The Definitive Guide to Living in the Capital , Cairo , Egypt

فى أغلب الأوقات، الأكل الإيطالى فى المطاعم المصرية أبعد ما يكون عن الحقيقة؛ معجنات من البيتزا ومكرونات معاها أنواع صوص غريبة وسلاطات كابرى فيها الجبن الغلط. على العموم، قدرنا نوصل لمكان بـ يعمل الصح فى مجال الأطباق الإيطالى الأصلى فى القاهرة الجديدة.. “فراتيللى لا بوفالا – Fratelli la Bufala“.

بإطلالته على نافورة كايرو فيستيفال سيتى الراقصة، المطعم الفسيح بـ يقدم قعدات داخل وخارج المكان، والاثنين يتميزوا بنفس الروعة، ديكورات المكان مستوحاة من منطقة البحر الأبيض المتوسط –أقرب لأسبانيا من إيطاليا– بإضاءة هادئة وأرضيات من الخشب والمعدن أضفت على الأجواء شكل معاصر لطيف، من هنا، قررنا نقعد فى الخارج.

المنيو كانت مليانة صفحات عامرة بما لذ وطاب من الأكلات الإيطالى. المقبلات تشمل سلاطات إيطالى منها La Bufalata و La Mozzataودى مناسبة للمجموعات الكبيرة يشتركوا فيها، حيث أنها فيها قطعة جبن موتزاريلا وزنها 500 جرام. موجود كمان بروشيتا وكارباتشيو. الأطباق الرئيسية تتراوح بين مكرونات وبيتزات، وصولاً إلى أطباق لحوم، وريزوتو والمفاجأة كانت وجود برجر.

أول ما انتهينا من الطلب، وصلت على الترابيزة سلة فيها كمية محترمة من الخبز. على طول دخلنا على المعجنات اللذيذة وغمسناها فى زيت الزيتون والخل البلسمى. وصل أكلنا بعد شوية ولو قولنا أن شكله خرافى برضه مش هـ نوفيه حقه.

أول حاجة كانت كابريس (65 جنيه) المكونة من شرائح طماطم وجبن موتزاريلا عليهم ريحان وبردقوش بطعمها الخفيف اللذيذ، ونقدر نقول أن الجبن الموتزاريلا من أحلى الجبن اللى جربناها فى مصر. بيتزا نيابوليتان الخارجة فورًا من الفرن كانت نفس الكلام.. رفيعة، مغطاه بجبن موتزاريلا بجد ومخبوزة تمام فى فرن خشبى. كنا طالبين مارجريتا DOP (67 جنيه)، وهى بيتزا مارجريتا تقليدية عليها مشروم porcini. طلبنا كمان ديافولا (60 جنيه)، عليها بيف سلامى وتوابل مشطشطة، وفعلاً كانت حراقة بطعم لذيذ.

البيتزات كانت فعلاً سميكة ومشبعة لدرجة أننا كان صعب نفكر فى منيو الحلو، واللى بـ تقدم تشكيلة مغرية من الحلويات. منيو الحلو تشمل تيراميسو، وتشيز كيك، وأطباق فاكهة، وجرافا (دوناتس)، وتارت تفاح وآيس كريم.

“فراتيللى لا بوفالا” قدر يشبع اشتياقنا للأكل الإيطالى بأطباقه المميزة؛ وقعنا فى غرام الجبن الموتزاريلا وعجينة البيتزا الشهية. الجرسون ساعدنا جدًا وكان شخصية مرحة، والمكان بشكل عام بدون غلطات. طبعًا إحنا فاهمين أنت بـ تفكر فى إيه دلوقت! فعلاً إحنا دفعنا زيادة شوية على سلاطة بسيطة، لكن الموضوع يستحق كل قرش. المرة القادمة، أكيد هـ نعمل حسابنا على مكان للحلو.