The Definitive Guide to Living in the Capital , Cairo , Egypt

مطاعم
مطعم Track Burger

مطعم Track Burger: الاهتمام بالديكور حلو.. بس الاهتمام بالأكل أحلى

Track Burger المقطم برجر بروست ريفيو مطاعم القاهرة موزريلا نقد مطاعم
  • بلوك 9078 -شارع 9- تحت مطعم الشبراوي - المقطم- القاهرة.
  • 12:00 - 23:59
تم التقييم بواسطة
Omar Abd-elmaqsoud
قيم
قيم الآن
مطعم Track Burger: الاهتمام بالديكور حلو.. بس الاهتمام بالأكل أحلى

طبيعي إن كل حد عنده مشروع خاص به، بيحاول على قد ما يقدر يقدم جودة ممتازة وسعر مقبول لعملائه، وفي معظم الأماكن الديكور بيلعب دور كبير جدًا في لفت النظر للمكان، وكل ما كان مختلف أو ما حصلش، كل ما كان له ناسه وزباينه اللي بتحس بالانتماء للمكان وكأنه مكانها فعليًا.

هي دي بالضبط النقطة اللي لعب عليها مطعم “Track Burger” في شارع 9 في المقطم، ديكور مختلف وماحصلش، ومكان استراتيجي على شارع عام ومشهور، لكن يا ترى أخبار الجودة والسعر إيه؟ “كايرو 360” زار المكان علشان يعرف يجاوب على السؤالين دول.

من البداية كده، خلينا نتفق إن الاهتمام بديكور المكان والإصرار على إنه يكون “مختلف” دي نقطة تفوق فيها مطعم “Track Burger” بعد ما استحضر روح “عالم السيارات” في المكان، فمن أول الكراسي اللي بنقعد عليها اللي على شكل “فيزبا” أو الكنب اللي عبارة عن الكنبة الخلفية لعربيات “فولكس فاجن” المعروفة بـ “البيتلز” أو “الخنفساء”، مرورًا بالكاشير اللي هتلاقي قدامه “دريكسيون” مرورًا بقطع الغيار المتعلقة في السقف كزينة أو استغلالها كمصدر إضاءة، ولحد ما نوصل للوحات والأعمال الفنية المتعلقة بعالم السيارات والمواتير، لدرجة إن الصينية اللي بيتقدم فيها الأكل على شكل عربية “بيتلز”.

خلينا ندخل على المفيد، الأكل وجودته وسعره، قررنا نجرب أشهر السندوتشات اللي بيقدمها المكان، بالإضافة لوجبات الفراخ البروست اللي بتبدأ من 3 قطع لحد 21 قطع.

البداية كانت مع سندوتش (باك فاير- Back Fire) اللي عبارة عن قطعة دجاج مقلية مع خس وهاليبينو وصوص سراتشا، وتشيلي صوص، وحلقة بصل مقلية، وسعره لو قطعة واحدة (49 جنيه) ولو دوبل (69 جنيه) ودي أسعار تعتبر معقولة على المستوى العام، لكن في الحقيقة وعلى المستوى الخاص واجهتنا مشكلتين، الأولى هي إن قطعة الفراخ اللي كانت موجودة في الساندوتش أقرب ما يكون لقطعة هامبورجر فراخ مقلية، مش قطعة فراخ حقيقية بروست، ده غير إن العيش كان واضح إنه مش طازه.

نفس مشكلة العيش دي واجهتنا كمان في السندوتش اللي بعده (هوت كروسر – Hot Crosser) واللي كان عبارة عن شريحة برجر لحم على الجريل، مع تراك صوص وخس وطماطم وتشيلي صوص، وسعره (59 جنيه) للـ Single و(84 جنيه) للدوبل، وبصراحة كان السعر مبالغ فيه بالنسبة للطعم.

اختارنا من الوجبات أصغر وجبة كتجربة وسعرها (64 جنيه) في الكومبو أو (52 جنيه) من غير الكومبو، وهي عبارة عن 3 قطع فراخ بروست مع سلطة “كول سلو” حجمها صغير، وعيش.. واللي في الحقيقة مانزلش مع الوجبة، وبرغم إننا طلبناه أكتر من مرة.

الفراخ البروست كانت ظريفة لكن التتبيلة بتاعتها ماكانتش واصلة للحم نفسه، وبالتالي تحس إن القشرة الخارجية المقرمشة بطعم، ولحم الفراخ من جوه بطعم تاني، ورأينا المتواضع إنها كانت محتاجة تتبل جوه وبره، أو بمعنى أدق تقعد في التتبيلة وقت أكتر.

صوابع الموزاريلا كانت أحلى حاجة في المكان بعد الديكور، هتلاقوها في المنيو باسم “موزريلا سباركس – Mozzarella Sparks” وسعر الـ 5 صوابع مع صوص من اختيارك (30 جنيه).

التجربة بشكل عام كانت ظريفة، سرعة عمل الأوردر كانت تستحق التقدير (20 دقيقة) تقريبًا، لكن الغريب إن برغم وجود عمال في المطعم بيلفوا يمين وشمال، إلا إنك بتستلم أوردرك بنفسك! وده كان شئ مش مفهوم بالنسبة لنا.

نتمنى المرة الجاية تكون أفضل وأفضل، وأكيد هنكرر التجربة تاني علشان نتأكد من تحسن الخدمة والجودة في كل مرة.

نصيحة 360

خد كاش معاك، الركنات في الشارع أنت ونصيبك، مش شرط تلاقي قدام المطعم بالضبط، فاعمل حسابك تركن في أول ركنة تقابلك.

أحسن حاجة

الجو العام في المكان ظريف، وفيه سرعة في الأداء، بالنسبة للأكل فهو مش وحش، بس محتاج اهتمام أكتر بالجودة.

أسوأ حاجة

مش معروف إذا كان المفروض أخدم نفسي بنفسي ولا في حد بيجيب الأوردر للترابيزة؟.. ده غير إن الفيزا كانت عطلانة عندهم.

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح