أحدث موضة ظهرت في مصر الفترة الأخيرة هي المطاعم المتنقلة، واللي بيحاولوا عن طريقها نشر مفهوم أكل الشارع "النظيف". من أوائل المطاعم اللي تبنت فكرة التنقل هي"برجر تراك BRGR Truck". الفكرة إن برجر تراك مالهمش مكان ثابت، وشوفناهم في أماكن مختلفة زي هاسيندا باي والجونة وداون تاون مول ونادي الجزيرة؛ أكيد أكيد شوفتوهم ولو حتى في دبي… ثانية واحدة معلش، لا دول كانوا سولت تراك.
ما علينا، المهم إن برجر تراك مقطورة فضي صغيرة بتغير مكانها كل فترة. الفكرة إن الترابيزات والكراسي العاليين مش قعدة مريحة، وكمان الترابيزة كان عليها تراب وقت زيارتنا لهم في كابيتال بيزنس بارك الشيخ زايد.
منيو برجر تراك بمنتهى البساطة عبارة عن ساندويتشين، أوريجينال وجى بومب، ومعاهم نوعين بطاطس، تشيز فرايز وبرجر فرايز، وبكده نكون عدينا بسلام أول مرحلة وهي اختيار الأكل.
قررنا نطلب الأربعة أصناف الموجودين في المنيو، ونبدأ معاكم الرحلة مع التشيز فرايز (١٥ جنيه). البطاطس كانت رفيعة ومقرمشة ومش مزيتة خالص وعليها جبنة، وممكن نقول إنها قريبة جدًا من بطاطس ماكدونالدز. الملاحظة الوحيدة إن الجبنة كانت متكتلة شوية ومالهاش طعم أو تتبيلة مميزة.
أما البرجر فرايز (٢٠ جنيه) فموضوعها مختلف ولها نكهة مميزة. البطاطس تقريبًا كانت نفس المكونات ماعدا إضافة صوص مخصوص – قريب من طعم "Thousands island" – أضاف للبطاطس الطعم المميز للفاست فوود اللي كلنا بنحبه.
نروح للكلام الكبير وندخل على أوريجينال برجر دوبل (٤٥ جنيه) المكون من قطعتين بيف عليهم جبنة شيدر سايحة وخس وطماطم وصوص برجر تراك المخصوص، وبصراحة طعمه كان حكاية، وصحيح قطعة البيف كانت رفيعة بس عصارية وتتبيلتها روعة، والحلو كمان أنهم مش مغرقين الساندويتش صوص، بحيث الصوص يضيف نكهة للأكل وفي نفس الوقت مش بيطغى على طعم الساندويتش نفسه. نطلع على جي بومب دوبل (50 جنيه) واللي كان نفس الأوريجينال مع إضافة هالبينو اللي عمل طعم مشطشط هايل.
برجر تراك بصفة عامة عمل نقلة جديدة لشكل الأكل في مصر. جايز كمية الأكل صغيرة والأسعار غالية شوية، بس مع جودة كل مكونات الأكل، أكيد الموضوع يستاهل. طلبنا الوحيد إنهم يزودوا أصناف جديدة في المنيو.
أكتب تقييم
مقترح
الحياة في كايرو
تقرير.. مصر الثانية إفريقيًا من حيث عدد الأثرياء والقاهرة فيها 7200 مليونير
ترتيب مصر من حيث الأثرياء ثروات مصر +4
صحة ولياقة
