The Definitive Guide to Living in the Capital , Cairo , Egypt

بـ تعدي علينا أوقات بـ نبقى عايزين أكل
الشعبي من الشارع، وخصوصاً البرجر الشعبي، وهو للي مش عارفينه برجر بالبيض ومشهور
دايماً بـ إنه رفيع قوي. البرجر الشعبي حاجة أساسية في كل محلات الأكل الشعبي، بس
أحسن واحد بـ يعمله في القاهرة كلها هو «عمّو حسني»، اللي لقب نفسه “ملك
السندوتشات”، وإتطور ومبقاش برجر شعبي وبس.

«عمّو حسني» معروف عنه إنه إبتدى زمان
سنة 1996 بـ “عربية أكل” واقفة في ميدان تريومف اللي في مصر الجديدة. وإبتدى
يتوسع وعمل محل، وبعدين إبتدى يعمل كذا فرع تاني، جوه مصر الجديدة وحواليها كمان.

أنواع البرجر في المنيو بتاع «عمّو حسني»
كتيرة، بـ تبتدي من البرجر العادي (16 جم)، وده بـ يبقى قطعة برجر 250 جرام وعليها
التحابيش كلها، طماطم وبصل، وجبنة أو بيض، ولو عايزين الطعم الأصلي يبقى ننصحكم
تطلبوه بالبيض. البرجر بـ يبقى هايل في كل حاجة سواء التتبيلة، التركيبة، البيض
الأومليت، كل حاجة!

لو جعان قوي جرب الـ دبل تشيز برجر (19جم)،
و ده بـ يبقى عبارة عن 500 جرام برجر بالجبنة ومن غير بيض، وبـ يشبع فوق ما تتخيل!
لو مش غاوي اللحوم، جرب برجر الفراخ (17 جم)، و ده بـ يبقى عبارة عن قطعة فراخ 250
جرام مع إختيارك من البيض أو الجبنة. هو مش فظيع قوي زي البرجر، بس هـ ينفع لو انت
مش بـ تحب اللحوم.

الحاجة اللي بـ تفرق «عمّو حسني» عن أي
مكان تاني مشابه له هي اللحمة اللي هو بـ يستخدمها نفسها، طرية ومفيهاش دهن على
عكس أغلب المحلات، بس برضه ما تحسش أبداً إنه أكل بيتي، ومع إنه من أحسن وأنضف محلات
المأكولات السريعة الشعبية، لكن أسعاره أرخص بكتير من محلات تانية معروفة، وهو
مشهور برضه بالكبدة الإسكندراني والسجق والفاهيتا والهوت دوج والشاورمة.

الحلو عند «عمّو حسني» مختلف شوية،
جربنا ساندويتش القشطة والحلاوة (3 جم) بس ما عجبناش قوي. رغم إن المكونات كان
طعمها حلو، بس الساندوتش كان هـ يبقى أحلى لو العيش كان محمص أكتر وسخن. العيش
الأبيض مع القشطة والعسل الباردين ما كانوش عاملين مزيج حلو خالص.