The Definitive Guide to Living in the Capital , Cairo , Egypt

مطاعم
بيسترو – Bistro

بيسترو: أكل إيطالي حنين على الجيب

  • 16 شارع أبو داوود الظاهري
  • مأكولات سريعة
  • 12 ظهراً - 4 صباحاً -
تم التقييم بواسطة
Meriam Wagdy
قيم
قيم الآن
بيسترو: أكل إيطالي حنين على الجيب

أكل حلو٬ أسعار ممتازة٬ جو لذيذ وخدمة جيدة٬ المعادلة الصعبة اللي بـ تحاول
توصل لها كتير من المطاعم. واللي بعد ما جربنا «بيسترو – Bistro» ممكن بثقة نقول انه قرب لها جداً٬
ان ماكانش وصل لها. المطعم اول فرع ليه فتح من حوالي 14 سنة في مساكن شيراتون. لكن
احنا روحنا «بيسترو» مدينة نصر٬ وده فتح في 7-7-2007 زي ما الويتر قاللنا.

المطعم قدام كنيسة مدينة نصر الإنجيلية٬ وعمارتين تقريباً من «كاستن». الديكور
دمه خفيف والوانه بنيات وبيچات دافية والإضاءة قوية بس مريحة. على الحيطة هـ تلاقي
صور شخصيات تاريخية عامة٬ سياسية وفنية: چيڤارا وهتلر وغاندي مع هند رستم وميل جيبسون
وإلڤيس – كلهم على نفس الحيطة في منظر لذيذ. والسقف عليه صور ملايكة ورسومات فن نهضة
إيطالي٬ متبروزة ومتنورة بطريقة مبتكرة وجديدة. في كمان كونتر بعرض المكان تقريباً
على الطريقة الإيطالي. وأول ما بـ تدخل بـ تشعر بدفء المكان٬ وده مش بس عشان ألوان    الديكور بس كمان عشان العائلات اللي بـ تروحه والزحمة
المبهجة بتاعة الناس اللي بـ تكون مالية المكان. بجانب العائلات اللي بـ تتردد على
المكان بالليل بـ يكون في شباب جامعيين وفي مراحل عمرية أكبر شوية. لكن يتاخد ضد المكان
ان الحمام ماكانش نضيف والكراسي والترابيزات قدمت شوية٬ لكن نرجع ونقول ان الأكل والخدمة
معوضة ده تماماً.

المنيو متنوع فيه ساندويتشات٬ بيتزا ومعجنات (باستا) وأطباق رئيسية تانية. اول
حاجة هـ تلاحظها في المنيو وهـ ترسم إبتسامة علي وشك٬ هي الأسعار! السلاطات والحلو
أطباقه بـ تتراوح من 7 – 10 جنيه. والبيتزا اللي المكان مشهور بيها٬ الوسط منها بـ
يبدأ من أواخر العشرينات٬ وفي كمان وجبات مُركبة: طبق رئيسي ورز أو مكرونة وسلطة أو
مقبلات ودي أطباق الفراخ فيها بحوالي 30 جنيه واللحمة بحوالي 40. المشروبات محدودة
مافيش غير كانز وعصير برتقال فريش.

احنا طلبنا بيتزا فراخ بالباربكيو (29 جنيه)٬ كانت رائعة٬ وممكن اتجرء واقول
انها شوية وهـ تنافس اختها بتاعة «توماس بيتزا»! كانت هشة٬ والعجينة والجبنة كان طعمهم
حلو قوي. والمكونات واضح انها صابحة وجودتها عالية. طلبنا كمان وجبة مركبة من فراخ
«سكالوبيني» ومكرونة فيتوتشيني بالكريمة وسلطة كلوسلو. الكلوسلو كان صغير جداً٬ بس
طعمه حلو. والمكرونة اللي اتقدمت في نفس الطبق مع الـ«سكالوبيني» كانت خفيفة وممتعة٬
مع إن الصوص الأبيض كان ممكن يكون فيه طعم أكتر شوية. اما الفراخ الـ«سكالوبيني» فهي
عبارة عن فراخ مقلية ومتغرقة في صوص الطماطم الإيطالي الأصلي٬ وطعم    الريحان واضح جداً. الفراخ نفسها كانت حلوة لكن
طعمها مش طازة كفاية. اخدنا برتقال فريش مع الأكل بس كان حادق شوية. وللحلو اخدنا «Chocolate a
Lamoura» بـ8 جنيه ودي عبارة عن فطيرة (ببسكوت
مكسر في القاعدة) فيها كريمة جبنة (زي بتاعة الـ«تشيز كيك» بس كان طعمها اقرب للكاستر)٬
وكريمة الشوكولاتة. كانت كريمتها ناعمة وجميلة٬ لكن البسكوت كان ناشف. والمكونات ما
كانتش أحسن حاجة من حيث الجودة.

«بيسترو» ممتاز لخروجة مع العيلة٬ جوه
حميمي ودافي٬ وأسعاره وهمية بالنسبة للخدمة وجودة الأكل والمكان. أكلنا وجبتان لشخصين
مع مشروبات وطبق حلو بأقل من 90 جنيه ومافيش لا ضريبة ولا خدمة بـ تتضاف على الفاتورة٬
السعر اللي في المنيو هو اللي بـ ينزل على الفاتورة. ده غير انه على غير عادة المطاعم
اللي من النوع ده مفتوح لـ4 الفجر.

نصيحة 360

بلاش تطلب سلطة منفصلة٬ أطلب «Salad Bar» طبق مشكل من بوفيه السلطات (حوالي 10 جنيه).

أحسن حاجة

البيتزا ثم البيتزا ثم الأسعار الجامدة جداً.

أسوأ حاجة

طلبنا جبنة مبشورة عشان المكرونة٬ اتضافت على الفاتورة بـ5 جنيه!

أكتب تقييم

أضف تعليقاً

يجب أنت تكون مسجل الدخول لتضيف تعليقاً.

مقترح