The Definitive Guide to Living in the Capital , Cairo , Egypt

طشة

طشة: أكل مصري أصيل فى أمريكانا بلازا مول الشيخ زايد

تم التقييم بواسطة
Angie El Batrawy
قيم
قيم الآن
طشة: أكل مصري أصيل فى أمريكانا بلازا مول الشيخ زايد

طواجن وملوخية وأرز معمر ومحاشي وفتة، والحاجات الجامدة دي اللى قلبك يحبها.. كلها أكلات المطبخ المصري الأصيل ما بـ يخلاش منها، وفى عائلاتنا المصرية ما حدش بـ يشيد بمهارة ست بيت إلا لما تتقن الأكلات دي وتستحق لقب واحدة شاطرة و"عندها نَفَس فى الأكل" عن جدارة، وبالتالى الموضوع مش سهل، والإتقان محتاج تدريب وخبرة وممارسة، وبالتالى أن حد يفتح مطعم أكل مصري فى "القاهرة" يبقى حط نفسه تحت المنظار.

فى أمريكانا بلازا مول فى الشيخ زايد فتحت أبواب مطعم "طشة" علشان يكون إضافة للمكان لأنه يعتبر المطعم الوحيد الشرقى أو المصري وسط كم مطاعم تابعة لشركة أمريكانا أجنبية الأصل زي هارديز وكنتاكى وجراند كافيه وكوستا كوفى وغيرها، وعلى الرغم أن بقى له كام أسبوع لكن الإقبال عليه كبير وده اللى طمننا وإحنا داخلين المكان.

موجود فى الدور العلوى من أمريكانا بلازا، بـ يطل على منظر رائع للمكان لو قعدت فى الجزء الخارجي المفتوح، والجزء الداخلى ديكوره حلو جدًا وبسيط وأنيق، قعدنا فى الجزء الخارجي لأن الجو كان مشجعنا كمان، ديكورات رأس السنة وشجر الكريسماس فى كل مكان كانت رائعة.

كانت معانا بنوتة بـ تشوف طلباتنا والحقيقة شاطرة جدًا، فيه منيو للأطباق ومنيو آخر منفصل علشان المشروبات والتحلية، كل اللى نفسك فيه من أطباق مصرية هـ تلاقيه، اختارنا طلبات كثيرة جدًا منها من قسم المشويات كفتة مشوية (70 جنيه) بـ ينزل معاها اختيارك من أرز بالخلطة أو سوتيه أو بطاطس، اختارنا الأول، وكمان طبق دجاج بالفريك (85 جنيه) معاه طلب جانبي خضار سوتيه (15 جنيه)، وفتة لحمة (65 جنيه)، وطاجن أرز معمر باللحم (65 جنيه)، وفتة موزة (85 جنيه)، ونوعين سلاطة: سلاطة بلدى (15 جنيه) وثومية (15 جنيه).

أول حاجة نزلت لنا سلتين عيش بلدي سخن والسلاطات، العيش أكثر من رائع واللى زود حلاوته أنه كان سخن وفريش، الثومية أكثر من رائعة ومش ثقيلة والسلاطة الخضراء فريش وشهية، الأكل أخذ وقت شوية وده متوقع بس مش بدرجة كبيرة، بعدها نزلت لنا الأطباق كلها فى نفس الوقت وده اللى خلى التجربة أكثر ثراءً، لأن كلنا كنا بـ نغطس فى أطباق بعض وذوقنا كل الأصناف.

الدجاج بالفريك كان وهمي، تتبيلة الفراخ اللى أكسبتها لون برتقالى محمر كانت وهمية، الفراخ مستوية وطرية جدًا، والفريك مستوى كويس من جوه وتتبيلته برضه حلوة جدًا، كأنه ساندويتش فراخ محشي فريك، أول مرة نشوفه معمول بالطريقة دي وعجبتنا جدًا، أحبطنا شوية بس أن الخضار السوتيه معاه كان قليل شوية بس كان طعمه حلو، الكفتة كانت نجم الترابيزة، تسوية ورائحة وشوي، زي ما قال الكتاب، والأرز بالخلطة كان إضافة كبيرة له، ولازم نقول أن الـ Decoration فى كل الأطباق وطريقة التقديم حلوة جدًا تفتح النفس على الأكل.

ندخل على الثقيل بقى: فتة اللحم وفتة الموزة كانت حلوة جدًا، والشيف بـ ييجي بطاسة صغيرة فيها التتبيلة وبـ يحطها أمامك على الطبق، شمينا رائحة الثوم فى التقلية من هنا ورحنا فى عالم ثاني خالص، التسوية والتقديم والطعم مافيش كلام عليه إلا أن فيه تعليقين بلغناهم للجرسونات والشيف –اللى كانوا كل شوية ييجوا يسألونا على أخبار الأكل- أن كمية الأرز كانت أكبر من العيش كثير، وكمان اللحم كان بـ "يعض" ساعات ومحتاج تسوية أكثر، ونفس الكلام فى اللحم داخل الأرز المعمر، لكن نعترف أن دي أول مرة نأكل أرز معمر خفيف وشهي ما يخليناش نحس بثقل بعد ما نأكله.

بعد ما خلصنا الجولة الأولى، دخلنا على طول فى الجولة الثانية، المشروبات والتحلية، الحقيقة كمية المشروبات وتنوعها خلتنا نأخذ وقت فى الاختيار، المشروبات كلها كانت حلوة جدًا مافيش أى تعليق عليها، من أول النسكافيه (16 جنيه)، لحد الأوريو شيك (25 جنيه) والشاي (اللى كان مختلف لأنه بـ يقدم فى البراد مع الأستكانة اللى عرفنا أنها الفنجان الصغير مع أوراق النعناع الفريش) (16 جنيه)، وكمان ليمون بالنعناع سموزى (25 جنيه).

مسك الختام كان أم على (30 جنيه) اللى كان سكرها مضبوط وطعمها حلو جدًا مع المكسرات الفريش بس كانت كمية اللبن اللى فيها كثيرة خلت المكونات "صايصة" شوية، المفاجأة بقى أن المكان مش بـ يضيف لا خدمة ولا ضريبة، مش عارفين ممكن يكون فى الأول بس دي حاجة أكيد بسطتنا.

"طشة" مطعم أكل مصري أصيل، وأكيد لما يبقى نفسنا فى أكلة جامدة خاصة فى خروجة عددها كبير هـ يكون من الأماكن اللى فى دماغنا، خاصة أن رائحة "طشة" الثوم لسه فى مناخيرنا والطعم فى فمنا لحد دلوقت!

نصيحة 360

"طشة" عندهم شيشة صحية.. مش فاهمين إزاى!

أحسن حاجة

الأكل مخدوم وتقديمه حلو.

أسوأ حاجة

تسوية اللحمة كانت عاوزة "تكة".

Map Data
Map data ©2016
Map DataMap data ©2016
Map data ©2016

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح