The Definitive Guide to Living in the Capital , Cairo , Egypt

في السنين الأخيرة مشهد الأكل القاهري شهد سيل من الأكلات الغريبة والعجيبة من كل مكان في العالم، لكن أوقات، اللي تعرفه بـ يكون أحسن من اللي ما تعرفوش.

أحدث إضافة من إضافات مطاعم المعادي كان "سيزلر ستيك هاوس –Sizzler Steak House". صحيح مبدأ الستيك هاوس مش جديد، لكن الوعي العام بقطعيات اللحم وطرق الطهي في مصر قليل نسبيًا.

مع سلالم نازلة لبدروم إضاءته ضعيفة كله من الخشب الغامق ويزينه كنب لونه كريمي وأضواء حمراء ساطعة في أجزاء من المكان بـ تنعكس على الديكور، الموضوع مش مريح للعين، ولا موسيقى الفلامنكو الشائعة كانت مريحة للسمع.

المطعم وقت وصولنا كان فاضي شوية، ولما تدخل هـ تدرك أن مساحته أكبر أربع مرات من الحجم اللي هـ يخطر على بالك أول ما تدخل. الجرسونات هناك يقظين جدًا، لكن بعد حوالي 10 دقائق حسينا أن الموضوع زيادة شوية وكأنهم بـ يحوموا حولنا.

المنيو مألوفة جدًا لو كنت من زبائن مطاعم زي "ستيك آوت"، "روستري" أو "سبيكترا"، تتكون من مجموعة مقبلات، شوربة، سلاطات، برجر، مكرونة، أطباق رئيسية وحلويات، مافيش حاجة مختلفة أو مبتكرة.

طلبنا ميني سيزلر كومبو (39.95 جنيه) من بين المقبلات وشوربة كريمة مشروم (12.95 جنيه)، بالنسبة للستيك، طلبنا نيويورك كت، لكنهم قالوا لنا أنه مش موجود، فطلبنا كلاسيك تريو (129.95 جنيه) وفيليه لوفر (129.95 جنيه).. التفاصيل تأتيكم بعد قليل.

عمرنا ما شوفنا مطعم دقيق فى ترتيب تقديم الأطباق المختلفة المكوّنة للوجبة. الشوربة وصلت أولاً ومعاها كترحيب سلّة عيش ساخن وزبدة. مكونات الشوربة مافيش فيها أي نوع من التوازن، ما بين المشروم الطازج والكمية الكبيرة جدًا من الكريمة.

بعدها وصل الكومبو، عبارة عن قطعتين تشيكن رول، فرايد موتزاريلا، تشيكن ستريبس وسبرينج رولز مع صوصين هما الهوني ماسترد وسويت & ساور. المقبلات المقلية كانت مقرمشة وفي نفس الوقت مش مزيّتة زي ما توقعنا، لكن للأسف مافيش حاجة مميزة من ناحية المذاق.

بعد أقل من دقيقة من رفعهم أطباق المقبلات من على ترابيزتنا، وصلت الأطباق الرئيسية. زي ما هو حال المطاعم اللي تكلمنا عليها من شوية، كميات الأكل كانت ضخمة. الكلاسيك تريو تكوّن من فيليه عليه صوص كريمة مشروم –تقريبًا نفس قوام الشوربة– قطعة صدور فراخ مشوية مستويّة كويس وجمبري بصوص الثوم مع بطاطس محمرة تحفة وخضار سوتيه لذيذ. طلبنا الفيليه يكون medium وهو ده اللي حصل. كل الأكل كان متسوّي ومتبل كويس جدًا، لكن الجمبري بالذات كان حكاية والفضل يرجع لصوص الثوم الرائع.

أما الفيليه لوفر، فكان عبارة عن قطعتين فيليه –واحدة عليها بيبر صوص والثانية مشروم– مع إضافات جانبية من بطاطس مهروسة وخضار سوتيه. المشكلة أننا طلبنا قطع الفيليه تتسوّى medium لكنها وصلتنا rare. صحيح الجرسون على طول حل المشكلة، لكن النتيجة النهائية أن الستيك كان well done، ودي مشكلة شائعة في مطاعم الستيك في القاهرة.

بشكل عام، صعب نقول أي حاجة عن سيزلر أكثر من أنه مطعم لطيف، أو بمعنى أصح "في الأمان". صحيح الأكل يستحق ثمنه بالنظر للكميات، لكن الموضوع مش واو من ناحية النكهة أو الشكل. مافيش جديد يذكر.