The Definitive Guide to Living in the Capital , Cairo , Egypt

في محل صغير في الزمالك في شارع طه
حسين جنب محل حلويات «بامبكين – Pumpkin»
ومحل التي شيرتات «زافير – Zafir»
هـ تلاقي «مانشيز – Munchies»
بلون اللوجو الأصفر المميز والمنور من بعيد.

محل “مانشيز” مكتوب
شعار محله (كابز أند كريبز – Cups
‘n’ Crepes) والمكان زجاجه شفاف بـ يطل على الشارع ومساحته صغيرة جدًا يا دوب
فيه خمس ترابيزات كل واحدة بأربعة كراسي، على اليمين فيه المطبخ الصغير بتاعهم
وعلى الحائط وحدات صغيرة على شكل نصف دائرة في كل وحدة فيها أشكال وأنواع شوكولاتة
وصوص وأنواع كاندي وكل المكونات المسكرة والمشكلتة اللي بـ تضاف على الوافلز
والكريب والبان كيك اللي بـ يقدموها.

المنيو عندهم مليانة أصناف كثيرة
بأنواع مختلفة: مشروبات (ساخنة وباردة)، والكريب (حاذق وحلو)، بان كيك، وافل، سلاطات،
ساندويتشات، وكمان المشروبات الغازية، لما تطلب اللي أنت عاوزة بـ يعملوه لك وأنت
قاعد منتظر فـ بيبقى طازج وجاى لك سخن.

الطلب أخذ وقت شوية عقبال ما جاء
على الرغم من أننا أول ناس دخلنا المكان، طلبنا كريب عليه فواكة وصوص شوكولاتة وقال
لنا الجرسون على إضافة كريمة مخفوقة ووافقنا، المشكلة أنه جاء بعد شوية يقول أنها
مش موجودة! الكريب حجمه كبير ولكن حصل موقف ثاني جابوه عليه موز فقط وإحنا طالبينه
بالفواكة، ولما استفسرنا قال لنا أن الفواكة هي دي (المفروض يكتبوا أنه كريب
بالموز)! وبعدين اكتشفنا عنده كيوي وما حطوش فـ طلبنا إضافته مع الموز، موقف غريب!

الطعم عامة حلو للصنفين، الكريب
كان حلو تقديمه والطعم جيد جدًا والكمية كبيرة ممكن تقسمه مع أحد لأننا أكلنا آخر
قطعة بالعافية، الوافل ما كانش طري كان ناشف شوية مقرمش فمع الشوكولاتة ما كانش
فيه تناغم بينهم، خاصة أن كمان الآيس كريم كان عبارة عن مياة مش بولة.

طلبنا كمان وافل بالشوكولاتة
النوتيلا وطلبنا عليها آيس كريم، لكن لما جابوها كان الآيس كريم غريب قوي لأنهم
جابوه في كوباية وسايح عامل زي المشروب وأنت بـ تحطه على الوافل من فوق بنفسك!

المكان لطيف لو حابب تأكل مخبوزات
فريش من أول الخبز لحد مكوناتها كمان، لكن أكيد تجربة غيرنا في المكان ممكن تكون
أفضل لأنهم شاطرين.