The Definitive Guide to Living in the Capital , Cairo , Egypt

وان أوك – One Oak

وان أوك: ما لذ وطاب في فرع بوينت 90 الجديد

  • داخل تيفولي دوم الشيخ زايد
  • ستيك,عالمي
  • 01122265555
تم التقييم بواسطة
Ramy Soliman
قيم
قيم الآن
وان أوك: ما لذ وطاب في فرع بوينت 90 الجديد

اختيار مكان خروجتك مع أصحابك موضوع متعب، خصوصًا لو عندك الصاحب اللي بيخاف يحصل له حاجة من أكلة سوشي أو صاحب ثاني قرر فجأة يكره أي حاجة فيها لحمة. وان أوك في الحقيقة بيرضي كل الأذواق، وبيقدم منيو فيها أشكال وألوان من الأكل.

أجدد فروع وان أوك فتح في مول بوينت 90 القاهرة الجديدة، ويتميز بمساحته الكبيرة ودرجات اللون الرمادي مع الخشب والإضاءة الحمراء اللي عملوا شكل جذاب مع الحوائط اللي على شكل وافل والإضاءة اللي على شكل العنب. البار هناك كمان أضاف طابع كاجوال وأجواء هايلة للمكان، بس المشكلة الوحيدة كانت السقف المعمول على الطراز الصناعي واللي قلل من جمال المكان. أما منطقة الآوت دور فبتقدم قعدات بسيطة مفيهاش جديد.

بدأنا نستكشف منيو وان أوك الضخمة مع ريد بول شيري بومب كوكتيل Red Bull Cherry Bomb Cocktail (36 جنيه) ومعاه ساوث ويسترن رولز (32 جنيه). الكوكتيل كان عبارة عن ليمون وبلوبيري وعصير فراولة وورق نعناع وريد بول، وطبعًا الكلام اللي فات لما تشوفه هيقول لك إننا داخلين على مشروب ماحصلش، لكن الملاحظة إن طعم الليمون والبلوبيري ماكانوش ظاهرين، وورق النعناع كان للزينة بس.

نفس المشكلة واجهتنا مع الساوث ويسترن رولز اللي مافيهوش توازن بين المكونات، لكن أكيد الهالوبينو والفلفل الألوان والذرة الحلوة والفاصوليا الحمراء والجبنة الموتزاريلا والفراخ المشوية الملفوفين في عيش تورتيا مقلي كان هايل خصوصًا أنه مقرمش من بره وطعمه لذيذ، بس المشكلة كمان أن كمية الموتزاريلا الكبيرة كانت طاغية على طعم باقي المكونات والسويت تاي شيلي صوص ماكانش ماشي مع الأكل. جايز لو كانوا استخدموا صوص رانش كان هيعمل شغل كويس.

نروح على الكلام الكبير، والبداية مع طبق كواترو ستيك سكيورQuatro Steak Skewer (148 جنيه) مع بلوبيري صوص، وهو عبارة عن قطع بيف تنرولين وريب آي وستريبلوين وفخذة وكلهم محطوطين على سيخ شوي – الموضوع كبير يا جماعة! تتبيلة اللحمة كانت ممتازة وطعمها روعة، بس المشكلة أن الأربع قطع مش مستويين زي بعض، يعني ممكن وأنت بتأكل تلاقي حاجة مستوية medium rare وقطعة ثانية well-done وهكذا.

قوام صوص البلوبيري كان عامل زي المربي وماكانش مسكّر زي ما كنا فاكرين، بس البلوبيري بصفته فاكهة عمل طعم ممتاز مع تتبيلة الستيك.

الميزة كمان عند وان أوك إن الأطباق الجانبية مالهاش حصر، وبعد تفكير عميق قررنا نطلب السبانخ بالكريمة وعليها جبنة سايحة. طعم الطبق كان روعة، بس الملاحظة إنه كان ثقيل جدًا وينفع يكون صوص أحسن ما يكون طبق جانبي.

بعد ما خلصنا اللحوم، دخلنا على أطباق السوشي. طلبنا كلاسيك ساكي نيجيري Sake Nigiri (9.50 جنيه/للقطعة) واخترنا كمان من قسم النيجيري الجديد "نيو ستايل" ماجورو واسابي  Maguro Wasabi(16.50 جنيه/للقطعة).

نبدأ مع الساكي نيجيري والسالمون الطازة المتقطع صح الصح، وكمان الأرز كان حكاية. الماجورو واسابي كمان كان هايل، بس يا ريت حد يعرفنا فين "النيو ستايل" بالضبط. لاحظنا كمان إن مافيش بصل اخضر أو كافيار برتقالي، وكمان الواسابي مايونيز كان نفس طعم المايونيز العادي – من الأخر، كأنك بتأكل تونا نيجيري.

اللي يستحق يكون تحت بند "نيو ستايل" هو المانجو إيبي Mango Ebi، خصوصًا لما تضيف صوص المانجو مع الجمبري.

طبعًا شعبية السوشي المقلي مش أقل من السوشي العادي، وعلشان كده قررنا نجرب الكنافة رول، واللي كانت عبارة عن شريمب تمبورا وكراب أوراماكي رول وعليهم صوص ترياكي. الكلام على الورق روعة طبعًا، بس المشكلة إن عجينة الكنافة ماكانتش على المستوى.

اللي لفت انتباهنا فعلًا لما شوفناه كان السبايسي ليمون رول، وهو من أطباق موري سوشي المعروفة. الرول ده عند وان أوك حجمه أكبر، بس لو هنتكلم عن الطعم فالمشكلة كانت في نسبة الأرز الكبيرة بالمقارنة مع السالمون والجمبري والجبنة البيضاء، لدرجة إننا حسينا إنه رول أرز. صحيح الصوص عندهم طعمه حلو، بس نقدر نقول إن نسخة موري سوشي تكسب الرهان.

لقطة النهاية كانت مع فرايد بانانا بالقرفة  Cinnamon Fried Banana(40 جنيه)، عبارة عن خمس قطع موز متغطيين بطبقة مقلية، ومرشوش عليهم عسل وقرفة. العجينة على الموز كانت مقرمشة وطعم القرفة كان هايل، ومعاهم بولة آيس كريم فانيليا لزوم الطراوة، بس العسل اللي مكتوب في المنيو طلع كراميل.

تجربتنا بشكل عام في وان أوك كانت مميزة، وجزء كبير من التميز كان من نصيب الديكورات والأجواء الرائعة.

نصيحة 360

احجز بدري وابعد عن الزحمة – أيوه المكان شعبيته كبيرة.

أحسن حاجة

الديكورات عملت شغل عالي.

أسوأ حاجة

أخطاء بسيطة في الأكل.

Map Data
Map data ©2016
Map DataMap data ©2016
Map data ©2016

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح