The Definitive Guide to Living in the Capital , Cairo , Egypt

الحوت

الحوت: أكلات بحرية سريعة في مصر الجديدة

  • 22 شارع ابراهيم اللقاني - ناصية شارع الأهرام
  • مأكولات سريعة
  • 01003320888,01005611146
تم التقييم بواسطة
Waleed Abuarab
قيم
قيم الآن
الحوت: أكلات بحرية سريعة في مصر الجديدة

لو كنت من رواد مصر الجديدة وبالتحديد روكسي وشوارع ابراهيم اللقاني والأهرام يبقى أكيد لمحت محل الأسماك اللي حاطط بجعة كبيرة أمام الباب في مواجهة كافيه «أمفتريون» الشهير في شارع الأهرام، بجعة حقيقية عملاقة وحوض كبير فيه ترسة بحرية عملاقة برضه، من العلامات المميزة لمطعم «الحوت» المتخصص في ساندويتشات الجمبري والسمك ووجبات الأكلات البحرية السريعة، بإضاءة ساطعة ووموقع مميز بـ يغرينا كل مرة أننا نجربه ونشوف أخبار الأكل عنده إيه. بس في آخر زيارة عرفنا خبر مش كويس! البجعة اتسرقت! أيوه ده بجد.. حد جاء وفك البجعة المربوطة من رجلها وأخذها وهرب! مش هـ نسأل هو ممكن يكون سرق بجعة يعمل بها إيه! بس أهو ده اللي حصل.. كده مش فاضل لنا غير الترسة والأكل اللي هـ نجربه.

مافيش جلوس داخل المطعم لأنه أشبه بكشك كبير بـ يتم تحضير الأكل فيه، والقعدات كلها على كراسي وترابيزات على الرصيف أمام الكشك ده. كنا فاكرين المطعم بـ يقدم ساندويتشات ووجبات أرز وفيليه بس، لكن لاقينا المنيو فيه كل أصناف السمك والجمبري بـ تتباع بالكيلو وفيه كمان تجهيز طواجن وصواني حسب الطلب وبـ يعمل طرق الطهي المختلفة. مش عارفين التنوع ده هـ يبقى في صالحه ولا لأ؛ لأن شكل المحل مناسب أكثر للوجبات السريعة، وإحنا ما جربناش في زيارتنا دي غير كام وجبة مع بعض أصدقائنا وكلها بـ تتكون من نوع أو اثنين من المأكولات البحرية المقلية مع الأرز والسلاطة والعيش وأسعارها بـ تبدأ من 12 لحد 35 جنيه، وكان فيه مكرونات  بالسي فوود والموتزاريلا بأسعار من 15 لـ 32 جنيه وكثير من المقبلات والأصناف الجانبية.

عملنا اختبار بسيط لمطبخ «الحوت» أننا طلبنا شوربة السي فوود المخلية (25 جنيه) واللي وصلت لنا ساخنة جدًا لكن بلا مذاق تقريبًا، وفيها فتافيت جمبري مش فريش خالص وقطع سبيط وفيليه قليلة جدًا، لأول مرة ما نقدرش نخلص طبق شوربة السي فوود وده معناه أنها كانت صعبة قوي. سيبنا الشوربة خالص وبدأنا في وجبة الجمبري المشوي على الشيش بخلطة الطماطم والفلفل والبصل (35 جنيه) والحقيقة الخلطة دي كانت أحسن حاجة في الموضوع، والجمبري كان متبَل كويس بس مملح زيادة، والأرز اللي معاه كان عادي جدًا والطحينة خفيفة والسلاطة الخضراء للأسف كانت كأنها عاوزة تحمض بره الثلاجة! كل دي أخطاء لا تغتفر، لأن ده محل متخصص في أكلة معينة ولو ما عملش كل تفاصيلها كما يجب يبقى يغير نشاطه أحسن.

يمكن ساندويتشات الجمبري الحجم الوسط (15 جنيه) ووجبات الفيليه الصغيرة (17 جنيه) كانت أحسن حاجة من اللي جربناه هنا، وده بـ يأكد أن المطعم ده تأكل منه على السريع وبس، تحضير صواني وشوربات وسنجاري وطواجن مش مضمون بنسبة كبيرة، بس ممكن تجرب في مرة ويطلع حظك كويس، لكن الأكيد أنه مش هـ يقارن بأي حال بمطاعم الأسماك الكبيرة المتخصصة زي «البرج» و«بحري» و«قدورة»..لكن ممكن تقارنه بأسماك «تبارك» و«أبو قير» الموجودين في مناطق قريبة في مصر الجديدة ومدينة نصر.

القعدة عند «الحوت» حلوة ودمها خفيف، كملها على خير بقى واطلب أكلات سريعة وساندويتشات، الأسعار كويسة والخدمة سريعة، وماتنساش تسألهم هـ يجيبوا بجعة ثانية إمتى.

نصيحة 360

بـ يبيع سمك طازج بأسعار السوق لو عاوز تشتري وتطبخه في البيت، وفيه خدمة توصيل للمناطق القريبة.

أحسن حاجة

ساندويتشات الجمبري والموقع المتميز.

أسوأ حاجة

الشوربة والسلاطات.

Map Data
Map data ©2016
Map DataMap data ©2016
Map data ©2016

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح