The Definitive Guide to Living in the Capital , Cairo , Egypt

يعتبر الفيلم واحد من الأفلام القليلة خلال الفترة الأخيرة اللى ممكن العائلة كلها تستمتع به، الصغار بسبب الإبهار وجودة الرسومات وأسلوب عرض الفيلم، وكمان الكبار من خلال الكوميديا الراقية والضحك المعتمد على المواقف والإيفيهات الظريفة، ودي تعتبر تجربة مختلفة وجديدة للجميع.

من إخراج تيم جونسون، وبأداء صوتي من ريهانا، جينيفر لوبيز، ستيف مارتن وجيم بارسونز بـ نشوف قصة كائن فضائي لطيف وظريف وشقي في نفس الوقت اسمه "أوه"، اكتسب اسمه نتيجة رد فعل كل المحيطين به لما يشوفوه، أوه بـ يبحث عن موطن آمن يقدر يعيش فيه بأمان، ومش بـ يلاقي -لسوء حظه- أفضل من كوكب الأرض علشان يعيش عليه، الأمر اللي بـ يخليه يصطدم ببنت شقية هي كمان، ومن هنا بـ تتولد المواقف والمشاهد اللي بـ تجمع بين الإثارة والأكشن والكوميديا، واللي مش عاوزين نحرقها عليكم.

الفيلم تميز بدعاية إعلانية قوية ومتميزة، من خلال حملة ذكية استهدفت عمل إعلان لتوعية المشاهدين بضرورة عمل تليفوناتهم Silent أثناء الأفلام، الأمر اللي جعل معظم قاعات العرض السينمائى تعرض الإعلان –اللى بـ يتضمن إعلان للفيلم كمان- وده كان من أساليب الدعاية الذكية اللى سبق واتبعتها أفلام زي The Lego movie وغيرها من الأعمال.

التحريك والإبهار في الفيلم كان أكثر من رائع، والحركة على الشاشة كانت انسيابية، وبعض المشاهد كانت مثيرة ومدهشة، ما ننكرش أننا شعرنا بالملل في بعض المشاهد، لكن بشكل عام نقدر نقول أن الفيلم كان متميز من الناحية التقنية أو من ناحية السيناريو.

الأداء الصوتي في الفيلم كان أكثر من متميز، والأمر ينطبق على جميع الممثلين المشاركين، ولفت نظرنا حجم الأسماء المشاركة في الأداء الصوتي للفيلم، وكان نفسنا الممثلين الكبار العرب والمصريين يعملوا زي الأجانب ويشاركوا بالأداء الصوتي لأفلام الأنيميشن لكن… أه صحيح إحنا نسينا أن مصر مش بـ تنتج أفلام أنيميشن ضخمة أصلًا، لكن بما أننا بـ نقارن بين الأجانب وبيننا لازم نقول أن عندنا مشاركات متميزة في الأداء الصوتي زي الفنان يحيى الفخراني اللي بـ يقدم أعمال كثير بصوته، وغيرهم من الفنانين الكبار، لكننا نتوقع ونتمنى الأقوى والأفضل دائمًا.

فيلم Home مثالى للمشاهدة الأسرية في عطلة نهاية الأسبوع، لأنه هـ يكون تجربة متميزة وجديدة للكبار والصغار على حد سواء.