The Definitive Guide to Living in the Capital , Cairo , Egypt

مكرونة جو جو – Macarona Go Go!

مكرونة جوجو: بيتزا وكشري ومعجنات في سيتي ستارز

  • صالة طعام بيراميدز، الدور الأول
  • إيطالي
  • 01225100200
تم التقييم بواسطة
Waleed Abuarab
قيم
قيم الآن
مكرونة جوجو: بيتزا وكشري ومعجنات في سيتي ستارز

كل مرة نكون في سيتي ستارز في الفوود كورت اللي في الدور الأرضي عينينا بـ
تقع على «مكرونة جوجو» وبـ نفكر مرتين قبل ما نقرر نجربه، وده لأكثر من سبب؛ منهم
أن دائمًا فيه اغراءات أقوى في المحلات المجاورة من أكلات صينية وبرجر وبيتزا،
وسبب ثاني هو الأسعار غير المنطقية أحيانًا اللي بـ نشوفها في المنيو زي طبق
الكشري الكومبو اللي بـ 20 جنيه، صحيح هو في سيتي ستارز، لكن خطوتين برة المول
وتأكله بربع المبلغ ده.

لما قررنا نجرب «مكرونة جوجو» بعدنا عن طبق الكشري المستفز، وأخذنا وقتنا
في تصفح المنيو الورقي المطبوع على غير عادة مطاعم الفوود كورت اللي بـ تبقى عبارة
عن لوحة أسعار في الجدار الخلفي للمحل. المنيو متقسم بطريقة تلخبط وكان لازم نسأل
أحد العاملين بالمطعم علشان نفهم التقسيمة دي، وعرفنا بإختصار أن فيه وجبات من
المكرونة بحجمين (الوسط والكبير) والوجبة مكونة من مكرونة بأشكال مختلفة ولحم أو
دجاج أو جمبري، ولو اخترت الكومبو بـ تضيف 5 جنيه وتأخذ مع الوجبة بيبسي من
الماكينة وقطعة عيش بالثوم وعلبة سلاطة كول سلو. الواضح في المنيو هو البيتزا
والكريب والسلاطات والمقبلات والمشروبات.

من منيو وجبات جوجو طلبنا مكرونة فيتوتشيني (شرائط) بالصوص الأحمر مع كرات
اللحم Meatballs وأضفنا 4 جنيه علشان
نأخذ الكومبو بالحجم الكبير  وأضفنا جبنة
البارميزان بـ 5 جنيه والفلفل الحار بـ 3 جنيه، يعني الوجبة اتكلفت 52 جنيه،
والحقيقة كانت مشبعة وطعم المكونات فريش لكن الصلصة كانت أكثر من اللازم والوابل
قليلة على المكرونة وكرات اللحم ولولا الجبنة البارميزان والطعم الحار اللي اضفنا
ماكانتش هـ تبقى ممتعة كفاية، والكول سلوك اللي مع الكومبو كانت لذيذة، وعيش الثوم
كمان. المكرونة موجودة بكل الأشكال؛ سباجيتي وبنا وفارفلي وفوسيلي ورقائق
الرافيولي وفيه كمان لفائف التورتيليني بالجبنة والسبانخ.

ممكن تطلب المكرونة  بالمذاقات
المختلفة من غير اضافات لحوم، ممكن بصوص أبيض ومشروم أو صلصة طماطم وأعشاب وريحان
وممكن بالصوص الوردي (الأحمر على الأبيض) أو بالخضروات أو بالثوم والزيت. اضافات
اللحوم بـ تكون سوسيس (26 جنيه) أو دجاج أو جمبري (35 جنيه) وفيه مكرونة بكريمة
البيستو وجبن البارميزان (28 جنيه). من الآخر أنت في عالم المكرونة، أي شكل وأي
طعم وأي لون.

البيتزا حجم واحد يعتبر صغير، طلبنا واحدة بيتزا هاوايان بالموتزاريلا والأناناس
والبيبروني (29 جنيه) وغير أنها كانت صغيرة على سعرها لكن كمان ماكانش فيها
بيبروني. كانت رقيقة وفريش والجبنة السائحة خطيرة، لكن اتلسعت شوية من تحت في
الفرن، بس طعمها مميز ومش شبه أماكن تانية.

اللازانيا (30 جنيه) حجمها كبير جدًا وغنية بالحشو وطعمها لذيذ، وكان نفسنا
نجرب الكريب الحلو و الحادق لكن ماقدرناش. أخذنا مع الأكل علبة سلاطة سيزر بالدجاج
(20 جنيه) وكانت أكثر من رائعة، الخس ومكعبات العيش المحمص فريش وحجم والعبوة كبير
ومليانة شرائح دجاج. فيه مشهيات تانية زي دبابيس الدجاج والبطاطس المحمرة والجبنة المقلية.

مش هـ تنتظر أكثر من 15 دقيقة علشان تستلم طلبك، وممكن أقل من كده لو مش
طالب بيتزا، وفيه بعض المشروبات الايطالية زي الكابوتشينو الساخن والبارد (13
جنيه) والمكياتو والاسبريسو (9 جنيه) وعصائر فريش (12 جنيه).

«مكرونة جوجو» قدر يخلينا نغير فكرتنا عنه ودخل دائرة اختيارتنا من مطاعم
الفوود كورت بعد ما عجبتنا تشكيلات المكرونة والبيتزا، لكن لسة محتاجين شوية وقت
قبل ما نقرر نجيب الكشري اللي بـ 20 جنيه.

نصيحة 360

البيتزا وحدها لا تكفي، وهـ تحتاج اضافات على المكرونة أكيد.

أحسن حاجة

أشكال ومذاقات المكرونة، واللازانيا.

أسوأ حاجة

بيتزا البيبروني من غير بيبروني! وأسعار الكشري والبيتزا.

Map Data
Map data ©2016
Map DataMap data ©2016
Map data ©2016

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح