The Definitive Guide to Living in the Capital , Cairo , Egypt

من كل مطاعم القاهرة اللى زرناها خلال السنوات اللى فاتت دي كانت أول تجربة لنا فى مطعم بـ يقدم أكل مغربي، مطعم “مازجان – Mazagan” موجود فى مول العرب أمام النافورة الراقصة جنب “بوتري كافيه – Pottery Café” وكاتب بفونط كبير باللون البنفسجي أنه مطعم لبنانى ومغربي، حتى ديكورات المكان مقسمة لقسمين، الداخلى ستايل مغربي بنافورة فى المنتصف بـ تطلع بخار غريب كده، والمكان الخارجي المفتوح عادى مش بروح لبنانية.

دورنا على المطعم ده كثير على الإنترنت بس ما لاقيناش حاجة عنه، بس إحنا عرفنا أنه فاتح بقاله 3 شهور، ومالوش فرع ثاني داخل مصر وأنه بدأ فى دبي، والفرع اللى جاى هـ يكون فى “مول مصر” اللى حاليًا تحت الإنشاء فى طريق الواحات/ 6 أكتوبر.

الجرسونات تعاملهم ودود جدًا والخدمة كويسة، المكان فيه شمسيات كبيرة ودفايات فى المنطقة الخارجية، الشمسيات كانت مفتوحة وقت زيارتنا مش عارفين ليه لأننا كنا بالليل، وأثارت الرعب والقلق فى قلبنا بسبب الهواء الجامد اللى كان بـ يحركها بعنف لدرجة كان ممكن تقع فوق رأسنا، طلبنا من الجرسوم يشيلها ويجيب لنا دفاية أفضل لأنها غير مستخدمة أصلاً وقت الليل وممكن تقع.

المنيو شيك قوى، كل قسم من أقسام المنيو مقسم للبنانى ومغربي، يعني المقبلات والشوربات والأطباق الرئيسية وغيرها كلها مقسمة للمطبخ اللبنانى أو المغربي، وأنت حر تختار اللى عاوزه، وبما أن دى أول مرة نجرب المغربي اختارنا على طول بقلب جامد وفضول غير عادي شوربة الحريرة (23.95 جنيه) ودي بـ تكون عبارة عن عدس أصفر وحمص وكرفس وبقدونس وطماطم بيوريه ومكعب مرق أو شوربة وبصل مضروبين مع بعض وعليهم توابل وفيها قطع لحم مكعبات صغيرة على حسب وصف الجرسون.

من الأطباق الرئيسية أخذنا طاجن لحم بالخضار (72.95 جنيه) من القسم المغربي، ومن اللبنانى أخذنا بيكاتا بالمشروم مع خضار سوتيه معمول بالزبدة (66.95 جنيه) مع أن نعتقد أن البيكاتا دي مش طبق لبنانى الأصل! ونزل لنا زجاجة مياه صغيرة (9.95 جنيه).

أول حاجة الشوربة جاءت لنا رائحتها حلوة أوى وقوامها مش ثقيل عكس ما توقعنا، تحس أنها شوربة لحمة بس فيها بقوليات وتوابل واضح طعمها، والطعم بـ يكون أحلى كمان لو عصرت عليها ليمون، بعد كده نزل طاجن الخضار وما كانش معمول فى طاجن عادى، كانوا حاطينه فى طبق له غطاء منقوش عليه نقوش مغربي دخلتنا فى المووود جدًا ونازل معاها طبق صغير فيه زيتون وسلة عيش أبيض ومعجون أحمر لاذع كده ما عرفناش ده إيه، الخضار كان طري جدًا والتوابل أعطته طعم مختلف، واللحم كان مستوي جدًا وطري وبـ يذوب فى الفم، كان طبق حلو بس بـ ينصح تطلب معاه طلب أرز جانبي علشان تكمل التجربة، البيكاتا كانت طعمها حلو بس اللحم كان قطعه صغيرة قوى، وكانوا حاطين مشروم فى الصوص اللى عليه وحبة كمان حاطينهم فى طبق صغير معاها، السوتيه كان لطيف ومستوي كويس.

تجربة الأكل كانت جميلة، والأكل كان خفيف ما حسيناش بثقل بعد ما خلصنا، علشان كده بصينا على قسم التحلية بعد ما خلصنا على طول وشد عيوننا بطاطا بالآيس كريم (25.95 جنيه) استغربنا فى الأول إزاى بطاطا مع آيس كريم بس كانت عندنا الشجاعة والفضول أننا نجربها، وبصراحة طلعت فى الجون، على عكس توقعاتنا تمامًا ميكس البطاطا مع بولة الآيس كريم والمكسرات كانت ظريفة، البطاطا كانت طرية بزيادة مش عارفين خلوها كده إزاى، وفيها طعم مسكر خفيف ولما بـ تمزج حتة آيس كريم ومكسرات معاها بـ تكون متعة.. اكتشاف جديد أكيد هـ نحاول نجيب طريقة عمله ونطبقها فى البيت فى العزومات.

أسعار المنيو فى بعض الأقسام غالية زي المقبلات مثلاً، فى حين فى أقسام ثانية معقولة، بـ يضاف للشيك خدمة وضريبة، وبـ ييجي لك فى الآخر الشيك فى طربوش أحمر (ستايل مغربي) ومفتوح من فوق كأنه علبة، افتكاسة حلوة أوى ضحكتنا قبل ما نمشي، فيه لخبطة صغيرة حصلت فى الشيك فى الآخر بش مش مشكلة مادام إحنا اتبسطنا وهما كانوا ذوق معانا جدًا.. بعد التجربة دي أكيد هـ نبدأ ندور على أماكن مطبخ مغربي جديدة فى القاهرة.