The Definitive Guide to Living in the Capital , Cairo , Egypt

ساتفا ستيبس – Sattva Steps

ساتفا ستبس: مطعم احسب فيه سعراتك الحرارية فى الزمالك

  • 35 شارع أحمد حشمت، الزمالك
  • عالمي
  • 0227352205
  • 7 صباحًا: 11 مساءً
تم التقييم بواسطة
Jessica Noble
قيم
قيم الآن
ساتفا ستبس: مطعم احسب فيه سعراتك الحرارية فى الزمالك

زي أي مطعم جديد بـ يدور على زبائن بفكرة جديدة، “ساتفا ستبس – Sattva Steps” قرر أنه يشد الناس من خلال مبدأ الأكل بوعي، وتقديم أكل صحي ولذيذ في الوقت نفسه، شعارهم فيه شبه كبير من المثل المصري: “اتعشى واتمشى”، المطعم مش بس حاسب عدد السعرات الحرارية في الوجبات اللي بـ يقدمها (لحسن نكون هـ نأكل بنفس) ده كمان بـ يحسب لك عدد الخطوات اللي لازم تمشيها علشان تحرق سعرات الوجبة.

الديكور الخارجى نقي وبسيط: واجهة زجاجية وخشب فاتح، حاجة كده مختلفة تمامًا عن واجهات المطاعم الموجودة بنفس المنطقة بالزمالك، عدد الترابيزات في المحل قليل نوعًا ما، بس فيه أوت دوور عبارة عن بار بعرض الواجهة، له كراسي عالية.

وبالرغم من أن المنيو بنفس بساطة المكان، إلا أن ألوانه كثيرة ومبهجة، كل الوجبات موجودة: إفطار موجود، وشوربة وسلاطات، وكذلك الساندويتشات بأنواعها والمشهيات، كل ده بـ يتم تقديمه حتى منتصف اليوم، بعد كده منيو أطباق الفراخ، اللحوم والسمك ممتدة لمنتصف الليل، المنيو مقسم لثلاثة ألوان، بحسب عدد السعرات اللي في الوجبة: المربع الأخضر يبقى أنت في السليم وجبت الوجبة اللي سعراتها أقل من 299 سعر حراري، أما الأصفر فوجباته من 399: 499 سعر حرارى، وأخيرًا البرتقالي واللي سعراته من 500: 1000.

الوجبة الوحيدة اللي خارج الحسابات المعقدة دي هى البرجر (52.99 جنيه) لأنها ببساطة عدت كل الحدود بعدد سعراتها اللي وصل لـ 1036، وبكده عدد الخطوات اللي المفروض تحرق بها الوجبة هى 25900، وده غالبًا ماراثون 8 أميال.

العصائر الفريش، السموزي والمثلجات Frappes موجودة بكل الأنواع. بدأنا بعصير البرتقال: ساقع ومنعش، وأهم شيء أنه طازج، جربنا بعد كده سلاطة يوناني (37.99 جنيه) (من القائمة الخضراء) بها 221 سعر وحلها 5525 خطوة، كميتها مهولة، طازجة ومقرمشة عليها قطع بصل مكرمل لذيذ، إلا أن الـ Dressing sauce كان فاقد للنكهة، والجبنة الفيتا كانت مجلدة.

طلبنا من القائمة البرتقالية (أيوه، إحنا ما بـ يهمناش) بانيني فراخ مشوية، بالرغم من جمال الفراخ اللي بـ تذوب في الفم، إلا أن الساندويتش جاء لنا  في باجيت بني بالحبوب، ده غير أن الساندويتش كان حراق، ودي حاجة ما كناش نعرفها. حلينا بعد كده بشيبوست التفاح، اللي هو عبارة عن طبقة كريم بروليه فوق قطعة تفاح مرشوش عليهم قرفة وصوص فراولة: كان جميل و شهي.

الأكل هناك تجربة جديدة، أنت مش هـ تأكل عمياني زي أي مطعم عادي، المفروض أن ده شيء جميل، لو أنت مهتم برشاقتك، بس لو ما لكش في جو الأكل الصحي، حاول بقى ما تبصش على عدد السعرات وكل وأنت مطمئن.   

نصيحة 360

بـ يبيعوا جهاز مخصص لعد الخطوات عن طريق حركة الرجلين، تخيل أن فيه جهاز بـ يعمل كده أساسًا؟!

أحسن حاجة

السلاطة اليوناني كانت عظيمة: مقرمشة وطازجة.

أسوأ حاجة

كالعادة، مش كل حاجة مكتوبة في المنيو هـ تلاقيها.

Map Data
Map data ©2016
Map DataMap data ©2016
Map data ©2016

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح