The Definitive Guide to Living in the Capital , Cairo , Egypt

تم الافتتاح من أسابيع قليلة، وارسلوا لنا هدية رقيقة في كايرو 360 بمناسبة الافتتاح، ودعونا لزيارة المكان وكتابة مقال نقدي عنه. «كيه لاونج – K-Lounge» هو مطعم وكافيه امتداد لمحلات عبد الرحيم قويدر الشهيرة وأحد أهم محلات الحلويات في مصر، اختار حرف الـ K اللي بـ يعبر عن قويدر وفتح أبوابه في منطقة حيوية جدًا بجوار سعودي ماركت وسيلڤر ستار مول في التجمع الخامس، المكان ما يتوهش خالص، وهـ تميزه بسهولة من بين المحلات اللي هناك، وهو واخد دورين، الدور الأرضي مخصص للحلويات والتيك آواي، وفيه مساحة خارجية مفتوحة فيها حوالي 3 ترابيزات للجلوس، لكن ما ننصحكمش بها في البرد خالص. والدور العلوي واسع وفيه قعدات متنوعة الأحجام والأشكال.

الملفت في قعدة «كيه لاونج» كان الأناقة الشديدة في الديكورات واستخدام الألوان والإضاءة ومع ذلك حسينا بالبساطة والبهجة مش بالكلاسيكية والرسمية اللي بـ تبقى خانقة أحيانًا، قعدتنا كانت هادئة جدًا وفيها خصوصية، وصوت المطربة Katie Melua في الخلفية كانت مفاجأة سارة جدًا، وفيه تليفزيون طبعًا لو احتجت تتابع مباراة ولا حاجة.

جدير بالذكر أن مطعم «ماندرين قويدر» موجود في التجمع الخامس برضه في الداون تاون مول، وهو المنافس الأشرس لـ «عبد الرحيم قويدر» رغم أنهم في الأصل أشقاء وانفصلوا في عالم التجارة، لكن المنافسة لازالت شريفة وكل منهم مميز وناجح وله زبائنه. وعرفنا أثناء وجودنا في «كيه لاونج» أن العاملين هنا والشيفات كانوا ضمن فريق عمل مطاعم «كاسبر أند جامبينيز» وبـ يتمتعوا بخبرة كبيرة في المطابخ العالمية والخدمة المتميزة.

المنيو فيه أطباق عالمية وبيتزا وباستا وبرجر وبانيني وسلاطات ومقبلات، وفيه كل الحلويات الشرقية والغربية والآيس كريم والمشروبات بأنواعها. لكن عجبنا أن الأطباق الرئيسية قليلة ومحددة، وده إن دل على شيء فبـ يدل على أنهم مش بـ يعملوا كل الأصناف وخلاص، لكن أطباق منتقاة من البيف والدجاج والسلامون المدخن. لهم تخصص جامد في البرجر والبيتزا، علشان كده راعينا أن طلباتنا تتنوع بين الأطباق الرئيسية والساندويتشات، فطلبنا دجاج بالكاجو (54 جنيه) وكيه لاونج برجر (51 جنيه) وقبلهم طبق سلاطة باسم كيه لاونج سلاد (40 جنيه) وطلبنا أن الأكل ينزل كله مرة واحدة ولحسن الحظ استجابوا لرغبتنا رغم أن معظم الأماكن بـ تطنش الطلب ده.

خبز الشيباتا الساخن والزبدة بـ تنزل قبل أي حاجة علشان تفتح نفسك، وبعدها بدأنا بكيه لاونج سلاد اللي فيها سلامون مدخن باللون الوردي الرائع وعليه صوص التوت المسكر مع شرائح الخس والمشروم الفريش وقطع التين المجفف والطماطم، طعم خيالي ورغم غرابة المكونات لكن المذاق كان مضبوط وما حسيناش بأي حاجة غريبة. طبق التشيكن كاجو هو أحد الأطباق الصينية المعروفة، فيه قطع الدجاج مقطعة مكعبات ومخلوطة بالسمسم والصويا صوص والفلفل والبصل والكاجو طبعًا، وبـ يُقدم معاه أرز بسمتي مدخن، طبق لذيذ وكميته معقولة، كان ناقص شوية بهارات وملح لكن دي ما كانتش مشكلة قوي. البرجر حجمه أصغر من المتوقع، صحيح طعمه بيتي واللحم نقي ومبهر باحترافية، لكن كنا فاكرين الساندويتش هـ يبقى أكبر من كده، لكن مع البطاطس وسلاطة الذرة الحلوة اللي بـ تنزل معاه اكتملت الوجبة اللي ممكن تشبع فرد واحد مش جعان قوي.

حاولنا نطلب طبق حلويات شرقية وتجربة المذاق المميز للمكان في الحلويات، لكن الجرسون اقترح أننا نأخذ الحلويات الشرقية تيك آواي لأنه هـ يقدم لنا هدية قطع تشيز كيك وكيكة الجزر بمناسبة أول زيارة لنا للمحل، وفعلًا قدم لنا الكيك الخرافي بعد وجبتنا كمجاملة رقيقة من المحل، وأكيد ما كانش فيه مكان نطلب أي حلويات شرقية بعدها، لكن جربنا العصائر الفريش من المانجو والليمون بالنعناع (18 جنيه) وكانت عند حسن ظننا من قويدر ملك العصير والآيس كريم، والكنافة والبسبوسة طبعًا.

الخدمة السريعة والموظفين المهذبين ونظافة المكان والطابع المودرن المبهج له كانت أسباب إتمام سعادتنا بالتجربة. «كيه لاونج» إضافة مهمة لمطاعم وكافيهات التجمع الخامس.