الزمالك, Cairo_360_cairo_by_area - كايرو 360
القاهرة بالمناطق

الزمالك

الزمالك

جزيرة الزمالك موجودة بين وسط البلد من ناحية والجيزة من الناحية الثانية، بـ يطلقوا عليها "مانهاتن القاهرة" لأن معروف عنها أنها واحدة من أحياء القاهرة الأكثر ثراءً، الجزيرة فيها الكثير من المرافق الراقية، ومشهور عنها أن بـ يسكنها الطبقة الغنية والأجانب بسبب وجود العديد من السفارات ولأنها كمان من الأحياء الآمنة اللى تقدر تعيش فيها، الزمالك لوحدها فيها 2 مليون ساكن تقريبًا.

الوصول للزمالك سهل جدًا خاصة مع وجود كباري متعددة بـ توصل لها زي كوبري قصر النيل الشهير فى الجنوب. وفيه كوبري 6 أكتوبر فى المنتصف وكوبري 15 مايو فى الشمال. إلى جانب محطة مترو اسمها "الأوبرا" وهي بالفعل جنب دار الأوبرا وممكن توصل منها إلى الزمالك من خلال المواصلات العامة، وفيه معدية مركب نهري من شارع أبو الفدا لحد إمبابة، وهـ تلاقى دائمًا تاكسيات كثيرة موجودين فى المنطقة.

كان بـ يطلق على الزمالك زمان "حديقة النباتات" أو Jardin des plantes علشان كان فيها مجموعة كبيرة من النباتات الغريبة فى كثير من المشاتل الزراعية، ولحد دلوقت الزمالك بـ تتميز بوجود الكثير من المشاتل دي.

على مدار تاريخ الزمالك كان دائمًا بـ يطلق عليها "جزيرة"، لكن النهارده البعض منا بـ يطلق على الجزء الجنوبى منها اسم "جزيرة" والجزء الشمالى اسم "زمالك"، وفيه أقاويل كثيرة بـ تحكى أصل كلمة "الزمالك" وليه تم تسميته بالاسم ده، أشهرها أنه كان فى يوم من الأيام سكن قبيلة من الصيادين في الجزيرة وكان اسمهم "زمالك" وهي غالبًا اسم مأخوذ من كلمة تركية منذ العصر العثمانى.

أغلب الشوارع فى الزمالك لها أسماء متعددة على مدار الزمن، اللى نعرفه أن شارع 26 يوليو تم تسميته من قبل باسم "شارع فاروق" وكان فيه خط ترام طريقه بـ يوصل لحد الأهرامات.

واللى نعرفه أن شارع حسن صبري كان اسمه شارع الجبلاية "سابقًا"، لكن الشارع اللى بـ يحمل الاسم ده (الجبلاية) موجود دلوقت بمحاذاة النيل ما بين كوبري 6 أكتوبر وكوبري 15 مايو. ولأن أغلب الزمالك كان بـ يسكنه الطبقة الغنية هـ تلاقى كثير من بيوتهم وقصورهم لسه موجودة لكنها تحولت إما إلى فنادق أو سفارات، فندق الماريوت –على سبيل المثال- كان قصر صيفى بـ يملكه العائلة المالكة فى مصر.

تم إنشاء نادي الجزيرة عام 1882 وهو من أقدم نوادي القاهرة، مساحة النادي واخدة تقريبًا نصف مساحة الجزيرة ومازال من الأماكن الترفيهية المعروفة، فى جنوب نادي الجزيرة موجود دار الأوبرا المصرية واللى تم بناؤها على مساحة كبيرة وبـ تضم عدد كبير من المتاحف والمسارح، وهناك بـ يقام العديد من الحفلات والندوات لفنانين محليين وعالميين ولها جدول متنوع.

الزمالك مكان مشهور بخروجاته وكافيهاته وباراته ومطاعمه الكثيرة، أغلب المطاعم فى الزمالك زي "لابوديجا" و"أبرتيفيو" يعتبروا أسطوريين، وكمان فيه "سيكويا" موجود فى المنطقة الشمالية وبـ يطل على منظر خلاب للنيل، ومؤخرًا فيه "مجمع 33" فى شارع أبو الفدا واللى بـ يضم العديد من المطاعم والكافيهات كلها بـ تطل على نهر النيل. وبصرف النظر عن أن الزمالك مكان رائع للتسوق فالمنطقة دي فيها كمية مش طبيعية من المحلات الروشة اللي بـ يباع فيها منتجات فنية بطابع مصري وفيها لمسة مودرن، أغلب محلات الملابس فى الزمالك بـ تبيع ماركات عالمية ودائمًا هـ تعرف تتابع الجديد فى الموضة.

كمان فى الزمالك هـ تلاقى "الفن" نابض للحياة، بجانب دار الأوبرا المصرية فيه متاحف كثيرة جدًا وآرت جاليري وستوديوهات ومراكز ثقافية. أغلب الدول الأوربية عندها مراكز ثقافية ممكن تستمتع فيها بعرض فيلم أو تأخذ كورس تعليم لغة، وتحت كوبري 15 مايو هـ تلاقى ساقية عبد المنعم الصاوي اللى تم بناؤه مكان مقلب قمامة علشان يغير المكان ده ويصبح مركز بـ يقدم أنشطة مختلفة يوميًا من ندوات لحفلات لمهرجانات، وكمان هـ تلاقى مكتبة القاهرة الكبرى فى شارع محمد مظهر.

الجو على الجزيرة مريح للأعصاب، حتى أن المشي فى شوارعها المغطاة بأوراق الشجر المتساقط متعة ما بعدها متعة. وأفضل حاجة فى المنطقة المعمار بتاعها، فيه بنايات كثيرة زي قصر بهلر ومبنى فيكتوريا المشهورين بتصميماتهم الفريدة. الناس فى الزمالك خليط من الغنى والفقر، وأنت ماشي ممكن بسهولة تشوف سيدة لابسة هدوم متواضعة وبسيطة وجنبها ماشي شباب شيك وبـ يتسوقوا فى كل مكان.

الزمالك كمان صديقة للحيوانات ممكن تأخذ كلبك أو قطتك معاك وأنت ماشي بأمان، والناس هناك عارفين المنطقة كويس وهـ يساعدوك لو ضليت طريقك.

المشكلة اللى ممكن تكون ملحوظة هناك هى المواصلات.. خاصة فى وقت الذروة والزحمة لأن الجزيرة مافيش ثانيتين وتلاقي جزيرة الزمالك اكتظت بالعربيات، الأفضل هناك أنك تأخذها مشي بدل ما تأخذ عربيتك، الزمالك منطقة صاخبة ومش صعب أننا نفهم ليه الملوك والملكات أتخذوها مكان للإقامة في يوم من الأيام.

الخريطه
الأبرز
مطاعم
تافولينو: طعم أصلي وأطباق مبتكرة في مطعم إيطالي فخم

تافولينو: طعم أصلي وأطباق مبتكرة في مطعم إيطالي فخم

إحنا عارفين إن مافيش أكتر من المطاعم الإيطالي في كايرو، بس برضه معظمنا متفقين إن قليل منهم اللي بيعرف يعمل الصح. تافولينو من أحسن المطاعم اللي بتعمل أكل إيطالي بجد. لو بصيت على المطعم الموجود في شارع متفرع من أبو الفدا في الزمالك هتفتكره صغير، لكن الموضوع من جوه حاجة تانية. المطعم مميز بديكورات بسيطة بحوائط من الحجر الأبيض مع لمسات من الخشب وبراويز أبيض وأسود ومرايات مثلثة، ويمكن السلبية الوحيدة كانت الإضاءة الصفراء. ننسى الديكورات شوية ونروح للأكل، والبداية مع كانيلوني (70 جنيه) من "المنيو الإيطالي الجديدة"، والمنيو دي ميزتها أنهم مدخلين فيها أفكار جديدة على الأكل الإيطالي التقليدي. ست قطع كانيلوني مستويين كويس جدًا وعليهم صلصة طماطم – طعمها قريب من صوص المارينارا –وصوص بيستو. شوية صوص الجورجونزولا عملوا طعم مميز، وبصراحة الطبق ده أثبت إن تافولينو هو أحسن واحد يوفق نكهات الأكل مع بعض ويعمل منهم أكلة لذيذة. من الحاجات اللي جربناها من "المنيو الإيطالي الجديدة" تندرولين على الحطب (235 جنيه)، وده بيكون ستيك تندرولين مستوي medium-well على معجنات محشية مشروم سوتيه وسبانخ وبصل، ومعاهم صوص ثوم حلو ومربى بلو بيري على بصل بطعمها الحلو والحادق المميز. بصراحة الطبق كان مبهر، مش بس علشان طعم الستيك الرائع الغني بالتوابل الإيطالية اللذيذة، العجينة المحشية مشروم كانت مقرمشة وطعم المربى الرائع مع صوص الثوم المسكر عملوا طبق خيالي. مع أخر طبق قررنا نرجع لقواعدنا سالمين ونطلب ريزوتو ألا بيسكاتورا (120 جنيه). الطبق كان غني بالكريمة والتتبيلة القوية مع جمبري وبلح بحر، وكان ممكن الطبق يكون مثالي لولا إن الكابوريا كانت مش ماسكة نفسها بزيادة والكاليماري صعب المضغ. من الحاجات اللي قللت من قوة تافولينو إن وقت زيارتنا طبق الحلو الوحيد الموجود كان آيس كريم أند سوربيت (50 جنيه) اللي بيتكون من 3 بولات آيس كريم من موفنبيك. كل اللي فات حاجات بسيطة مش هتقلل من جمال الأكلة الرائعة، وبصراحة تافولينو فاجئونا بطعم الأكل المختلف، خصوصًا الحاجات اللي جربناها من "المنيو الإيطالي الجديدة"، واللي ساعدتهم أنهم يتميزوا عن باقي المطاعم الموجودة على الساحة. تافولينو مش مطعم إيطالي عادي.
كافيهات
جوز شوكليت بار: منيو صغيرة وطعم مميز من أخصائي الشوكولاتة في الزمالك

جوز شوكليت بار: منيو صغيرة وطعم مميز من أخصائي الشوكولاتة في الزمالك

أهل الزمالك كانوا بيشتكوا إن ملوك الحلويات مش فاكرينهم، يعني سكان المعادي عندهم برو أند تشو يمتعهم بحلوياته، وعائلات القاهرة الجديدة ومدينة نصر و6 أكتوبر عايشين حياتهم مع ديب أند ديب، بس الكلام ده اتغير خالص. جوزشوكليت بار وصل يا زمالكاوية في شارع طه حسين وهيحقق كل أحلام عشاق الشوكولاتة. مطعم جوزمقسوم دورين، الدور الأول مش هتلاحظ فيه حاجة مميزة إلا إن التدخين مسموح، أما الدور الأرضي فهو مسقط رأس الشوكولاتة. أول حاجة هتلاحظها هي رسومات شيكولاتة على الحيطة – اللي متركبة مقلوبة بحيث تعمل شكل موجات شوكولاتة – مع الإضاءة الهادية والأجواء المريحة للأعصاب. المنيو محدودة ومافيش فيها حاجة مُلفتة للانتباه، بس عمومًا إحنا طلبنا مولتن شوكلت كيك (47 جنيه) وكريب تريبل شوكليت (41 جنيه) وصنف جديد الجرسون كان مُصر إننا نجربه وهو أوريو وافل (49 جنيه). طعم الشوكولاتة في المولتن شوكلت كيك كان قوي والكيكة طرية جدًا وكمان قلبها كان عامل زي قوام البودينج، ونقدر نقول أنه طبق حلو هايل وسكره مضبوط ومستوي في الفرن كويس جدًا. الفكرة هنا أن الآيس كريم كان أحسن يتقدم لوحده علشان سخونية الكيكة سيحته بسرعة. التريبل شوكليت كريب كان على نفس المستوى، ثلاث قطع كريب مثلثة خفيفة، وكل واحدة منهم محشية كمية محترمة من شوكولاتة باللبن ومرشوش فوقهم شوكولاتة بيضاء ولبن وداكنة. طلبنا منهم كمان يضيفوا فواكه (10 جنيه) عبارة عن مكعبات كيوي وموز وفراولة، والجميل أنهم كانوا طازة رغم إننا مادخلناش على موسم الفراولة. لما طلبنا أوريو وافل توقعناه يكون وافل عليه شوية قطع أوريو على الوش وشكرًا، بس المفاجئة أن عجينة الوافل كانت محشية طبقة أوريو. صحيح الوافل كانت محتاجة شوكولاتة باللبن ومش بتتمضغ بسهولة لحد ما، بس العجينة كانت طرية ومقرمشة، وطعم الأوريو كان واضح في كل قطمة. أكيد چوزشوكليت بار أبهرونا بحلوياتهم الرائعة، بس أكيد المنيو محتاجة تنوع أكبر. مافيش شك إننا هنرجع علشان نخبط واحدة مولتن شوكليت كيك.
القاهرة بالليل
ليمونادا: سحور مميز في خيمة ليمون تري & كو الرمضانية

ليمونادا: سحور مميز في خيمة ليمون تري & كو الرمضانية

وسط عدد كبير من المطاعم في القاهرة، من الجميل أنك تشوف إزاي الأماكن دي بـ تتعامل مع متطلبات رمضان وأجوائه، شوية منهم بـ يعمل منيو مخصوص للشهر الكريم، شوية ثانيين بـ يتحولوا لخيمة لتقديم تجربة رمضانية مخصوصة، السؤال دلوقت طالما فيه أماكن كثيرة كده، إيه اللي يميز واحد منهم عن الباقي؟ المكان الشهير في الزمالك "ليمون تري & كو The Lemon Tree & Co." دائمًا عنده الجديد وقدر يثبت نفسه كواحد من أهم أماكن السهرات في القاهرة، خيمتهم الرمضانية ليمونادا الموجودة على سطح مركب إمبريال بـ تقدم نفس الأجواء، فكان طبيعي أننا نروح ونستمتع بسحور على طريقتهم. إحنا دخلنا من هنا واتصدمنا من جمال الديكورات الساحرة والأجواء الرائعة، فوانيس وأصيص زرع روعة كانوا متوزعين في كل مكان، على السقف والترابيزات والحوائط، وعملوا إضاءة خافتة مع أجواء لا تقاوم، أكثر حاجة بـ نحبها في ليمونادا هي: الأجواء، والموضوع ده اكتمل بقطع من الخيامية في المكان والموسيقى الساحرة اللي عملوها مخصوص بنفسهم. قعدنا على ترابيزة عالية عن الأرض، وبعد شوية حسّينا أنها مش مريحة لحد كبير، المهم في الموضوع كان المنظر الرائع للفلوكات بأنوارها الزاهية في النيل، وإحنا بـ نتفرج على المنيو قولنا ما ينفعش نكون في ليمونادا وما نطلبش ليمون، من هنا طلبناه (20 جنيه) مع آيس تي بالخوخ (28 جنيه)، طعم الليمون كان مضبوط، لا هو مسكر زيادة ولا مزز زيادة، ودي حاجة صعب تلاقيها اليومين دول، الآيس تي كان محتاج يكون أسقع شوية، بس طعمه لذيذ مافيش كلام. وإحنا بـ نستلم منيو الأكل لاحظنا أن الجرسونات هناك ودودين ومركزين جدًا، بس الفكرة أننا توقعنا أنهم وسط زحمة السحور مش هـ يحافظوا على مستواهم، وكنا غلطانين، بالنسبة للمقبلات، طلبنا كبيبة لافا (42 جنيه)، وفلافل (26 جنيه) وباتر بابريكا سويت كورن (32 جنيه). الكبيبة كانت حلوة جدًا خصوصًا أن الجبنة مش طاغية على الطعم، الفلافل كانت ناقصها نكهة الفلافل المعروفة، بس مع العيش الساخن الموضوع كان كويس. السويت كورن كان زي ما الكتاب بـ يقول، زبدة كثير ولونه ذهبي، ورغم أن البابريكا كانت قليلة بس أكيد أضافت للطعم نكهة مميزة. بالنسبة للأطباق الرئيسية قررنا نجرب شوية أنواع فطير، من بين أنواع كثيرة موجودة، اختارنا فطيرة تشيكن روزماري وواحدة سجق (78 جنيه للواحدة). التشيكن روزماري كانت لذيذة، وشوية الروزماري عليها كانوا هايلين مع الفراخ والجبن، السجق كمان كانت ممتازة، وصحيح الرمان اللي عليها كان غريب شوية في الأول، بس طعمه كان هايل مع الفلفل الرومي والسجق. قبل ما نطلب الحلو نفسنا راحت للشيشة، فطلبنا واحدة بلوميست (35 جنيه) من مسؤول الشيشة اللطيف، وهو كان عند حسن ظننا في نكهة الشيشة وتغيير الولعة، خلاص جاء وقت الحلو، والحلو كان زلابية يوناني (48 جنيه) وميكس بيري مادنيس (52 جنيه)، مافيش كلام أن الزلابية كانت محتاجة تكون سخنة شوية، بس طعمها كان لذيذ، وإضافة الزلابية كمان كانت فكرة عبقرية وأضافت كثير للطبق، كوكتيل التوت كمان كان بركان من التوت اللذيذ فوق كيك المارينج وعليهم بولة آيس كريم روعة؛ ننصحكم تجربوها لو لكم في الحلويات. عمومًا، رغم أن الأسعار غالية شوية هناك، بس الليلة كانت ممتعة، وأكيد هـ نروح هناك ثاني.
فن وثقافة
قاعة الزمالك للفن: معرض الخيط السحري للفنانة سعاد مردم بك

قاعة الزمالك للفن: معرض الخيط السحري للفنانة سعاد مردم بك

"العين هي نافذة الروح".. مقولة قديمة بـ تلخص لنا فكرة المعرض الموجود حاليًا في قاعة الزمالك للفن تحت عنوان "الخيط السحري". معرض "الخيط السحري" بـ يقدم مجموعة لوحات مميزة بروح طفولية من إبداع الفنانة السورية سعاد مردم بك اللي قدرت تعبر عن عاطفتها القوية من خلال موهبتها الفنية في الرسم وتعبر عنها بعيون كل لوحة من لوحاتها. في كل لوحة منهم بـ نشوف شخصية مختلفة، بس العامل المشترك بينهم هو شكل العيون الواضح فيها حالة من الحزن أو الحسرة واللي ممكن تتفهم بشكل مختلف على حسب رؤية ونظرة المتفرج. واحدة من اللوح فيها بنت –طفلة غالبًا– رأسها مايل على جنب، وبـ تشم وردة بيضاء وعيونها الكبيرة تحس كأنها خارجة من اللوحة وظاهر فيهم حالة من الحزن، اللوحة بشكل عام تتميز بالبساطة، إلا العيون؛ رسمة عيونها مليانة تفاصيل وحجمها أكبر من الطبيعي علشان تجذب المشاهد وتخطف انتباهه. أما بالنسبة لخلفية اللوحة، سعاد استخدمت لون واحد علشان تحافظ على بساطة الرسمة، وكمان تقدر أنها تركز كل الانتباه على رسمة الطفلة المرسومة بطريقة ثنائية الأبعاد2D ، زي اللي بـ نشوفها في كتب الأطفال. واحدة ثانية من لوحات سعاد المميزة فيها رسمة لبنت صغيرة أو يمكن تكون عروسة لعبة، لابسة فستان وردي فاتح وماكياج، وبـ تبص في مراية بعيونها الكبيرة الحزينة، وده عنصر مشترك في كثير من أعمال سعاد الفنية. اختيار اسم "الخيط السحري" مش مجرد عنوان للمعرض المميز بشكله الطفولي، لكن كمان بـ يوضح فكرة ألعاب وعرائس الأطفال اللي بـ تدب فيها الحياة، وده بـ نشوفه واضح في عيونهم المعبرة اللي تعتبر المحور الأساسي اللي بـ يدور حوله المعرض. مافيش شك أن معرض سعاد مردم بك بمجموعته المميزة من اللوحات وستايله الطفولي البسيط يعتبر إضافة هايلة للساحة الفنية، ونجح في جذب جمهور كبير من عشاق الفن في القاهرة.
تسوق
بوتيك 17: بوتيك مختلف ممكن تروحيه في الزمالك

