The Definitive Guide to Living in the Capital , Cairo , Egypt

تسونامي سوشي – Tsunami Sushi

تسونامي سوشي: أكل ياباني جديد في الزمالك

تم التقييم بواسطة
Nada Faied
قيم
قيم الآن
تسونامي سوشي: أكل ياباني جديد في الزمالك

الزمالك ممكن تكون أكثر منطقة اشتهرت بمحلات السوشي في مصر، يمكن السوشي اتشهر كمان علشان أكلة جديدة وطعمها غريب وإحنا بـ نحب التغيير، “تسونامي سوشي – Tsunami Sushi” مطعم سوشي جديد فتح في الزمالك في 26 يوليو في الشارع اللي على ناصيته مكتبة ديوان.

المكان من بره بمدخل شكله شيك ونظيف، هو مكان صغير وتقريبًا عدد الترابيزات فيه ما يكملوش ثلاث أو أربع ترابيزات بس مريح جدًا، وإحنا قاعدين شايفينهم وهما بـ يعملوا السوشي أمامنا لأنهم واقفين وراء بار صغير عبارة عن زجاج شفاف، ولابسين اللبس الياباني المعروف الروب الطويل مع البنطلون الواسع.

أول ما وصلنا وقعدنا الجرسون جاء لنا ورحب بنا بطريقة لطيفة وقدم لنا مشروب ترحيبي من المكان، كنا أول مرة نأكل سوشي وأول ما جاء لنا المنيو طلبنا منه يساعدنا علشان أسماء الأطباق كانت غريبة بالنسبة لنا وعلشان نعرف أحسن حاجة في المنيو أو هو ممكن يرشح لنا إيه، وفعلاً ساعدنا ورشح لنا طبق اسمه هوت دايناميت شريمب (50 جنيه) وقال لنا أن هما متخصصين في الطبق ده، وهو 8 قطع عبارة عن جمبري وكريمي تشيز وأفوكادو وفريش سلامون ملفوفين بأعشاب بحرية، طعم الكريمي تشيز مع الجمبري كان لا يوصف، طلبنا معاهم طبق فيلادلفيا رول (55 جنيه) 8 قطع من جبنة الفيلادلفيا مع والخيار والأفوكادو ملفوفين بسلامون مدخن، اختيار الجبنة مع الأرز مع السلامون له طعم لذيذ جدًا للسوشي، وكل دول كان معاهم الصويا صوص وديناميت شريمب صوص.

طلبنا كمان طبق مقبلات اسمه تمبورا موري (50 جنيه) كان فيه قطعتين جمبري وقطعتين كاليماري مع قطع خضار (باذنجان، بصل، طماطم، كوسة) مقليين بطريقة خفيفة ولذيذة معاهم صوص التامبورا، بعد ما أكلنا كنا عاوزين نجرب الحلو بس كنا شبعنا وما كانش فيه مكان لأكل ثاني.

الخدمة في تسونامي كانت ممتازة والترحيب كان لطيف جدًا، وطعم السوشي مع مزيكا فرانك سيناترا والمكان المريح خلانا مش عاوزين نقوم منه، بالنسبة لنا كانت أول تجربة مع السوشي وكانت في المكان المناسب وأكيد هـ نرجع ثاني.

نصيحة 360

لازم تجربوا أطباق الدينامايت بتاعتهم.

أحسن حاجة

بالنسبة لأسعار السوشي، تسونامي أسعاره معقولة جدًا.

أسوأ حاجة

المقبلات كانت قليلة شوية.

Map Data
Map data ©2016
Map DataMap data ©2016
Map data ©2016

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح