The Definitive Guide to Living in the Capital , Cairo , Egypt

المطبخ الإيطالي من المطابخ اللي إحنا مستعدين ناكل منها كل يوم من غير ما نزهق، ونعتقد أن فيه ناس كثير ممكن تتفق معانا في الرأي ده؛ لأنها من المطابخ المحببة لنا كمصريين بشكل عام، واللي أشهر أطباقها –الباستا- تسللت لقائمة الأكل في أي بيت، ولكن بالرغم من أن المطاعم الإيطالية منتشرة في القاهرة، إلا أن قليل ما بنخرج منها وإحنا حاسين برضا كامل عن التجربة، مطعم بيبينيرو – Pepenero في شارع بغداد في الكوربة أثبت أن لسه فيه مطاعم تخرج منها وأنت مقرر أنك لازم ترجع ثاني.

في عمارة مخبز فينوس في شارع بغداد، بيبينيرو واخذ شقة في الدور الأول، المكان ديكوراته بتتميز بالبساطة ولكن من غير إهمال للتفاصيل؛ حوائط بيضاء وترابيزات خشبية كراسيها مبطنة بقماش منقوش أحمر وأبيض، إضاءة هادئة من مجموعة وحدات إضاءة جانبية مبتكرة، مواسير معدنية بطول الحائط خارج منها لمبات محفوظة في برطمانات، أما المنطقة الخارجية فكانت أحلى منطقة خارجية ممكن يتقعد فيها؛ لأنها بلكونة بتطل على شوارع الكوربة.

وقت زيارتنا المطعم كان شبه خالي إلا من ترابيزة عليها فردين، قعدنا وأخذنا جولة في المنيو اللي مكتوب باللغتين الإيطالية والإنجليزية، كنا محتارين نختار إيه لأن المنيو فيه مجموعة كبيرة من الاختيارات؛ من أول الباستا والبيتزا والريزوتو وأطباق اللحوم والفراخ، في النهاية طلبنا ريزوتو دي ماري – Risotto Di Mare بـ (120 جنيه)، وطبق كوتوليتا آلا ميلانيزي Cotoletta Alla Milanese بـ (125 جنيه).

بعد ما طلبنا نزل على الترابيزة سلة عيش مقطع شرائح وطبق جبنة نعتقد أنها كانت بارميزان وطبق فيه قطعتين بروشيتا (طماطم فريش مقطعة مكعبات صغيرة على شرائح عيش محمص) واللي كانوا أحلى بداية للوجبة، الأكل ما أخذش وقت وحالاً الأطباق الرئيسية كانت على الترابيزة؛ الريزوتو اللي فيه مجموعة كبيرة من فواكة البحر (كاليماري – جمبري – بلح البحر – قطع سمك قاروص) كان معمول بالصوص الأحمر، بالرغم من أن الريزوتو من الاختيارات الخطر في مطاعم كثير –وخصوصًا لو بالمأكولات البحرية- لأن مش أي حد بيضبط قوامه ومش دائمًا بتكون فواكة البحر طازجة، إلا أننا نقدر نقول أن بيبينيرو بيقدم ريزوتو مضبوط، الأرز متماسك من غير ما يفقد طراوته، ده غير أن مجموعة فواكة البحر كانت طازجة ووفيرة ومناسبة لحجم الطبق اللي كان كبير.

الطبق الأخير كان عبارة عن قطعتين سكالوب متوسطين مقليين مع باستا بيني بالصوص الأبيض، السكالوب كان تسويته من بره وجوه مضبوطة وطبقة الـ breading (الطبقة المقرمشة) كان لونها ذهبي ومقرمشة وغير دهنية، اللي كان جديد بالنسبة لنا هو نكهة الليمون اللي مضافة للسكالوب ونعترف أن الإضافة المنعشة دي جددت من طبق معتاد بالنسبة لنا، الباستا كانت ممتازة كطبق جانبي مع السكالوب والصوص الأبيض كان كريمي.

بالرغم من أن كمية الأكل كانت ممتازة، إلا أننا قررنا نأخذ واحد كابتشينو (28 جنيه) وطبق بانا كوتا Panna Cotta بالتوت البري (60 جنيه)، صحيح بنحب فوم الكابتشينو متماسك أكثر من كده، إلا أن القهوة كان طعمها رائع، مافيهاش مرارة ونسبتها مضبوطة مع كمية اللبن لدرجة أننا استمتعنا به بنسبة سكر قليلة جدًا، البانا كوتا كانت حلو خفيف بعد الوليمة، ولكن تمنينا أن نسبة الصوص والتوت تكون أكبر من كده لأن كان فيه مرحلة كنا بناكل البانا كوتا سادة.

إجمالًا، التجربة أكثر من رائعة، من أول الأكل وحتى الخدمة السريعة والممتازة، القائمين على الخدمة منتبهين ومش هتضطر أنك تقعد تدور عليهم لأنهم عارفين هم بيعملوا إيه.. لازم تروحوه.