The Definitive Guide to Living in the Capital , Cairo , Egypt

التختروان

التختروان: مطعم بروح التراث على مساحة ضخمة في الشيخ زايد

  • شارع النزهة - مدينة الشيخ زايد
  • لبناني
  • 01114444713
تم التقييم بواسطة
Angie El Batrawy
قيم
قيم الآن
التختروان: مطعم بروح التراث على مساحة ضخمة في الشيخ زايد

كل شوية بـ نشوف اختراعات وابتكارات فى مطاعم القاهرة، سواء فى الديكورات أو فى أصناف الأطباق أو غيرها، آخر حركات الديكورات اللى شفناها فى مطعم “التختروان” اللى هـ تحسسك أنك عايش أجواء زمان أيام عصر العثمانيين والعباسيين بالديكورات والروح التراثية الأصيلة..

“التختروان” اسم –زي ما توقعنا- هو اسم القعدات اللى كانوا بـ يقعدوا فيها زمان أيام العثمانيين والعباسيين، المكان كان له إدارة مصرية وتغير بقى تحت إدارة لبنانية، هو لسه هـ يبدأ Soft opening والافتتاح الرسمي قريبًا، المكان واسع وضخم بطريقة كبيرة، الديكورات هـ تشدك جدًا أول ما تدخل بالقباب والستايل القديم بالخشب الملون، كل مكان فيه قعدات شكل ولها روح خاصة بها سواء فى الدور العلوي أو اللى تحت، فيه محل إكسسوارات بس فاتح تحت جنب القعدات وفيه محلات ثانية لسه بـ تتوضب.

القعدات بـ تنقسم على حوالى 5 مناطق: الأولى فى المنتصف أول ما تدخل على مساحة خضراء مستطيلة، الثانية بـ تحيط بالأولى وموجودة على الجوانب أول ما تدخل فى الدور الأول اسمها “حريم السلطان” ودي إضاءتها خافتة ولها خصوصية أكثر من القعدات الثانية، فوق فى الدور العلوي هـ تلاقى ثالث مكان وهو مفتوح وبـ يطل على المكان كله وفيه كنب على التراث القديم، وفيه قعدة ثانية مقفولة شوية عن دي –المنطقة الرابعة- على اليمين وأنت طالع، أما الخامسة موجودة بالداخل خالص فى الدور الأرضي داخل قاعة كبيرة على شكل دائرة وفيها قعدات مدرجة وبُفات ودي ممكن تقيم فيها حفلات وأعياد ميلاد أو مؤتمرات وندوات أو أى مناسبة بالحجز المسبق. 

ولأن المكان كله مفتوح بـ يجهزوه دلوقت بدفايات فى “حريم السلطان” وهـ يقفلوا المناطق المفتوحة علشان تبعث شوية دفء للناس القاعدين، المنيو ما كانتش موجودة قالوا لنا لسه أسبوع لكن الجرسون قال لنا الأكل المتاح بنفسه بعد ما رجع للشيف، مافيش غير منيو للمشروبات والشيشة فقط، الأكل المتاح ما كانش فيه تنوع كبير لسه وما كانش فيه لحوم، لكن الجرسون –المهذب والخدوم جدًا- أكد لنا أن بعد أسبوع كله هـ يتضبط لأنهم لسه قبل الـ Soft opening، طلبنا شوربة فراخ (15 جنيه)، وطبق فراخ بصوص الليمون (42 جنيه)، وواحد ثاني بصوص المشروم (نفس السعر) مع سلاطة خضراء (12 جنيه)، وزجاجة مياه صغيرة (4.95 جنيه).

الشوربة ما تأخرتش، كانت حلوة أوي وسخنة دفتنا من صواريخ الهواء اللى كنا فيها، تلاها السلاطة اللى كانت حلوة ماعدا كان حظنا فيها فلفل مشطشط لهب لنا فمنا شوية، الأطباق الرئيسية تبعتها بعدها بشويتين، الفراخ فى الطبقين كانت مستوية كويس، إلا أننا أعجبنا بصوص الليمون أكثر من المشروم، الاثنين حلوين لكن الليمون شدنا أكثر، للأسف وقت زيارتنا ما كانش فيه من الطلبات الجانبية غير الأرز والبطاطس البيوريه أو المحمرة، ما كانش فيه خضار، لكن البيوريه كانت رائعة وكريمي غنية، الأرز كان كويس برضه وكميات الأكل كويسة جدًا.

بعدها طلبنا من منيو المشروبات تروبيكانا (21.95 جنيه) وده كوكتيل مشروبات فريش، كان حلو وخفيف واستمتعنا به جدًا، كمان ميلك شيك شوكولاتة (15.95 جنيه) كان حلو برضه واللى عجبنا فيه أكثر أن الشوكولاتة مش ثقيلة وفى نفس الوقت طعمه غنى بالمذاق.

المكان بـ يضيف 12% خدمة، ووقت زيارتنا صاحب المكان رحب بنا وعرفنا بالمكان أكثر وأعطانا تخفيض 20% كترحيب من المكان بنا، كانت لفتة لطيفة منه، هما لسه مش لهم صفحة على الفيسبوك، بس فيه Account لهم حديث، المكان لطيف جدير بالزيارة وممكن تروحه مع عائلتك والأطفال هـ تنطلق فى المكان بأمان، فيه مجهود واضح على المكان وإحنا حاسين أنه هـ يكون أقوى كمان بعد الافتتاح الرسمي.. خليكم متابعينا.

نصيحة 360

فيه مسابقات وبرامج ترفيهية هـ تتعمل قريب كمان.

أحسن حاجة

فيه شخصية مختلفة للمكان وأنه فى مكان مفتوح بـ يطل على منظر خلاب.

أسوأ حاجة

كنا مقيدين فى الاختيارات شوية علشان لسه مافيش منيو.

Map Data
Map data ©2016
Map DataMap data ©2016
Map data ©2016

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح