The Definitive Guide to Living in the Capital , Cairo , Egypt

فكرة "كُل اللي تقدر عليه" أو All you can Eat عاملة زي السحر في القاهرة، والسبب طبعًا معروف، إحنا شعب بيعشق الأكل، أوقات بيكون صعب الوصول لمرحلة التوازن بين كمية الأكل الموجودة العالية، ودي حاجة كنا عاوزين نختبرها في المطعم البرازيلي­­ تشوراسكو – Churrasco (كلمة أسبانية معناها اللحم المشوي) الموجود في داون تاون مول.

نتكلم الأول عن ديكورات تشوراسكو المبهجة من الحوائط بلونها الأصفر والأزرق، للسقف الشبيه بالسماء والبوستر الضخم اللي فيه لمحات من الثقافة البرازيلية زي رقص السامبا، بس يفضل سحر المطعم الحقيقي هو منظر الجرسونات وهم بيلفوا حول الترابيزات بأسياخ اللحم المشوي وجاهزين يقدموها على ترابيزتك.

الموضوع هيكون غريب شوية على الناس الجديدة، بس عمومًا منيو تشوراسكو مقسمة 3 أقسام: الأول فيه سمّان مشوي وسجق وأجنحة فراخ، والثاني فيه فراخ مشوية منها دبابيس فراخ، وأخيرًا القسم الثالث هتلاقي فيه اللحم البتلو والضاني، بعيدًا عن عرض كُل اللي تقدر عليه بـ 200 جنيه، عندك كمان اختيار ثاني وهو: اختار صنفين من القسم الأول وصنف من القسمين الباقيين وادفع 140 جنيه.

بدأنا مع فاصوليا خضراء وحمراء من بار السلاطة تتبيلتهم كانت هايلة، بس المشكلة أنه ناقصه كثير من الأكلات البرازيلية المميزة زي الجمبري بالأفوكادو والفراخ السبايسي بالذرة اللي كان نفسنا نجربها.

نروح للأطباق الجانبية اللذيذة المقدمة في أطباق معدن على البوفيه، وأبرزها كان البطاطس المهروسة بتتبيلتها الرائعة وطعمها اللذيذة، والأرز الخفيف بنكهته الجميلة.

مطاعم المشاوي البرازيلية لها ستايلها المميز، يعني هتشوفهم بيعملوا الفراخ أو اللحم الضاني أو البتلو على أسياخ بتتشوي على الفحم أو الخشب، وبعدين يقطعوها ويقدموها على أطباق، والفكرة هنا أن البرازيلين بيعموا الأكل بالطريقة دي علشان يطلع طازج وطري.

بدأنا رحلة المشاوي مع الكودرونيزCodorniz  (عبارة عن سمّان متبّل بالعسل والبرتقال) طعمه لذيذ خصوصًا مع إضافة طعم العسل المسكّر، بس ما قدرناش نميّز طعم البرتقال.

نروح لطبق ثاني وهو "أسس دي فرانجو –Asas De Frango " (عبارة عن أجنحة فراخ سبايسي) وكان واضح فيها تتبيلة لذيذة، بس المشكلة أن قطع الفراخ نفسها مش مستوية كويس، أما أكلة لينجويكا برازيليان –  Linguica-Brazilianوهي عبارة عن سجق بصوص الباربيكيو تتبيلته روعة ومشطشط شوية فكانت هي طبق اليوم بدون منازع.

وصلنا عند فرانجو –Frango  (عبارة عن فراخ مخلية) وكان فيها قطع فراخ محروقة نوعًا ما وقطع ثانية محتاجة وقت أطول على الشواية، أما دبابيس الفراخ اللي قُدمت بعد كده فكانت لذيذة وتتبيلتها هايلة.

بعدها كنا على أمل نجرب طعم أقوى مع اللحم البتلو والضاني، والبداية مع كوريديرو –Cordeiro (عبارة عن فخذ خروف مخلي بالليمون والنعناع) اللي كان مفاجأة بنكهة الليمون الهايلة واللحم الطري، أما فيتيلا – Vitela (مكعبات بتلو بتتبيلة الثوم) فكانت صعبة المضغ ومحتاجة تتبيلة تميزها.

وصلنا لفقرة الحلو، وعلشان مافيش تنوع عندهم، ما كانش قصادنا غير أننا نجرب Abacaxi-Caramelised (عبارة عن أناناس مشوي بالقرفة) وكان واضح فيها نكهة القرفة القوية من بره، ومن جوه كان قلب الأناناسة سليم رغم أن الأحسن في رأينا أنه يتشال.

على العموم، خرجنا من تشوراسكو بمشاعر متضاربة؛ يعني مثلًا المشويات كانت متواضعة، بس من الناحية الثانية في حاجات مشوية منها السجق بصوص الباربكيو كان كويس جدًا، نقدر كمان نقول أن وجود مطعم برازيلي جديد ينافس مطعم كاسا دي كارني الموجود في المعادي كان هايل، بس المشكلة هنا هي مستوى تشوراسكو المتذبذب.