The Definitive Guide to Living in the Capital , Cairo , Egypt

مطاعم
كولينا -Culina

كولينا: برانش ملوكي في ريتز كارلتون النيل

  • 1113 كورنيش النيل – ريتز كارلتون النيل
تم التقييم بواسطة
Ramy Soliman
تقييمك
قيم الآن
كولينا: برانش ملوكي في ريتز كارلتون النيل

كتب: رامي سليمان

كلنا عارفين إن البوفيهات المفتوحة في مصر سمعتها مش لطيفة، خصوصًا إن معظمهم بيضحي بجودة الأكل علشان يقدموا كمية كبيرة. أماكن قليلة قدرت تحقق المعادلة الصعبة، بس البرانش يوم الجمعة في ريتز كارلتون النيل وتحديدًا في مطعم كولينا كسب السباق بأكله المتنوع والجودة الرهيبة.

الكلام ده بيكون كل يوم جمعة من 1 الظهر لغاية الساعة 5، وسعر البوفيه 400 جنيه للفرد. إحنا كنا فاكرين إن البرانش زي العادة هيكون شوية مخبوزات على تشكيلة جبن وسلاطات، وجايز شوية دلع ويكون فيه فوا-جرا. طبعًا كل توقعاتنا كانت في محلها، بس كولينا كان عندهم مفاجئات كتير كتير كتير.

أول حاجة عملناها كانت جولة سريعة مع المقبلات. بار السلاطات فيه الاختيارات المعروفة، بس عندهم ثلاث حاجات كانوا مميزين وهم: سلاطة كابريس بالجبنة الموتزاريلا الطازة وصوص البيستو اللذيذ، وسلاطة Asian beef الغنية بالصوص الآسيوي وقطع اللحمة الطرية، وأخيرًا سلاطة Pumpkin and Sun-dried Tomato بطعمها المشطشط القوي.

 أما المقبلات فعجبنا منها جدًا السمبوسك بالسبانخ بتتبيلتها الممتازة والنكهة اللاذعة، وكمان العجينة كانت طرية وفيها شوية قرمشة بسيطة. الحاجة اللي سرقت الأضواء فعلًا كانت الميني كبيبة والفضل يرجع لقرمشتها واللحمة المفرومة الجميلة.

نروح لركن الأطباق المصري والسي فوود – وهنا بيحضروا السمك قصادك بالطريقة اللي تعجبك – وكمان السالمون المشوي، وترابيزة عليها ستيك ريب-آي ورومي مدخن وبطاطس مهروسة وصوص توت وكرواسونات، وواضح طبعًا من الكلام ده إنهم في كولينا مش بيهزروا وواخدين الموضوع جد، بس أكتر حاجة لفتت انتباهنا كان بار السوشي.

عندهم أربع أنواع من رول آورا-ماكي، ومعاه كل لوازم السوشي زي الصويا صوص وزنجبيل مخلل وواسابي. من أكتر الحاجات اللي انبسطنا منها إن السالمون والتونا في الرولات كانوا طازة، والأكل من قطعيات ممتازة وكمان الرز تحفة.

ندخل على الكلام الكبير ونبتدي مع ركن الباستا ونعمل فيها أكلة على مزاجنا. طلبنا مكرونة لنجويني بالكريمة وطماطم مجففة ومشروم شيتاكي وريحان وجبنة بارميزان. طبعًا مافيش اتنين يختلفوا على قوام صوص الكريمة اللي يجنن والمكرونة المستوية كويس، بس أميز حاجة في ركن الباستا هو الجودة العالية لكل حاجة فيها.

بعدها طلعنا في رحلة سريعة للهند مع البيف كاري. خلطة التوابل الهندي مع الكاري مالهاش حل، وكمان اللحمة نفسها مستوية كويس. المشكلة الوحيدة إن مافيش عندهم شوية رز برياني وفراخ بالزبدة لزوم الدلع.

طلعنا بعدها في جولة تانية سريعة بره علشان نجرب ركن الكبسة والشاورمة، وطبعًا لازم وقفة مع الشيف اللي بيشوي شوية شيش طاووق وكفتة وفراخ يفتحوا النفس، واللي بيرش عليهم شوية زبدة وبعدين يبتدي يشويهم. بصراحة مافيش فراخ أطري من كده، والجلد نفسه الغرقان زبدة كان تحفة والتتبيلة مالهاش حل.

في واحد حكيم قال إن الحلويات مكانها مش في المعدة، الحلويات بتدخل على القلب على طول، وعلشان كده ماضيعناش وقت وابتدينا بالشوكليت تروفل المتغطية قطع فستق ومحشية صوص شوكولاتة بالتوت الأحمر، والتوت تحديدًا أضاف نكهة لاذعة لطيفة. بعدها جربنا قطعة من تارت الميرينجي بالليمون اللي كان متماسك وغني بنكهة الليمون القوية، والميرينجي المسكر كان رمانة الميزان. خلصت أكلتنا مع بماكارون شوكولاتة حكاية بعجينتها الرفيعة وقلبها الطري الجميل.

أكيد وجبة البرانش عند كولينا يوم الجمعة رفعت سقف التحدي وقلبت قواعد اللعبة في مصر. الأطباق متنوعة ومختارة من بين خمسة مطابخ مختلفة، وبصراحة سهل نقول إنه البوفيه الأحسن في فئته في القاهرة، بأطباقه المعمولة باحترافية بمكونات على أعلى مستوى.

نصيحة 360

بعد ما تخلصوا البرانش اشربوا حاجة من نوكس أو بار أورو.

أحسن حاجة

جودة عالية وكميات كفاية.

أسوأ حاجة

ينفع نقول إن الاختيارات الكتير جدًا هي "أسوأ حاجة"؟!

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح