The Definitive Guide to Living in the Capital , Cairo , Egypt

المأكولات الإيطالية لها شعبية كبيرة بين أهل كايرو، وللأسف هي أكثر المأكولات اللي بـ يتم تنفيذها وتقديمها بدون وعي بأصولها لمجرد أنها سهلة وأن الناس كده كده هـ تأكلها وهي مبسوطة. سواء كانت المأكولات دي باستا، أو بيتزا أو ريزوتو. حتى المطاعم المحترمة واللي المفروض بـ تدفع فيها مبالغ محترمة مقابل أكل إيطالي صميم بـ تقدم المطبخ الإيطالي بصورة تجارية دون الرجوع لأصله، لو مش مصدق، خلينا نحكي لك عن تجربتنا في “الميز – EL MAIZ” الموجود في الزمالك، واللي ممكن يخليك تفكر مرتين قبل ما تروح لمطعمك المفضل مرة ثانية بعد ما تجربه.

المطعم فتح السنة اللي فاتت بجانب بنك HSBC اللي في شارع أبو الفدا، مساحته نسبيًا صغيرة، وبـ يقدم باستا، وساندويتشات جبن مشوي، وحلويات ومرطبات. مافيش حاجة في المنيو أغلى من 38 جنيه.

اللون الأساسي في ديكورات المطعم هو اللون الرمادي، واللي بـ يضيف له حياة هو اللون الأصفر الزاهي. التصميم ككل بـ يحاكي تصميم المصانع ببساطته والعنصر المعدني المستخدم في ديكوراته بشكل أساسي… ده حتى صندوق البقشيش عبارة عن خوذة عُمال لها فتحة من فوق! المطبخ مفتوح وبالتالي أنت شايف الطباخ وهو بـ يصنع لك الباستا الجميلة اللي طلبتها.

قررنا نتجنب الاختراعات ونجرب الكلاسيكيات اللي معظمنا بـ يحبها، طلبنا باستا بكُرات اللحم (30 جنيه) وماك أند تشيز (25 جنيه) وأضافنا للثاني جبن بارميزان زيادة (5 جنيه). تقدر طبعًا تختار نوع الباستا اللي بـ تفضله، فجربنا الـ “لينجويني” في الطبق الأول، والـ “فوسيللي” في الثاني. بـ يقدموا أنواع أخرى من ضمنها الباستا البني (بالقمح الكامل) لو عاوز تأكل صحي.

الأكل بـ يُقدم في بولات معدن كبيرة، وكمية الأكل مرضية جدًا للأكيلة. كُرات اللحم كانت مطبوخة في أجمل صلصة طماطم ذقناها، الطماطم طازجة ومضاف إليها ثوم، ريحان وزيت زيتون وعليها جبنة بارميزان… من حلاوة الطعم إحنا عاجزين عن الوصف، لازم تجرب بنفسك!

الماك أند تشيز (وهو طبق أصله أمريكي مش إيطالي) صحيح أنه مش بجمال الطبق الأول، إلا أننا حبيناه جدًا، نفس البولة الخرافية والكمية العظيمة اللي مش هـ تخليك تقدر تتنفس بعدها… كل مكون فيها كان زي ما بـ يقول الكتاب، متجانسين في تناغم كريمي بديع.

الخدمة ممتازة، المطعم مُعتنى به بامتياز من حيث النظافة، ده طبعًا غير جودة الأكل. حقيقي القاهرة محتاجة لمطاعم أكثر من النوع ده، لأنها بـ تقدم السهل الممتنع.