The Definitive Guide to Living in the Capital , Cairo , Egypt

دجاجي

دجاجي: توصيل وجبات دجاج للمنازل في مدينة نصر

تم التقييم بواسطة
Salma Tantawi
قيم
قيم الآن
دجاجي: توصيل وجبات دجاج للمنازل في مدينة نصر
مع انتشار محلات الأكلات السريعة في كل المناطق كل واحد بـ يحاول يطور من نفسه ويكون الأسرع في الخدمة وفي التوصيل للمنازل والأهم أن ساندويتشاته تكون الأفضل ودسمة أكثر. ومع ذلك عدد قليل من المحلات دي هو اللي نجح في ده وقدر يخلينا ما ننساش تجربتنا عنده بسهولة. «دجاجي» محل بـ يعمل توصيل للمنازل بس في منطقة مدينة نصر وبـ يعمل وجبات دجاج مقلي زي كنتاكي.

فيه ميزة في أنك تعمل محل دليفري بس، هي أن المطبخ بـ يبقى شغال على طلبات التوصيل فقط فـ الأكل بـ ييجي لك أسرع، يعني مش هـ يعدي أكثر من 40 دقيقة والأكل يكون عندك في أي حتة في مدينة نصر. وبـ يوصل لك ساخن ومقرمش ومغلف بعناية.

المنيو فيه ساندويتشات دجاج وسمك فيليه (8 جنيه)، لكن الأفضل أنك تدخل في المفيد على طول وتجرب الوجبات؛ الدجاج المقلي المقرمش والمغطى بالخلطة والتوابل. فيه “وجبة الأصدقاء” سعرها 65 جنيه وفيها 9 قطع دجاج واختياراتك من الأرز أو البطاطس وسلاطات وعيش. والوجبة الأكبر فيها 12 قطعة (76 جنيه) مناسبة لعدد أكبر من الأشخاص أو واحد بس جعان قوي!

ممكن تتخض من طعم الليمون اللاذع في التشيكن فينجرز (9 جنيه) لكن بعد شوية هـ تحب طعم أصابع الدجاج المقرمشة. واحد من المقبلات اللذيذة الموجودة عند «دجاجي». وجبة شرائح دجاج اللي اسمها Lady Meal  بـ 17 جنيه طعمها وتتبيلتها شبه وجبات الدجاج الهندية، وكذلك البطاطس المحمرة اللي معاها. الوجبة الاقتصادية هناك بـ 24 جنيه وكانت محبطة بالنسبة لنا، لأن الدجاج فيها كان طعمه تقليدي جدًا زي اللي ممكن تأكله في البيت، واللحم فيها كان قليل. الأرز بتاعهم كان خطير، مِبهَر كويس وفيه قطع دجاج صغيرة وفلفل أخضر مشوي.

بشكل عام أنك تطلب من «دجاجي» دي تعتبر تجربة في حد ذاتها. من أول الجاونتي البلاستيك وجيل تنظيف اليد بعد الأكل اللي بـ ييجي مع الطلب لحد قطع الدجاج المتبلة المقرمشة اللذيذة بسعر كويس. المكان يستحق يكون معروف أكثر من كده لأنه يعتبر من أحسن أماكن التوصيل في كايرو، أو علشان الدقة؛ في مدينة نصر.

نصيحة 360

«دجاجي» بـ يوصل في مدينة نصر وهليوبوليس والتجمع الخامس.

أحسن حاجة

الدجاج المقرمش تتبيلته عبقرية.

أسوأ حاجة

هـ تحتاج تأكل حاجة مسكرة بعد ما تخلص وجبات دجاج المتبلة بزيادة، المنيو فيه أرز باللبن بـ 6 جنيه.

Map Data
Map data ©2016
Map DataMap data ©2016
Map data ©2016

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح