The Definitive Guide to Living in the Capital , Cairo , Egypt

الشيخ زايد عمالة بـ تحلو وإحنا مش قادرين على كده! شكلنا هـ نروح نعيش هناك قريب –نتمنى طبعًا- سواء المبانى الإدارية أو الكافيهات أو المطاعم والمحلات والمولات اللى عمالة تفتح بسرعة البرق.. “أركان مول“، “أمريكانا بلازا” ولا “تيفولى دوم زايد”.. هـ نلاحق على مين ولا مين!

بعد ما تأخذ أول يمين عند “هايبر وان” ماركت وتفضل ماشي على طول هـ يقابلك مطاعم كتبنا لكم عنها مقالات نقدية قبل كده زي “أفريكانو” و”كافيه دو أور”، كمل مشي بالعربية أو بالمواصلات على طول شارع النزهة لحد ما توصل عند “تاباس – Tapas” اللى مواجه لكمبوند الياسمين على الجهة الثانية، اسمه شدنا لأنه مقارب لمطعم فى أركان مول اسمه “توباز – Topaz“.

المكان سهل الركن أمامه، أول حاجة لفتت انتباهنا –ومن زمان وإحنا معديين من جنبه- أن مافيش ولا واحد فى المكان، ودى حاجة تثير القلق، بس قلنا يمكن ده علشان قلة الدعايا للمكان مش علشان هو وحش، دخلنا وقعدنا فى المنطقة المفتوحة بره اللى للأسف كانت متربة ومافيش اهتمام بها، الترابيزة عبارة عن لوح زجاج محطوط على 4 بُفات كأنهم الأرجل، التراب دائمًا مشكلة الأماكن المفتوحة ومحتاجة متابعة خاصة لو المطعم بـ يطل على شارع رئيسي، الكنب لونه مش ممريح للعين شوية بس مش مشكلة.

نيجي للمنيو اللى فيها تفاصيل كثيرة جدًا ومتنوعة والقسم اللى شدنا جدًا هو الحلويات لأنهم بـ يقدموا أصناف ما شفناهاش فى أماكن ثانية، الجرسون اللى استقبلنا اكتشفنا بعد كده أنه برضه الشيف اللى بـ يحضر الأكل ولما طلبنا الأوردر دخل يعمله وبقى معانا ولد ثاني، صوت الموسيقى عالي جدًا وطلبنا أنه يوطي شوية ومزيج المزيكا اللى هناك مش فاهمينه لأنه شوية شرقى جدًا وشوية غربي وشوية لبنانى وأحيانًا روك!

اختارنا من المنيو طبق كباب (74.99 جنيه) مع اختيارنا من الخضار السوتيه والبطاطس المحمرة، وكمان أخذنا فراخ رول محشية خضروات (57.99 جنيه) ومعاها نفس الطلبين الجانبيين، وكمان سلاطة تصبر جوعنا شوية باسم المكان “تاباس سلاد” (24.99 جنيه) ونزل لنا زجاجاة مياه صغيرة (6 جنيه)، ووقت زيارتنا أطباق اللحوم أو الستيك على وجه الخصوص ما كانتش موجودة.

فييييييين عقبال لما جابوا لنا السلاطة لما طلبناها حتى تصبرنا لحد ما الأكل يخلص واستغربنا التأخير وإحنا الوحيدين في المكان، أُمال لما يبقى زحمة هـ يعملوا إيه، قعدنا مزمزنا فيها كانت لطيفة وفريش، ولما جابوا لنا الأكل اعتذروا عن التأخير بحجة أن الأكل اتأخر علشان بـ يعملوه فريش أول بأول! معنى كده أن الأماكن التانية بـ تجيب الأكل بدري علشان بايت عندهم؟!

ما علينا، الأكل كان لطيف، الكباب بس ما كانش كويس أوى وكان بـ يشد وفيه أجزاء دهن، الفراخ المحشية خضار كانت حلوة أوى ومع الصوص الأبيض من فوق، مخدومة كويس والكمية كبيرة، الخضار السوتيه والبطاطس كانوا حلوين بس ذقنا الأفضل فى أماكن ثانية.

تستمر قعدتنا مع صداع المزيكا اللى مش راسية على حل! بعد الأكل اتجهنا لقسم الحلويات اللى شدنا فيه الآيس كريم بوم وهى عبارة عن عجينة على شكل كرة وداخلها آيس كريم مع صوص من بره، ترددنا لأننا كنا عاوزين نمشي بدري ويتأخر الطلب زي ما حصل فى الأطباق الرئيسية، توكلنا على الله وطلبنا وبرضه قعدنا وقت كثير جدًا يكاد عدى النصف ساعة لحد ما جاء لنا صاحب المكان وعلى وجهه ابتسامة: “إحنا آسفين مش هـ نقدر نقدم لكم الآيس كريم بوم لأنه بـ يأخذ وقت فى التحضير وهو مش جاهز عندنا لسه!”، طيب ما اتقالش ده ليه من الأول؟ لا تعليق بجد!

اتضايقنا وطلبنا الشيك، استغربنا كمان وإحنا بـ نحاسب لقيناهم كاتبين فى الـ Receipt كل الأصناف تحت اسم Open beverage ما فهمناش ليه! اضف على كده الخدمة والضريبة مشينا دافعين مبلغ كبير على حاجة –للأسف- ما اتبسطناش فيها!