The Definitive Guide to Living in the Capital , Cairo , Egypt

ذا ميدلي

ذا ميدلى: سلاطة مقرمشة ومشويات فى الزمالك

تم التقييم بواسطة
Jessica Noble
قيم
قيم الآن
ذا ميدلى: سلاطة مقرمشة ومشويات فى الزمالك
على الكورنيش بعد المطعمين المشهورين سيكويا وليفت بانك بشوية، هـ تلاقى مكان فريد على مركب كلوب 33. “ذا ميدلى – The Medley” واخد مكان مميز فى وسط المجمع وفيه عدد كبير من أماكن الجلوس، أغلبها بـ يشوف النيل كويس. الأرضيات والأسقف مصممين بطراز حديث، نظيفين ومريحين وألوانهم خفيفة وبـ يضاف لهم مخدات حمراء علشان تخلق جو بيتى بس فى الوقت نفسه معاصر. الإضاءة المعتمة والموسيقى الكلاسيكية القديمة فى الخلفية بـ تساعد على عمل جو مريح.
جرسون لابس كويس وطريقته مهذبة وودودة قابلنا وأرشدنا لمكان الجلوس وبسرعة جاب لنا المنيوهات. كنا رايحين وكل تركيزنا على السلاطات اللى بـ تميز المكان، بس رغم كده ذا ميدلى بـ يقدم حاجات أكثر من مجرد أكلات باردة. المنيو طويلة ومفصلة، معروض فيها مجموعة من المقبلات تحرك حواس التذوق عند أى واحد.

بوفيه السلاطات اللى بـ تختار منه بنفسك يعتبر واحد من أكبر البوفيهات اللى شوفناها، وفيه حوالى 40 صنف تقدر تختار من بينهم. لو ما كنتش من محبى أكل الأرانب وبـ تحب اللحوم برضه بـ يقدموا تشكيلة كبيرة من أطباق اللحوم، والفراخ والمكرونة. فيه كمان عدد من كوكتيلات الفواكة والسموذى ومشروبات الصودا، فكر واختار إللى يعجبك.
علشان نروى عطشنا كان ضرورى أننا نجرب فريش & فروتى كوكتيل (21 جنيه) والليمون الوردى Pink Lemonade (21 جنيه).
بالنسبة لفواتح الشهية اختارنا  Bruschetta Caprese(36 جنيه)، ودى ببساطة عبارة عن موتزاريلا وسلاطة طماطم على عيش فرنساوى محمص. أما الأطباق الرئيسية فبدل ما نخترع سلاطة من عندنا، اختارنا واحدة من ابتكارات الشيف، سلاطة تاى بيف (46 جنيه)، وعلشان نضيف شوية كربوهيدرات للأكلة طلبنا كلوب ساندويتش فراخ (42 جنيه).
وصلت المشروبات فى كاسات كبيرة جذابة. الليمون الوردى تحفة، كان عبارة عن خليط من عصير الليمون الطازج الحقيقى مع عصير رمان. حاجة غريبة أن المشروب ده رغم أن تحضيره سهل وطعمه لذيذ، إلا أن أماكن كثير مش بـ تقدمه. الكوكتيل الثانى لا يقل فى الجمال عن الأول، وطعمه بالضبط زى ما الاسم بـ يقول.. خليط طازج لذيذ من الأناناس، والتوت البرى وعصير التفاح مع مشروب كريز مسكر.
طبق الـ Bruschetta Caprese للأسف نزل فى نفس الوقت مع الأطباق الرئيسية وكان بارد شوية ومش محمص قوى زى ما كنا بـ نأمل. سلاطة التاى بيف كانت عبارة عن كمية من المكونات المعتادة للسلاطة مع الفجل، وقطع لحم كبيرة وشعرية بيضاء. رغم أن التوليفة كانت ممتعة بس إحنا ندمنا أننا ما عملناش سلاطة من دماغنا علشان نقدر نختار المكونات اللى بـ نحبها ونسيب اللى ما يعجبناش. كلوب ساندويتش الفراخ كان كبير وحشوه كثير، ومعمول بعيش بـ نحب نسميه “العيش اللى بحق وحقيقي”، عيش سميك وخفيف واضح أنه خالى من المواد الحافظة. الفراخ كانت ممزوجة مع قطع لحم الديك الرومى وبـ يكملها سلاطة خضراء معاها.

بعد ما امتلأت معدتنا بالأكل الصحى المفيد، وعلشان فريق “ذا ميدلى” بـ يدعى أنه منحاز للحلويات، وطبعًا إحنا زيهم، كان لازم نأخذ معانا شوكليت فوندو (28 جنيه) البيت ونستمتع بها بعدين. قررنا نجرب ثانى اختيار بعد ما عرفنا أن الشوكليت فوندو خلصت فى اليوم ده، وهو كيك محشى لوز بصوص الكراميل وأيس كريم فانيليا “سيزارز باىCaesars Pie “. كبير الطباخين جاء لنا بنفسه عند ترابيزتنا علشان يقول لنا أن لأسباب متعلقة بالنظافة هو مش هـ يقدر يجيب لنا الأيس كريم بالفانيليا. تأثرنا قوى من سلوكه المحترم، وكنا راضيين لما طلبنا الكيكة من غير الأيس كريم.

لما جاء وقت أكل الحلويات أخيرًا حسينا أن طعمها هـ يبقى أحلى كثير لو كانت طازجة. توقعنا كان بعيد خالص عن أنها تبقى كيكة اسفنجية عادية، واحتاجت صوص كراميل أكثر علشان يرجع لها طعمها ثاني.
فى المجمل، تجربة الأكل عند “ذا ميدلى” كانت لطيفة، بجانب المشروبات والمأكولات الطازجة الصحية. فكرة “اعمل سلاطتك بنفسك” فكرة فريدة وحلوة لكل الأعمار، والأكيد أننا هـ نروح هناك مرة ثانية.

نصيحة 360

"ذا ميدلى" بـ يقدم كمان منيو إفطار، وإفطار متأخر من 9 صباحًا.

أحسن حاجة

فكرة بوفيه السلاطات.

أسوأ حاجة

عدد أماكن الجلوس داخل المكان قليل وبالتالى ممكن تتجمد من البرد وأنت بـ تأكل فى المنطقة الخارجية.

Map Data
Map data ©2016
Map DataMap data ©2016
Map data ©2016

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح