The Definitive Guide to Living in the Capital , Cairo , Egypt

مطاعم -
لا بيتزا أل فورنو – La Pizza Alforno

لا بيتزا أل فورنو: بيتزا وأكلات إيطالية فى تيفولى دوم زايد

تم التقييم بواسطة
Angie El Batrawy
قيم
قيم الآن
لا بيتزا أل فورنو: بيتزا وأكلات إيطالية فى تيفولى دوم زايد
سبق وزرنا تيفولى زايد الرائع الجديد فى الشيخ زايد وكتبنا مقال نقدي عن “كافيه بلان – Café Blanc” اللى اتبسطنا فيه جدًا، لكن تفتكروا هـ نتبسط فى المكان اللى هـ نكتب لكم عنه ده؟ تعالوا بنا نكتشف سوا “لا بيتزا أل فورنو – La Pizza Alforno”.
موجود أول ما تدخل على أيدك الشمال، فيه فرن من الطوب الأحمر كبير هـ يشد انتباهك ومكانين للجلوس واحد بالداخل ومحاط بزجاج شفاف والثاني بره فى الهواء الطلق، وده كان المكان اللى اختارناه علشان كمان بـ يطل على النافورات والمنظر الرائع للخضرة.

المنيو عبارة عن ورقة كبيرة مقواة فيها الأطباق وأنواع البيتزا والحلويات والمشروبات والسلاطة باسمائها الإيطالية، وبالتالى كان فيه معاناة فى قراءة الأسماء، كل صنف له شرح لمكوناته، لكن برضه كان فيه معاناة لأن الشرح غريب، وبالتالى طلبنا صديق.. الجرسون.
بعد ما سألنا الجرسون اللطيف والبشوش رشح لنا الأطباق واقترح علينا حاجات علشان نكون مبسوطين، طلبنا بناء على ذلك مكرونة ألفريدو (46 جنيه) وطلبنا منه رجاء أنه يشيل المشروم منها لأننا مش بـ نحبه قوي وأضافنا سموكد بيكون بدلاً منها (10 جنيه) وكمان سلاطة خضروات مشوية (25 جنيه) وبيتزا نابوليتانا (49 جنيه) اللى بـ تتعمل عندهم على الحجر فى الفرن وبـ تكون على شكل نصف دائرة.
نزل لنا زجاجة مياه صغيرة (5 جنيه)، الأكل قعد وقت كثير عقبال ما جاء لنا رغم أن الجرسون قال لنا أنه هـ يجهز فى 7 دقائق! إحنا ما صدقناش من الأول وتوقعنا جاء فى محله، طبق الخضروات المشوية من الأكلات المشهورة بها الأطباق الإيطالية، التسوية بتاعتها كانت كويسة والكمية معقولة وفريش، بداية موفقة لكن ما سدتش جوعنا لحد ما الأكل جاء لنا بعد فترة. خاصة أننا لاحظنا أن الجرسونات كمان مش بـ يتواجدوا كثير فى المنطقة الخارجية المفتوحة ومركزين أكثر على الخدمة بالداخل.
بالنسبة للمكرونة أُحبطنا فى الأول لأنهم نسيوا يشيلوا المشروم، رغم أنهم أضافوا البيكون! اعتذر لنا الجرسون بكل أدب، المكرونة كانت حلوة جدًا والبشاميل قوامه مضبوط والملح كمان، البيتزا كانت بالنسبة لنا مش الأفضل بالمقارنة بأماكن ذقناها فيها، الفكرة أن طريقة التجهيز فى الفرن على الحجر جديدة وبـ تخلى البيتزا طعمها مختلف، لكن اللى مستوقفنا أننا حاسين أننا بـ نأكل نصف رغيف عيش كبير وناشف مش عجينة عليها مكونات بيتزا، التقطيع كان فيه مشقة شوية لكن الطعم والمكونات كانت حلوة.. بشكل عام نوع البيتزا ده مش على مزاجنا.
وقت التحلية.. من اختيارات محدودة قلنا نجرب التيراميسو (31 جنيه) ومن المشروبات الهوت تشوكلت (16 جنيه) الاثنين كانوا كويسين خاصة الهوت تشوكلت اللى دفانا فى الهواء الساقع اللى كنا قاعدين فيه، بس حسينا من التيراميسو أن فيه شراب خفيف بـ تحسه لما تقضم قطمة، بس هو لطيف.
المكان بـ يضيف  12% خدمة، والحق أن الخدمة لطيفة والجرسون كمان ماعدا موضوع أن الأكل تأخر، “لا بيتزا ألفورنو” مكان بروح إيطالية لطيفة ممكن تروح تزوره، بس نعتقد أنك هـ تستمتع بالباستا أكثر من البيتزا.. وكل واحد وذوقه فى الأكل.

نصيحة 360

مش عارفين ليه حاسين أن "لا بيتزا ألفورنو" له علاقة بمطعم "لا بيتزا كريسكي" اللى كان فى داندي مول، بس الاسم متغير!  

أحسن حاجة

قعدة المكان والباستا.

أسوأ حاجة

إحساس أن البيتزا عيش مش عجينة.

Map Data
Map data ©2016
Map DataMap data ©2016
Map data ©2016

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح