The Definitive Guide to Living in the Capital , Cairo , Egypt

مصدر الصورة من هنا

منطقة وسط البلد في القاهرة عالم تاني خالص، في شوارعها وناسها وروحها وقعدتها، كل حاجة فيها مختلفة، في السطور الجاية هنعرفكم على أهم 5 شوارع في وسط البلد.. هيرجعوكم للقاهرة أيام زمان بسبب عظمة مبانيهم الجميلة.

قصر النيل

أشهر شارع تجاري في مصر من عام 1882، واسمه جه من خلال قصر الأميرة نازلي اللي بنته والدها محمد علي على النيل، وهو بيبدأ من المتحف المصري وبيوصل للعتبة، وفيه عمارة الأموبيليا الأشهر على الإطلاق، بخلاف الأسماء الكبيرة في عالم التجارة والبنوك.

طلعت حرب

الاقتصادي المصري الكبير اللي أسس بنك مصر، له شارع وميدان باسمه، ومعالم الشارع من أشهر الحاجات اللي ممكن تستمتع بجمالها وتصميمها منذ عام 1924، وأشهرها عمارة يعقوبيان وكافيه ريش ومكتبة مدبولي وعمر أفندي وصيدناوي.

محمد محمود

بدأت شهرته على الصعيد المحلي بعد أحداث ثورة 25 يناير، وهو متفرع من ميدان التحرير وبيوصل لحي عابدين، وفيه مجموعة من الكافيهات العالمية والشعبية، ومباني الجامعة الأمريكية ومدرسة ليسيه الحرية، والمدرسة الألمانية.

مصدر الصورة من هنا

قصر العينى

شارع مهم جدًا وفيه 9 وزارات والبرلمان ودار الحكمة والمجمع العلمي ومجمع التحرير، ومجموعة من الشركات الهامة، ومسرحين وسفارات، وبيوصلك لأقدم مستشفى بيعود تاريخها لعهد محمد علي باشا “قصر العيني الجامعي” اللي اتسمى الشارع على اسمها، ومجموعة من المحلات والمقاهي ومساحات العمل المشتركة.

شامبليون

والشارع دا بيبدأ من دار القضاء العالي وبيوصل لميدان التحرير، وفيه نادي القضاة المصري وأهم محلات قطع غيار السيارات، وكشري أبو طارق وقصر شامبليون اللي بيعد واحد من اهم التحف المعمارية الأثرية في المنطقة، وبنوك وشركات مختلفة، وسمي على اسم عالم الآثار “جون فرانسوا شامبليون” اللي فك رموز حجر رشيد.