The Definitive Guide to Living in the Capital , Cairo , Egypt

مطاعم
دجاج تكا – Chicken Tikka

دجاج تكا: مشويات حتى الثمالة في أمريكانا بلازا الشيخ زايد

  • أمريكانا بلازا مول - الشيخ زايد
  • مصري
تم التقييم بواسطة
Angie El Batrawy
قيم
قيم الآن
دجاج تكا: مشويات حتى الثمالة في أمريكانا بلازا الشيخ زايد
لأننا بـ نحب الشيخ زايد ولأننا –أكثر- بـ نحب أماكن الخروج فيها زي “أمريكانا بلازا” و”أركان مول” وأخيرًا “تيفولى دوم زايد” فإحنا تقريبًا راشقين هناك ومتابعين التطورات اللى بـ تحصل أول بأول. طبعًا أنتم عارفين أن المكان الأول سمي بالاسم ده لأنه تابع لشركة أمريكانا واللى بـ تضم مطاعم كثيرة مشهورة زي “دجاج تكا” و”KFC” و”هارديز” و”جراند كافيه” وغيرها.
من زمان وإحنا صغيرين مرتبطين به وببعض الأسماء اللى كانت منتشرة فى الوقت ده، لكن “دجاج تكا” ارتبط معانا بزيادة بسبب جودة الأكل اللى بـ يقدمها وبسبب حاجة ثانية هى “العيش البوري” اللى انفرد بتقديمه وقتها، وبعد مرور سنوات كثيرة جدًا هفنا الحنين وقلنا نستعيد الذكريات ونشوف برضه هل دجاج تكا مازال محتفظ بجودته وخدمته ولا لأ، خاصة أن كان لنا زيارة مسبقة فى فرع المعادي.

موجود فى الدور العلوي على الشمال لما تدخل ساحة أمريكانا بلازا، فيه مكانين للجلوس، بره بجانب سور الدور العلوي وبالداخل فى مكان محاط بزجاج وبالتالى بـ تكون شايف الناس اللى قاعدة بالداخل، فيه بار سلاطات موجود بره وجوه، لكن اللى بره كان رائع لأنه بـ يترفع الغطاء بتاعه بالكهرباء “توماتيكي.. توماتيكي” بشكل أبهرنا، وللشهادة ديكورات المكان تحسنت كثير عن زمان وبقى غالب عليها الستايل المودرن والألوان المبهجة.
المنيو غرقانة بصور أطباق مشويات ومش محتاجين نسرد تفاصيلها لأننا كلنا حافظينها، طلبنا ميكس جريل لحم (48.50 جنيه) وكمان زيه ميكس جريل فراخ (نفس السعر)، وطبق كباب وكفتة (40.75 جنيه) واللى بـ تقدم مع الخضار السوتيه مع اختيارك من الأرز البسمتي أو البطاطس المحمرة، وفى المقبلات قلنا نجرب الأصناف كلها من خلال البلاتر ميكس (27.50 جنيه) وده فيه 4 قطع سمبوسك لحم، و4 قطع سمبوسك جبنة، و4 كبيبة، و12 وحدة ورق عنب معاهم صوص الزبادي والسمسم. وأكيد كان لازم نهجم على بار السلاطة (الزيارة الواحدة بـ 18 جنيه).
نزل لنا زجاجة مياه صغيرة (4 جنيه)، وطبعًا العيش البوري لكل شخص طلب أوردر واللى استمتعنا به جدًا على رغم أن ممكن ناس ما تكونش بـ تحبه بسبب الزيت اللى بـ يملأ أيدك من تقطيعه، الأكل كله أكثر من رائع، كمية لحوم كثيرة ومتنوعة أكلناها حتى الثمالة من شيش طاووق إلى كفتة لحم أو كفتة فراخ أو فروج، الطعم رائع والتسوية مافيهاش كلام والخضار طازج والبطاطس طرية من جوه ومقرومشة من بره، السلاطات دي بقى أول حاجة خلصت من طعامتها وتنوعها، والمقبلات كلها لا تتخير عن بعض، إحنا نأكل من هنا والذكريات عمالة تدور فى ذهننا وبمذاق أفضل كمان.
الجرسونات متعاونين جدًا ومهذبين ومافيش حاجة استفسرنا عنها إلا وساعدونا فيها، الخدمة سريعة والنظافة واضحة جدًا فى المكان واللى موجودة أول بأول.
«دجاج تكا» مازال محتفظ بمكانته وبشكل أفضل كمان، الفرع كمان اللى فى أمريكانا بلازا مبهج وتحب تقعد فيه خاصة أنه بـ يطل على منظر رائع لجراند كافيه من فوق وباقى المطاعم هناك، خاصة وقت بالليل مع الإضاءات.

نصيحة 360

فيه مكان للصلاة عاملينه بجانب باب الدخول.

أحسن حاجة

مشويات تكا المتميزة وبار السلاطات.

أسوأ حاجة

الزيت الزيادة اللى فى العيش البوري.. لكن رغم كده بـ نحبه.

Map Data
Map data ©2016
Map DataMap data ©2016
Map data ©2016

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح