The Definitive Guide to Living in the Capital , Cairo , Egypt

اتعودنا دايمًا نشوف أصحاب القدرات الخارقة أو السوبر هيروز زي “سوبر مان” أو “سبايدر مان” وهم بينقذوا المجتمع ويحاربوا الجريمة والكل يعاملهم باحترام، لكن في Code 8 بنشوف أصحاب القدرات الخارقة وهم مطاردين من الشرطة وبيتعرضوا للاضطهاد.

على الرغم من سهولة قصة Code 8 لكن مانقدرش نحكي عنها كتير بدون حرق للأحداث، علشان كده هنكتفي بإننا نقول لكم إن الفيلم بيحكي عن واقع مختلف تمامًا لأصحاب القدرات الخارقة، وإزاي ممكن يكونوا أشخاص مطاردين ومطلوبين.

الأداء التمثيلي لأبطال الفيلم “ستيفن أميل” و”جريج بريك” و”روبي أميل” كان جيد، لكن من ناحية تانية كنا محتاجين سيناريو أقوى يوظف الأداء التمثيلي ده بشكل أحسن، ويمكن علشان كده كنا حاسين بانفصال بين إخراج “جيف تشان” وبين سيناريو “كريس بار” بشكل أضر بالفيلم وكان غير مفيد بالنسبة لنا كمشاهدين، وده خلق صعوبة في متابعة الأحداث بشكل جيد.

لكن نقدر نقول إن توظيف الخدع السينمائية كان جيد برده برغم استخدامها القليل شوية، وده كان أفضل بالنسبة للمشاهدين اللي زهقوا من الإبهار البصري اللي بتقدمه “مارفل” و”DC” وعاوزين فيلم عن الأبطال الخارقين لكن بمنظور مختلف، وأقرب للواقعية.