكون من 250 جرام سجق بالبصل والفلفل الأخضر والطماطم مع خبز شامي، كمان فيه الأصناف الجانبية زي المخلل (2 جنيه) أو البطاطس المقلية (6 جنيه) أو علبة طحينة (2 جنيه) وغيره. من المنيو اللطيفة دي على طول فكرنا في اللي إحنا جايين علشانه.. أكبر ساندويتش في مصر، اختارنا ساندويتش كبدة الجمرك كبير (20 جنيه) وساندويتش سدق مشوي الجمرك (28 جنيه) وكلمة الجمرك معناها أن الساندويتش بـ ييجي مع الطحينة والبطاطس وفي حالة السجق المشوي بـ يكون مع الفلفل والطماطم والبصل، الطلب أخذ وقت حوالي نصف ساعة لكن بسبب أن ما كانش فيه عدد كبير في المكان قدرنا نستنتج أنهم بـ يعملوا أكل بكمية قليلة لكن لو كان هـ ييجي سخن ومضبوط يبقى تمام. وصل أكبر ساندويتشين في مصر مع 3 ليمونات مقطعين أنصاف، الكبدة الجمرك كانت جامدة عليها طحينة مش قليلة وبطاطس محمرة كويس على الوش، الخبز كان طري ويذوب في الفم وقولنا نعصر ليمون على الكبدة ونجرب لكن الصراحة طعمها يستحق تجربوه، أما السجق المشوي كان كويس جدًا الفلفل والطماطم والبصل مع الكمية المعقولة من الطحينة أعطت له طعم لذيذ قوي غير البطاطس المحمرة، بس تجربة الليمون المرة دي ما كانتش قوي، كمان طلبنا 2 مشروب غازي (2.5 جنيه للواحد). كنا حابين نجرب أطباق إسكندراني زي طبق مكرونة بالسدق الإسكندراني الأنفوشي (20 جنيه) لكن أكبر ساندويتش في مصر بجد كان قفل أمامنا الاختيار ده، لكن المرة الجاية أكيد هـ يكون لهم نصيب في التجربة بتاعتنا، بالتوفيق لكل المشاركين في المسابقة.. "ربنا معاكم" يا وحوش.
...
كل فترة –مؤخرًا- بقينا نسمع عن افتتاح مكان أو "ساحة" كبيرة للمطاعم والكافيهات فى كذا مكان، وأكثر منطقة بـ تشهد الافتتاحات المتتالية دي هى الشيخ زايد، بداية من "أركان مول"، ثم "أمريكانا بلازا" المشهورة بسينما IMAX ثم بعدها "تيفولى دوم زايد" اللى تعتبر ثالث فرع لسلسلة كبيرة من ساحات الطعام تحت اسم "تيفولي دوم - Tivoli Dome". "تيفولي" من الأماكن المحببة لقلوبنا جدًا، مش بس علشان القعدات اللى فى الهواء الطلق ولا شكل المباني غير التقليدي ولا الخدمة والنظافة فوق الممتازين، لأ كمان علشان الإحساس الاستثنائي بالراحة والجمال اللى بـ تحس بهم هناك، لو أنت مضغوط ومحتاج تفصل "فيشة دماغك" شوية ده المكان المناسب لك. الفرع الأول "تيفولى دوم" هليوبوليس افتتح فى سبتمبر 2009 على مساحة 5700 متر مربع، تلاها فرع ثاني فى الساحل الشمالى داخل "مارينا"، ثم ثالث فرع فى الشيخ زايد تم افتتاحه فى بداية عام 2013، والى إحنا عرفناه كمان أن هـ يكون فيه "المعادي دوم" أو "تيفولى المعادي" بعدها فى القاهرة الجديدة وكمان الإسكندرية ويليها سلسلة خارج مصر فى أبو ظبي وقبرص ولبنان والمغرب ليصل عددها إلى 15 مجمع داخل وخارج مصر، ده غير "Tivoli Dome House" اللى هـ يكون فى الطريق الصحراوي بين مصر وإسكندرية. اللى زاد من شهرة "تيفولى" في بدايته بعد افتتاح فرع هليوبوليس دخوله موسوعة جينيس عام 2010 لاعتبارها أكبر ساحة مخصصة للمطاعم والكافيهات في العالم بـ تهدف لتقديم خدمة متميزة لصفوة مجتمع مصر الراقي وإتاحة الفرصة لهم للاستمتاع بمكان له طابع اجتماعي فريد، إلى جانب أن كل الفروع بها منطقة مفتوحة للعب الأطفال بـ يتم الإشراف عليهم ورعايتهم فيها فى غياب الآباء. تيفولى دوم هليوبوليس فيه مستويين، أماكن الجلوس هناك أغلبها فى مكان مفتوح، وفيه مساحات خضراء ونافورات ومساحات مياه (بحيرات) بعضها كبير والآخر صغير خاصة فى فرع زايد، وفيه هناك 16 مطعم وكافيه عالميين منهم: ملك الستيك والمشويات Outback، وChili's، وThe Noodle House، وMori Sushi، وCrave، وPascucci، وBurger King، وStarbucks، وCoffeeshop company، وCilantro، وBeans, Pies and Cookies. أما تيفولى الشيخ زايد مازال فيه بعض المطاعم تحت الإنشاء، ومن الأماكن اللى تم افتتاحها: بوتري كافيه، وفيه هناك كذا مطعم لبنانى هم: كافيه بلان، وبيسترو تمارا اللبنانى، وزين، ومن الإيطالي لا بيتزا أل فورنو، وكارينوز.. وغيرها، والفرع هناك بـ يتميز وجود مصلى وحمامات فى دور تحت الأرض وماكينات السحب الآلى ATM لكذا بنك، إلى جانب وجود ساحة جراج ضخمة مجانًا فى فرعي هليوبوليس وزايد. من الحاجات اللى بـ تميز سلسلة "تيفولي" كمان وجود شاشة عملاقة تعد أكبر شاشة عرض في مصر موصلة بشبكة أمريكية بـ تقدم بث مباشر للموسيقى والفيديو كليب وبـ تعرض مباشرة كل مباريات كرة القدم العالمية والمحلية ويقدر كل رواد المطاعم مشاهدتها من أماكن جلوسهم. على الموقع الرسمي ممكن تعرف معلومات أكثر عن تيفولى ومشروعاتها الثانية زي: مجلة تيفولى اللى ممكن تلاقيها فى ستاندات هناك بـ توزع مجانًا عند زيارتك للمكان، وكمان عندهم TV Channel وراديو بث حي من الولايات، المتحدة ولعبة عاملينها شبه "المونوبولي" باسم Tivoli Game.
...
المطاعم الهندى فى القاهرة يوم عن الثانى بـ تبقى حاجة مألوفة، مع التطور الحاصل على ساحة الأكل المصرى، ومع التطور بـ يحصل رقى فى الذوق العام وده بـ يحتاج تقديم أعلى جودة أكل ممكنة. كل واحد فينا له أماكنه المفضلة ومستحيل تقدر تختار أحسن مكان تصرف فيه فلوسك اللى تعبت فيها علشان تعيش تجربة طعام لذيذة. وزى عادتنا فى كايرو 360 لفينا القاهرة من شرقها لغربها علشان نعرفك على مطاعم هندى تستحق التجربة. آسيا هاوس – Asia House رغم أنه قريب أكثر لمطاعم الشرق الأوسط عن الهندى، آسيا هاوس قدر يثبت أنه واحد من المطاعم المحبوبة فى فندق شيبرد، رغم أن وجبة من ثلاثة مكونات هـ تكلفك فلوس جامدة، بس الموضوع يستاهل، علشان طباخين آسيا هاوس عارفين شغلهم كويس. الموضوع مش بس مجهودهم فى ابتكار أصناف مميزة من الصوص، دول كمان عارفين إزاى يتعاملوا صح مع اللحم، ودى مشكلة بـ تقع فيها كثير من المطاعم الهندى فى القاهرة. آشاز – Asha's مع ديكوراته الأنيقة، وطلته على النيل من موقعه المميز على كورنيش الجيزة، آشاز Asha's يتصنف ما بين مطاعم الفنادق والمطاعم الفخمة. المطعم أصلاً فرع من سلسلة خاصة بالمغنية والطباخة أشا بوسل، وهى اللى عملت كل الأطباق الموجودة بنفسها. رغم أنه برضه بـ يعانى من التناقض، بس الحلو حلو مافيش كلام. أشاز يعتبر أغلى شوية من كل المطاعم الموجودة فى الموضوع ده بس خليك عارف أن جنبه المطعم الصينى تشوب تشوب، وبالتالى تقدر تغير رأيك وتروح عليه. بيجم - Begum هما نفس الناس اللى بـ يديروا المطعم المحبوب فى الزمالك "ناواب" وعلشان كده بيجم – Begum لسه بـ يحاول يوصل لمستوى شقيقه. يمكن بيجم بـ يقدم نفس المنيو تقريبًا، بس المطعم الموجود فى المعادى ناقصه الجو العام، وبـ يحاول يعوض بأطباق لذيذة -خصوصًا أننا مدمنين لخبز النان naan-، رغم كل عيوبه قدر يوفر لسكان المعادى أكلات هندى سعرها معقول. مهراجا رمسيس هيلتون دائمًا عنده مشكلة فى منافسة مناطق زى جاردن سيتى والزمالك، بس مع وجود مهراجا، الفندق الموجود فى وسط البلد بقى عنده مطعم قمة فى الجمال. بالنسبة لمساحة المطعم، مافيش حاجة تميزه عن أى مطعم عادى داخل فندق، بس الفرن البلدى اللى تقدر تشوفه بعينيك كان لطيف؛ مافيش أحلى من أنك تشوف أكلك بـ يتحضر أمامك. أحلى حاجة فى مهراجا أنه مناسب لكل الأذواق؛ النباتى هـ يلاقى اختيارات ممتعة، أما أصحاب المزاج العالى برضه هـ يحسوا بالرضا. كلمة أكل هندى "أصلى" فى حالة مهراجا مش فى مكانها، بس ما نقدرش نشطبها فى نفس الوقت. ماسالا علشان هو أول مطعم هندى يسيب علامة مع سكان هليوبوليس، مسالا بـ يقدم كل اللى نفسك فيه. مسالا بمكانه فى فندق كارفين بـ يأخذك بعيد عن زحمة وإزعاج القاهرة لسهرة عشاء من الأكلات الهندية الأصلية صعب تلاقيها فى أى مكان ثانى. الأسعار هنا أقل من الموجودة فى الفنادق الأكبر، بس ده مالوش أى علاقة بجودة الأكل. ذا مغول رووم The Moghul Room- روعة وجمال فندق مينا هاوس الشهير بـ تتجسد فى مطعم "ذا مغول رووم". رغم أن الفندق ما بقاش ضمن مجموعة أوبروى، بس المعايير لسه زى ما هى بدون أى تغيير. الأكيد فى الموضوع أن أكلة هناك هـ تكلفك فلوس كثير شوية، بس ذا مغول رووم مناسب لكل المستويات. لو بصينا على جودة الأكل والخدمة، نقدر نقول أنه مطعم هندى يستحق عظمة موقعه، بعيد بس مسافة كام خطوة من أهرامات الجيزة. نواب عارف ليه ناس كثير بـ تحبه؟ علشان نواب أحسن مثال للمطاعم الهندى، مافيش إضافات مالهاش لزوم، أكل حلو وبس. يمكن تلاقى ناس بـ يسخروا من شكله المهمل، بس بعد ما تختار، وتقطع وتغمس قطعة من خبز النان الطازج فى أى من أطباق صوص الزبدة بتاعتهم أكيد هـ تنبهر. نواب عنده مشكلة معروفة عنه من ناحية مشاكل فى الجودة، بس مافيش شك أن مزاياه بـ تطغى على عيوبه. نايل بوخارهNile Bukhara - نايل بوخاره فى المعادى دائمًا شهرته سابقاه خصوصًا فى رمضان، وبـ يقدم أنواع من الإفطار النباتى. فى باقى شهور السنة المطعم بـ يوضح لك الفرق بين الرجال والأطفال. لما نايل بوخاره يقول "سبايسى"، خلى بالك من نفسك؛ السبايسى عنده حراق بجد والعادى عادى، مافيش بين البينين. لما تشوف المنيو تحس أنه فعلاً مطعم هندى بجد. راج- Raj لأنه جزء من مجموعة المطاعم الأنيقة فى فيرمونت هليوبوليس تاورز، الجو العام فى راج ضعيف جدًا، والسبب أن مكان الجلوس موجود فى المكان الضخم المخصص للمطاعم. رغم كل ده، صعب تعيب على الأكل من ناحية التجهيز والنكهات. لو كنت بـ تدور على احتفال من نوع خاص، غالبًا ده مش هـ يحصل؛ من ناحية الأكلات الراقية، الكميات قليلة والأسعار عالية، طبق رئيسى واحد هـ يكلفك على الأقل 100 جنيه من غير الأرز. تاج السلطان مع قلة معدلات السياحة، اختلاف تاج سلطان أثبت أنه السبب فى انهياره الأيام الأخيرة مكانه وسط المنطقة المشهورة خان الخليلى وميدان الأزهر، وبـ يقدم المطعم -المكون من ثلاثة أدوار- أكلات مصرى وهندى، مع أن الثانية مافيش عليها إقبال من سكان القاهرة. تاج سلطان من ناحية المكان قدر يقدم الجو اللطيف مع الديكورات الجميلة بشكل يتناسب مع عظمة اسم وموقع مكانه. كل وجبة وأنتم طيبين!
...
أكيد صعب تلاقى أكل تايلاندى بجد وسط مطاعم القاهرة، و"ساباى ساباى - Sabai Sabai" بمكانه الجديد تحت مترو ماركت فى الزمالك أصبح محير شوية لكثير من سكان القاهرة. يفط كثير حول المبنى بـ ترشدك لمكان المطعم عند نافورة صغير بـ ترحب بك أمام أبواب المطعم. رغم أن افتتاحه كان فى آواخر 2012، لكن المطعم من كلام الناس أصبح من أشهر المطابخ التايلاندية فى القاهرة. سنة 2008 كان موجود فى مكان ثانى فى الزمالك -بس دلوقت فتح مكانه "تاى إيليفنت- Thai Elephant" وبعدها قفل الفرع ده وفتح فى أكثر من مكان فى المدينة. سحر المكان الصغير نابع من الديكورات المستوحاة من الروح التايلاندية باللون الأبيض، وده بـ يخليه مكان مناسب لكل الناس اللى تقدر توصل لمكان المطعم المستخبى. أول ما دخلنا