The Definitive Guide to Living in the Capital , Cairo , Egypt

معالم وسياحة
القرية الفرعونية

القرية الفرعونية: حكاية مكان في القاهرة بدأ بـ 5000 شجرة

آثار فرعونية البحر الأعظم القاهرة القرية الفرعونية النيل خروجات رحلات عنوان القرية الفرعونية ورق بردي
  • الجيزة – 3 شارع البحر الأعظم
تم التقييم بواسطة
Ahmed Abd El Gawad
قيم
قيم الآن
القرية الفرعونية: حكاية مكان في القاهرة بدأ بـ 5000 شجرة

شوف فيديو كايرو 360 عن القرية الفرعونية من اللينك ده.

كان حلم وأصبح موجود على أرض الواقع، مكان تقدر تشوف فيه قدماء المصريين، وعيشتهم وحياتهم، وتتعرف على تاريخهم، ودولتهم، مكان بيجسد حضارتنا العظيمة، بكل اللي فيها من جمال، لكن يا ترى هل المكان قد الحضارة؟

القرية الفرعونية مكان موجود في شارع البحر الأعظم بالجيزة، مش مجرد مكان عادي، هي مساحة ضخمة جدًا على النيل، هي متحف حي بيجسد كل حياة قدماء المصريين، والمكان اسمه جزيرة يعقوب، بدأ منها د/حسن رجب، سنة 1974 وزرع فيها حوالي 5000 شجرة، زي شجر الصفصاف، الجميز، النخيل البلح، وجمع مجموعة من النباتات النادرة علشان المظهر يبقى مختلف.

سنة  1984 افتتح د/حسن رجب القرية الفرعونية، يعني قعد  10 سنين يشتغل فيها، وبيقول موقع القرية إنه اتكلفت أكثر من 6 ملايين دولار، ومن بعده أصبح ابنه  د/عبد السلام، هو اللي بيدير القرية، واللي قدر يمشي على نفس نهج والده، ويجدد في القرية، بزيادة عدد المتاحف، وآخر مشروع بيعمله دلوقتي، هو متحف المملكة العربية السعودية، وفيه بيعرض تاريخ المملكة.

النيل والمنظر اللي هناك، والمراكب اللي بتستمتع بيها أول ما تروح وبتاخدك في جولة، وتسمع فيها تسجيل صوتي بيعرفك ايه المظاهر اللي بتشوفها، يمكن دي من أهم الحاجات اللي بتستمتع بيها وانت هناك، كمان المرشد اللي معاك، بيعرفك على المتاحف واملعابد وأشكالها وتاريخها.

نموذج لمقبرة توت عنخ آمون، شكل المعابد القديمة، ناس حقيقية بتمثل وتؤدي دور المصريين في أعمالهم، ومجمع للكافيهات والمطاعم، كمان مكان مخصص بيعمل العيش المصري بشكل جميل، وطعم لذيذ، وجنب كل ده  12 متحف، بيتكلموا عن تاريخ مصر في مراحله المختلفة، من أول الفرعوني لحد الحديث، جنب متحف عبد الناصر، ومتحف الاختراعات الحديثة، اللي بيتكلم عن الاختراعات اللي عملها قدماء المصريين، وكمان بيتكلم عن فكرة الاختراعات في العالم، وبيعرفك على أهم المخترعين في العصور المختلفة، كل ده هو اللي بتلاقيه هناك.

كل اللي فات حلو أكيد، يمكن المشكلة اللي ممكن تلاقيها هناك بتكون في حالتين، لو زرتها لوحدك، وده هايصعب عليك المهمة، لإن المكان كبير، وبتبقى محتاج حد يشرح لك، أما الحاجة التانية لو المرشد اللي معاك مبيعرفش يحكي، أو ثقافته قليلة، فده هايخليك تتضايق، ومتقدرش تستفيد، أما بقى لو المرشد شاطر، فده هايخليك مبسوط وعايز تروح أكتر من مرة.

نصيحة 360

خد معاك كاب ونظارة وواقي شمس

أحسن حاجة

المكان واسع وبيعرفك على تاريخ مصر

أسوأ حاجة

لو المرشد اللي معاك مش بيعرف يحكي هتتعب، وماينفعش تروح من غير مرشد

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح