The Definitive Guide to Living in the Capital , Cairo , Egypt

مطاعم
دار القمر إكسبريس

دار القمر: أكل شامي لذيذ في المعادي

تم التقييم بواسطة
Nour Motawa
قيم
قيم الآن
دار القمر: أكل شامي لذيذ في المعادي

لما بـ نبقى عايزين نأكل في
السريع وما ندفعش كثير، بـ نلاقي اختيارات أكل مليانة سعرات حرارية ونادرًا ما بـ
نلاقي وجبة غنية بالبروتين أو الخضار الصابح. ورغم أن احنا بـ نشجع أنك تطلب في
الرخيص، بس صحتك برضه مش حاجة ينفع تهملها. لوعاوز مكان يجمع بين الاثنين، فيه السلاطة
الفريش ولحوم نظيفة سعرها على قد الجيب جرب «دار القمر».

«دار القمر» فرع المعادي مكان حلو
ممكن تخرج فيه خروجة مافيهاش تكليف مع شلة أصحاب. المكان كبير والخدمة كويسة، المشكلة
الوحيدة في الركنة، والمطعم موجود في شارع النصر في المعادي الجديدة والشارع ده
على طول زحمة.

«دار القمر» بـ يقدم مجموعة كبيرة
من الأطباق الشامية الأصلية من أول السلاطات زي التبولة، الفتوش، بابا غنوج، الحمص
وكمان المناقيش الرائعة واللحمة المشوية. العصائر الفريش حلوة والرز باللبن وعليه قرفة
ومكسرات كثيرة طعمه ممتاز وأفضل طريقة بها تنهي وجبتك. حبينا فكرة أن المطعم بسيط
بس بـ يقدم أكل معمول بطريقة سليمة وطِعمة، اللحمة والسلاطة طعمهم حلو قوي زي ما
نكون أكلناها في فلسطين والمناقيش الصابحة كأنها من جبال لبنان.

علشان تأكل وجبة متكاملة وتستمتع
بها، اختار الأول سلاطة (من 8: 15 جنيه)؛ الحمص والفتوش طعمهم حلو قوي وما ينفعش
تفوتهم. بالنسبة إلى الطبق الرئيسي، اطلب «ميكس جريل» (45 جنيه) أو طبق كباب (35
جنيه) ومنقوشة أو اثنين (من 8: 15 جنيه) وده طبعًا لك ولأصحابك. اللحمة المشوية معمولة
بحرفية وبـ تتقدم بالطريقة الشامية بالعيش الشامي والتحابيش. أطلب ثومية، إضافة لا
غنى عنها مع الفراخ واللحمة المشوية. أنواع المناقيش كثيرة (ممكن تختار عجينة
رفيعة أو سميكة) بالزعتر، وبالجبنة الحالومي، وبالخضار وباللبنة.

رغم أنهم مش في المنيو، بس احنا بـ
ننصحك بأنك تطلب مناقيش الزعتر والجبنة الحالومي، لما تذوقها مش هـ تندم أبدًا. لو
أنت من محبي البطاطس المحمرة، يبقى لازم تطلبها من «دار القمر» بـ 5 جنيه، هـ
تلاقيها مقرمشة وخفيفة. وحلي بـ طبق أرز باللبن بـ 8 جنيه وفي الآخر بقى أطلب عصير
فريش بـ 8 جنيه.

وجبة لشخصين من عند «دار القمر» ممكن
ما تكلفكش أكثر من 100 جنيه. لو نفسك في سلاطة حلوة وعيش مخبوز صابح ولحمة معمولة
بطريقة مميزة؛ «دار القمر» هو المكان الصح.

نصيحة 360

ممكن تتجنن مع المناقيش وتخترع نكهة جديدة، جرب الزعتر مع الجبنة الحالومي، خليط رائع!

أحسن حاجة

«دارالقمر» بـ يقدم أكل شامي رائع وبأسعار معقولة.

أسوأ حاجة

الغلطات واردة جدًا في الطلبات التيك آوي، فحاول تبقى واضح على قدر الإمكان في التليفون، وتأكد أن المسئول عن أخذ الطلب فهم طلبك مظبوط.

أكتب تقييم

أضف تعليقاً

يجب أنت تكون مسجل الدخول لتضيف تعليقاً.

مقترح