The Definitive Guide to Living in the Capital , Cairo , Egypt

مطاعم
روز فيل – Rose Ville

روز فيل: أكل شهي وأجواء مريحة في جاليريا 40 الشيخ زايد

تم التقييم بواسطة
Angie El Batrawy
قيم
قيم الآن
روز فيل: أكل شهي وأجواء مريحة في جاليريا 40 الشيخ زايد

جاليريا 40 في الشيخ زايد لازم ياخد جائزة أفضل مكان للمطاعم وفي نفس الوقت الراحة النفسية، مافيش مطعم أو كافيه فيه "كسر" زي ما بـ يقولوا، كله أكثر من رائع، وبشكل عام إحنا بـ نحب نروح هناك علشان نستمتع بالهواء والأجواء الجميلة.

مطعم "روز فيل – Rose Ville" فاتح بقى له فترة في الدور العلوي هناك، وأمامه مطعم ثاني اسمه "مستكة – Mesteka" كتبنا لكم عنه مقال نقدي من كام يوم، ديكور المكان المبتكر والرقيق في نفس الوقت هـ يشدك أنك تقعد فيه، ممكن تشوفوا صفحتهم على الفيسبوك علشان تشوفوه، وأجمل وأرق حاجة مفارش الترابيزة اللي بالدانتيل.. خطيرة، كمان الديكور معمول فيه شوية أفكار بسيطة جدًا لكن شيك جدًا، زي برطمانات الصلصة اللى معمولة وحدات إضاءة بـ تنور المكان كله معلقة من فوق.

الجرسون اللى كان معانا مهذب وبـ يشرح لنا مكونات الأطباق بكل ترحيب، من المنيو الأساسية اختارنا شوربة كريمة بالفراخ (28 جنيه) ومن المقبلات Shrimp Skewers بـ (58 جنيه)، ومن الأطباق الرئيسية سلامون فيليه (112 جنيه)، وفيل ليمون Veal Lemon بـ (87 جنيه)، اللى عرفناه لما المكان كان لسه بـ يضبط ديكوراته علشان الافتتاح أن الشيف اللى بـ يطبخ في روزفيل يبقى واحد من تلامذة الشيف الأشهر على الإطلاق "جيمي أوليفر Jamie Oliver" وده اللي حمسنا بشدة لأننا من أشد المعجبين بأوليفر.

ولأننا تكلمنا قبل كده عن الأفكار الحلوة، برضه المشروبات بـ تُقدم هنا في برطمانات شفافة بس شيك، أول ما بـ تطلب أكلك بـ ينزل سلة العيش فيها عيش يجنن سواء بالحبوب أو سادة، هش وطري وطازة، بداية زي الفل.

أول حاجة جات كانت الشوربة، كميتها حلوة جدًا وممكن يتشارك فردين فيها، سخنة وكريمي مضبوطة، بعدها نزل أسياخ الجمبري المشوية، الجمبري حجمه معقول، التتبيلة بتاعته مميزة ومشوي مضبوط، معاه خضار مشوي مقطع صغير.

نيجي بقى للكلام الكبير، حتة لحم مشوي سميكة معاها صوص ليمون مع طلبك من الخضار السوتيه والبطاطس البيوريه مش هـ تخليك محتاج أي حاجة من الدنيا دي، هـ تستمتع بكل قضمة منها، صوص الليمون مضبوط مش لاذع وكميته كويسة وكمان تسوية اللحم مضبوطة زي ما طلبنا Well Done، الخضار السوتيه والبطاطس البيوريه ما يقلوش جودة عن اللحم.

ولأننا من عشاق السلامون ستيك/ فيليه، كنا مترقبين نذوق طعم السلامون اللى طلبناه، من الآخر روزفيل واحد من الأماكن اللى بـ تقدم السلامون بقطعية رائعة، اللحم الطري الغني بالنكهة أكثر من رائع وكفيل أنه يغير لك موودك.. تحفة.

بطننا كانت مليانة على الآخر وللأسف ما جربناش عندهم تحلية، بس أكيد هـ نروح لهم ثاني، حتى لو مش علشان الأكل، هـ يكون علشان الديكورات الأكثر من رائعة اللى هـ تغير موودك وتخلي يومك أفضل.. برافو "روز فيل".

نصيحة 360

جربوا الحلويات عندهم وقولوا لنا رأيكم في الجزء الخاص بالتعليقات تحت المقال.

أحسن حاجة

أكل وديكور وخدمة حلوة.. المثلث المثالي.

أسوأ حاجة

مافيش!

أكتب تقييم

أضف تعليقاً

يجب أنت تكون مسجل الدخول لتضيف تعليقاً.

مقترح