قابلنا الجرسون اللى سلمنا منيو فيها اختيارات متنوعة من المقبلات، الأطباق الرئيسية والحلويات. أول طلب لنا كان Pia Pak (12جنيه) ودى عبارة عن سبرينج رولز خضروات مع شوربةKeaw Nam wanton (30 جنيه). السبرينج رولز كانت ملفوفة بإحكام، مقلية بشكل ممتاز وبـ يُقدم معاها تشيللى صوص للتغميس. الشوربة كانت خليط مميز من المكونات الطازجة زى عشب الليمون، وكزبرة ومشروم، كلهم وسط مرقة مع زلابية الجمبرى shrimp dumplings المغلفة فى لفافة wanton. رغم أن كان فيه فرق توقيت بين تقديم المقبلات والوجبة الرئيسية، لكن الجرسون انتبه لطلبنا، وبعد شوية وصلت أطباقنا الرئيسية ببخارها الكثيف. وبرغم إحباطنا من عدم وجود الفستق المطحون اللى دائمًا بـ يزين الطبق، لكن طعم الباد تاى (49 جنيه) بنكهة البندق أضافت لسعة لذيذة لصوص البرتقال الحلو والحادق. نزل مع الباد تاى كمية كبيرة من الفول النابت وجزر مقطع بمهارة على شكل وردة. طبق Hor Mok Talay (54 جنيه) برضه كان طازج، عبارة عن سلامون عائم على صوص كارى أحمر خفيف. مع أننا طلبنا الطبق عادى، لكن الصوص كان حراق. قدرنا نسامح الغلطة دى علشان تنوع النكهات الموجودة فى الطبق، والأرز بالياسمين قدر يقلل من الطعم المشطشط. بالنسبة للحلو، قررنا نستمتع بطبق Khao Niao Kaeo (30 جنيه)، أو أرز بالمانجو وBua Loi (22جنيه) أو كرات الأرز. عرفنا أن مافيش مانجو وبـ يقدموا مكانه شرائح طازجة من الموز. رغم أن مافيش حاجة تعدل طعم المانجو اللذيذ مع الأرز بس حسينا أن طعمه كان حلو رغم أنه كان جاف شوية. كرات الأرز العائمة وسط لبن بجوز الهند كانت تحفة. الطبق قُدم دافئ مع كرات أرز طرية عائمة فى لبن مسكر بجوز الهند. عرفنا أن "ساباى ساباى" جملة تايلاندية ترجمتها "مش عاوز حاجة من الدنيا"، وده تعبير عن الرضا والسعادة؛ جملة معناها قريب من إحساسنا بعد انتهائنا من الأكل. القعدة المريحة والمكونات الطازجة كلها عوامل أكيد ترجعنا هنا من جديد علشان نشبع رغباتنا من الأكل التايلاندى اللذيذ بأسعاره المعقولة فى قاهرة المعز.
...
سلسلة موضوعات خاصة هـ نبدأ في نشرها من النهارده بـ تتكلم عن كل مطبخ من المطابخ المهمة في القاهرة وهـ نذكر أهم 10 مطاعم بـ تقدم أكلات المطبخ ده وطبعًا بعد ما نكون جربناها وزرناها وعرفنا أنها بـ تعمل الأطباق دي أحسن من غيرها. نوعدكم كل فترة هـ نعمل موضوع خاص -زي ده- نتكلم فيه عن المطاعم الجديدة اللي ظهرت وتخصصت في مطبخ معين بـ نرشحه لكم زي المطبخ الهندي والصيني واللبناني والسوري والمكسيكي والمصري والأمريكي. البداية مع واحد من المطابخ المفضلة جدًا لسكان القاهرة ولنا إحنا في كايرو 360 بشكل خاص، المطبخ الإيطالي يعني بيتزا ولازانيا وكالزوني، يعني سباجيتي وبِنا وفوسيلي، المطبخ ده فيه كل حاجة حلوة بـ تطلع مخبوزة من الفرن، وتُقدم ساخنة مولعة مع شرائح ملونة من الفلفل والطماطم، وصوصات الكريمة والطماطم والبصل، المطبخ الإيطالي رائع بمعنى كلمة رائع، والأهم من كده أن أكلاته أسعارها حنينة وسهل تلاقيها في كل حتة؛ من أرقى الفنادق لأصغر محلات الفطير، من أهم الشوارع الرئيسية لأضيق الحواري في المناطق الشعبية، هـ تلاقي بيتزا ومكرونة بصوصات إيطالي على مصري، في النهاية الأكلة أصلها إيطالي. بيسترو أول طلعة لازم تبقى على مطعم له عشاق ومعجبين كثير، فروعه في مصر الجديدة ومدينة نصر ومساكن شيراتون، البداية كانت بفرع واحد وبدأ يتطور وقاعدة زبائنه بـ تكبر ونجح بالبيتزا العملاقة "الحجم الكبير" المغطاة تمامًا بالموتزاريلا وكميات الإضافات غير العادية ونجح أنه يخلي الناس تلف تلف وترجع له ثاني علشان أحلى بيتزا الباتشينو بالرومي المدخن والركفورد، واللازانيا كمان هنا حكاية، بس هـ تستناها تبرد ربع ساعة على الأقل علشان تعرف تأكلها. أحلى حاجة في «بيسترو» أنك هـ تقعد وتأكل في المحل ومش هـ تدفع غير ثمن الأطباق اللي طلبتها بدون إضافة خدمة أو ضريبة. بيكولو موندو من مصر الجديدة ومدينة نصر نروح لمدينة الشيخ زايد وواحد من سلسلة مطاعم لو باشا الموجودة في الزمالك، «بيكولو موندو» موجود كمان في أركان مول الشيخ زايد. المكان له طابع إيطالي واضح في كل تفاصيله حتى المزيكا اللى شغالة إيطالية أصيلة. هنا ممكن تأكل أحلى سكالوبيني بصوص الليمون، شرائح بيف مقلية على الطريقة الإيطالية ومعاها شوية سوتيه وبطاطس، وبعد الأكل ما تنساش تجرب منيو الحلويات وبالذات فوندو الشوكولاتة اللي عجبنا جدًا لما جربناه في آخر زيارة لنا. سبكترا غني عن التعريف، صحيح «سبكترا» بـ يقدم أطباق عالمية ومتنوعة لكن نقدر نعتبره مطبخ إيطالي في الأساس، لأنك مش هـ تقدر تقاوم تطلب الباستا أو كومبو المقبلات اللي فيه أحلى موتزاريلا ستيكس وحلقات الكاليماري المقلي. القعدة في «سبكترا» لها مذاق خاص بعيد عن المنيو الجبار. له فرعين في سيتي ستارز فى الدور الأول والسادس، وبـ نفكركم كمان أن له فروع في المهندسين والتجمع الخامس وشارع الهرم والمعادي. بومودورو في وسط البلد في باب اللوق، ملك المكرونة بالسي فوود، مطعم فريد من نوعه وحقق نجاح وانتشار رهيب والناس بقت تيجي له من آخر الدنيا، الباستا الإيطالية بالسي فوود هنا اختراع، بنا أو سباجيتي بصوص المحار والكابوريا عليها كمية مش معقولة من الجمبري والكاليماري. القعدة هناك بسيطة لكن عصرية، هـ تحب تأخذ كومبو المكرونة بتاعك وتقعد تنأنأ فيه وأنت في منطقة حيوية جدًا في وسط البلد. الأسعار بـ تختلف حسب الحجم لكن الأصناف محددة وصريحة، باستا بالمأكولات البحرية هي الأساس، ومؤخرًا بقى فيه باللحم والدجاج. كارينوز نرجع ثاني للشيخ الزايد، المرة دي في تيفولي دوم، وواحد من أشهر المطاعم في عالم الأكلات الإيطالية وهو «كارينوز» اللي قعدتنا فيه وأجوائه الإيطالية جدًا عجبتنا أكثر من أي حاجة ثانية، يمكن علشان إحنا أصلًا بـ نحب تيفولي دوم، ويمكن علشان لنا ذكريات حلوة مع الفروع الثانية لكارينوز. هنا جرب أي فيليه بصوص المشروم أو الليمون مع السيسيليان ستيكس الحارة. بيتزاريللي أكل إيطالي على قدر كبير من الخصوصية، الشيف المصري اللي عاش فترة طويلة في إيطاليا وبـ يرجع يفتح مطعم الأحلام بالنسبة له ويقدم لنا خلاصة خبرته في طبق لازانيا فكرة جديرة بفيلم عربي مؤثر. دي تقريبًا قصة صاحب مطعم «بيتزاريللي» في مصر الجديدة، الموجود في ميدان الإسماعيلية الكلاسيكي المفضل لكل سكان مصر الجديدة. مكان حلو في القعدة والمنيو وكل حاجة، محافظ على إيطاليته شكلًا ومضمونًا، جربنا هنا سلاطة إيطالية بالزبادي والمايونيز وسباجيتي بولو ما حصلتش. المذاق رائع وهـ تحس بالأصالة في كل أطباق المحل، وفيه هنا منيو إفطار فيه معجنات إيطالية خطيرة. دا فرانكو لما تحب تطلب بيتزا إيطالية حقيقية وأنت قاعد في البيت، عليك وعلى «دا فرانكو» المتخصص في البيتزا "البيتي" يعني كأنك بـ تأكلها في بيت في إيطاليا. المحل موجود في المهندسين وبـ يعمل دليفري وبس، لكن البيتزا عنده غير أي بيتزا، نقدر نقول عليها صحية أو تنفع للدايت، المهم أنها مليانة خضروات وخالية تقريبًا من الدهون، والجبن قليل جدًا، بس ما ننكرش أن طعمها عجبنا، وعجبنا مستوى الخدمة والسرعة في التوصيل. ممكن تبقى من ضمن اختياراتك لما تطلب معاك أكل إيطالي غير تقليدي. لا كازيتا مافيش حد بـ يحب الأكل الإيطالي ما يعرفش «لاكازيتا» فروعه مغطية كل حتة في القاهرة، بـ نحب نأكل فيه علشان نستفيد بعملة لاكازيتا الورقية اللي بقيمة 5 جنيه اللي بـ تأخذ منها بنسبة معينة من قيمة فاتورتك في كل مرة وكل ما نجمع شوية عملات نروح نأخذ واحدة بيتزا ع السريع. طبعًا فكرة ترويجية ممتازة بس ده ما يمنعش أن الأكل هنا روعة، والأجواء الكلاسيكية والراقية جدًا للمكان بـ تخلينا نشتاق له من وقت للثاني ونبقى عاوزين نأكل بيتزا وسباجيتي بولونيز من عنده هو دون عن أي مطعم إيطالي ثاني. ميركاتو إيطاليانو مافيش فوود كورت تقريبًا في أي مول مافيهوش أكلات إيطالية، لكن تعودنا لما نبقى في مول ندور على «ميركاتو ايطاليانو» تحديدًا. أسرع أكل إيطالي في مصر، كل الأكل معروض أمامك في كاونتر كبير، شرائح البيتزا الكبيرة والأرز بالخضروات وكرات اللحم والدجاج بالكريمة والليمون، أطباق مميزة جدًا عند ميركاتو، بس السترومبولي هنا حاجة ثانية، أحلى وأكبر فطيرة محشوة إيطالية، ما ينفعش تيجي هنا من غير ما تجربها، ومع أي وجبة لازم تأخذ سلاطات الهاوس سبيشيال الفريش، ما تتفوتش. ديدوز آل دنتي مسك الختام «ديدوز آل دنتي» بفرعيه في الزمالك ومصر الجديدة. فرع الزمالك هو الأصلي، رغم مساحته الصغيرة جدًا إلا أن الإقبال والزحام فيه غير عادي، علشان عنده طبق بِنا ألافورنو هو الأفضل في القاهرة، وبعد كده تيجي البيتزا واللازانيا وبعض أطباق السي فوود بالطريقة الإيطالية المتخصصة جدًا. ديدوز من مطاعمنا المفضلة في كايرو 360 ومش بـ نفوت فرصة نكون في الزمالك إلا وندخل نقعد نسمع شوية مزيكا حلوة ونعيش أجواء إيطالية صميمة.
...