بوتيك 17: بوتيك مختلف ممكن تروحيه في الزمالك

كلنا عارفين أن كل شوية أهل القاهرة بيجي لهم هوس بفكرة معينة، تلاقي الشعب كله متجه لتنفيذ الفكرة دي؛ يعني مثلًا ينجح محل كب كيكس، تلاقي أربعة محلات كب كيكس فتحوا دفعة واحدة... برجر مثلًا، وهكذا. من ضمن الحاجات اللي انتشرت فجأة وبقت بيزنس مربح جدًا الأيام دي هو بوتيكات اللبس الحريمي؛ في الأول الموضوع كان جديد، والواحد كان مبهور بفكرة الملابس اللي جاية من بره واللي المفروض مش هتلاقي حد تاني لابسها. ولكن الموضوع فقد أهميته بعد ما بدأت البوتيكات في الانتشار بشكل مبالغ فيه، والمنتجات اللي المفروض أنها مختلفة بقت تقريبًا نفس القطع في أماكن مختلفة وبأسعار متفاوتة. وبما أن البوتيكات كثيرة في الزمالك، توقعنا أن بوتيك17 Boutique 17 - هيبقى مجرد واحد من ضمن البوتيكات اللي انضمت للموجة، ولكن انطباعنا اختلف كثير بعد زيارتنا له. في مكان هادي في منطقة الزمالك –جنب محل كوتون بول في شارع أحمد حشمت- بوتيك 17 موجود في مكان صغير بواجهة أنيقة مكونة من واجهة زجاجية فيها مانيكان وحيدة وفوقها اللوجو باللون الفضي على خلفية رمادي. وبالرغم من مساحة المحل الصغيرة، إلا أن أول حاجة لفتت نظرنا كانت نظام العرض؛ كل في المنتصف حوالي 4 شماعات كبار متقسمة عليهم الملابس على حسب مجموعتهم اللونية. أول مجموعة كان اللون الأساسي فيها هو اللون المرجاني (فوشيا + برتقاني)؛ ما بين المجموعة دي عجبنا قميص طويل وواسع (405 جنيه بعد الخصم) وفي نص الظهر فيه رسوم لأشخاص بخياطة، ومن نفس المجموعة كان فيه تي شيرت مطبوع عليها صورة (315 جنيه) وتميزت أن قماشها قطني خفيف. المجموعة الثانية كانت للألوان المحايدة، زي الأبيض، الأسود والرمادي. ومعظم قطع المجموعة دي كانت عبارة عن كارديجانز عجبنا منهم واحد باللون الأبيض طويل من الدانتيل (700 جنيه)، ومن نفس اللون توب أبيض بكمام وفيه من على جانب منه حركة بنفس القماش بس محددة بكنار من اللون الكحلي (700 جنيه). من الألوان الثانية لاقينا توب أصفر مخرم (400 جنيه) وبلوزة من الحرير لونها أخضر سعرها (600 جنيه). في نصف المحل معرض على شماعة أقصر وأصغر مجموعة من الهوت شورتس الجينز و مجموعة محدودة من المايوهات البيكيني. الهوت شورتس عجبنا منهم واحد على أطرافه كنار من القماش المنقوش بأشكال هندسية (400 جنيه). طبعًا مش هنقدر نختلف على معلومة أن الأسعار غالية جدًا-حتى أكثر من البوتيكات العادية- ولكن علشان نبقى منصفين القطع مختلفة تمامًا عن القطع المعروضة في أغلب البوتيكات اللي روحناها قبل كده. وحتى الذوق والخامة فهم أحلى بكثير من القطع اللي بنشوفها في المعتاد. بوتيك 17 – Boutique 17 مكان مميز تشتري منه قطعة مختلفة لدولابك، صحيح وارد جدًا المحفظة تشتكي من هزال بعدها، بس المحل عامل حاليًا خصم 30% على قطع معينة فممكن تستفيدي منه.
صحة ولياقة
مودرا يوجا ستوديو: واحة للصفاء الذهني والنفسي في الزمالك

مودرا يوجا ستوديو: واحة للصفاء الذهني والنفسي في الزمالك

ما كناش عايزين نبدأ المقال بكلام عن "صعوبة الحياة في المدينة في عصر ما بعد الحداثة" -الكلام الكبير ده هزار على فكرة- وقد إيه رتم الحياة السريع في الزمن ده مش مخلينا عارفين نرتاح. بالرغم من أن الكلام ده كليشيه وسمعناه كثير، إلا أنه للأسف واقع، وواقع عالمي كمان. صحيح إحنا بنحب القاهرة، إلا أن الواحد برضه يقول اللي ليها واللي عليها؛ القاهرة بزحمتها وحرها ودوّشتها بتخلي الواحد دماغه تلف... ضيف على كده بقى ضغوط الشغل والحياة اليومية والمسؤوليات، نكدنا عليك؟ تمام، إحنا شخصيًا بنعاني من كل ده وما فيش وقت يسمح إننا نسافر برة القاهرة علشان "نطفي مَكَن"، فقررنا أننا نروح حصة يوجا من باب التجربة... أهو... يمكن الموود يتعدل شوية، وبالمرة قررنا نحكي لكم عن التجربة دي، واللي قمنا بيها في مودرا يوجا ستوديو – Mudra Yoga Studio في الزمالك. للي يعرف فين كافيه صوفي في الزمالك، مودرا موجود في نفس العمارة اللي فيها صوفي في الدور اللي فوقيه على طول في الشقة اللي في الوسط. أول ما بتدخل بتقلع الجزمة على الباب –ودي كانت حاجة موترة للأعصاب جدًا بالنسبة لنا، مع أننا بنغسل رجلينا والله- فاعمل حسابك كده وأنت رايح علشان ما تتفاجئش، وممكن طبعًا تفضل بالشراب، المهم تمشي حافي وخلاص. المدربين في مودرا لطاف جدًا وودودين، وهيحسسوك أنك في بيتك فما تقلقش، قبل ما تدخل الحصة هيسألوك لو عندك أي مشاكل صحية أو بتحس بوجع في أي مكان في جسمك. إحنا كنا داخلين حصة واحدة من غير اشتراك عضوية فدفعنا 100 جنيه –سعر الحصة- إنما أنت لو عايز اشتراك، ففيه عضوية لعدد 8 حصص سعرهم 650 جنيه، أو 12 حصة بـ 800 جنيه. طبعًا إحنا دي من المرات المعدودات في حياتنا اللي نلعب فيها يوجا، وده اللي وضحناه لمدربنا "ناصر"، واللي بدأ معنا الحصة بمجموعة من الإحماءات الخفيفة، وطلب مننا أن ما نضغطش على نفسنا بدنيًا تحت أي ظرف من الظروف، وده كان شيء مريح. بعد مجموعة من حركات اليوجا البسيطة جدًا –والمتعبة جدًا لحد لياقته البدنية على قده زيّنا- كان فيه فترة تأمل وإحنا في وضع (السافاسانا) وهو يشبه وضع الجثة (بالبلدي نايم على الأرض على ضهرك)، المدرب طلب مننا أننا نغمض عنينا وغماها بكيس فيه نبات اللافندر وهدأ الأنوار، وفضلنا كده حبة حلوين. بالرغم من أن الوضع اللي إحنا كنا عليه يبان سهل وبسيط، إلا أن فكرة تصفية الذهن من كل حاجة من أصعب الحاجات اللي قابلناها في التجربة. واللي نعرفه أن التأمل هو كمان زي الرياضة محتاج تمرين، فممكن جدًا أنك تواجه صعوبة فيه زي حالتنا. بعد ما خلصنا نظفنا الـ Mat (السجادة اللي بنلعب عليها يوجا) بنفسنا ورجعناها مكانها، غيّرنا هدومنا في الحمام الموجود في المكان واسترخينا لفترة في القاعة الخارجية علشان نتأهل للخروج للعالم الخارجي مرة ثانية. صحيح التجربة كانت غريبة علينا ولكن كانت حلوة جدًا، جلسة التأمل بالنسبة لنا كان تعذيب لأن مخّنا مش واخد عليه ولكن اليوجا كرياضة جرت الدم في عروقنا وغيرت موودنا تمامًا. عن نفسنا إحنا ناويين نرجع ثاني لمودرا.

الأجندة

السبت 10
حفلين لفريق مسار إجباري في ساقية الصاوي
Dec 10 4:00 pm to Dec 10 11:00 pm -
تستضيف ساقية الصاوي حفلين متتاليين لفريق مسار إجباري على مسرح قاعة النهر. سعر تذكرة الحفل: 60 جنيه. التفاصيل من هنا.
مناطق اخرى
الدقي
الدقي
الزمالك
الزمالك
السادس من أكتوبر
السادس من أكتوبر
القاهرة الجديدة
القاهرة الجديدة
المعادي
المعادي
المهندسين
المهندسين
جيزة
جيزة
مدينة نصر
مدينة نصر
مصر الجديدة
مصر الجديدة
وسط البلد
وسط البلد
مواضيع خاصة

دليل #كايرو_360 لأسعار حلاوة المولد في القاهرة

مولد النبي. أحلى وأجمل مناسبة بنستناها دايمًا من السنة للسنة. وكلنا بنلاحظ الفرحة والبهجة اللي بتنشرها المناسبة دي في القاهرة. طبعًا أولها فرحة حلاوة المولد اللي بن