The Definitive Guide to Living in the Capital , Cairo , Egypt

الصور: عمر الرزاز

بيت بسيط بيحمل رقم 8 في درب قرمز، هنا وُلد الأديب الكبير نجيب محفوظ، وهنا أطلق صرخته الأولى بعد خروجه للدنيا، وهنا كمان عاش من عمره 13 سنة، قبل ما ينتقل للحياة في حي العباسية. في الدرب ده اتعلم أديب نوبل يعني إيه حارة مصرية، ومن ذكرياته في المكان ده خرجت إبداعاته الجميلة اللي كان بطلها الأهم هو “الحارة” بمعناها الواسع.. تعالوا نتعرف أكثر على درب قرمز.

 

درب قرمز هو شارع سكني بيقع في قلب القاهرة، بيتفرع من الجزء الشمالي لشارع المعز لدين الله، وبالتحديد من نهاية شارع التمبكشية الغربي.

تم تأسيس الدرب في القرن الرابع الهجري/ العاشر الميلادي. وحمل اسم درب قرمز نسبة إلى الشيخ مصطفي دده قراميز، واللي كان بيدرس العلوم الدينية وعلوم الصوفية للطلاب والمتصوفة والدراويش بتكية وضريح “سنان باشا” الموجودة في أول الدرب، ودي التكية اللي أنشأها الوزير سنان باشا والي مصر العثماني.

اشتهر الشيخ مصطفى بين سكان الجمالية باسم مصطفى قرمز. وفي أوائل القرن السابع عشر الميلادي أصبح الاسم الشائع لتكية سنان باشا “تكية قرمز””، وأصبح الدرب نفسه مشهور باسم “درب قرمز”.

مهم نقول لكم إن التكية والضريح أنشأهم سنان باشا سنة 981هـ للشيخ “نسا الخراساني”، وهو المذكور اسمه وتاريخ وفاته على باب الضريح، لكن دُفنت الكتابة دي مع الجزء اللي دفن من باب الضريح في باطن الأرض لعلوها عليه مع تقادم الزمن.

بمرور السنين تعرضت مباني التكية للتخريب، وأنشئت مكانها بيوت لكن فضل الضريح ثابت بيقاوم الزمن، وهو اللي تبقى من الأثر اللي كان بيضم الضريح وتكية كانت بتكفل أكل وشرب ومعيشة الفقراء والمساكين.

ومعروف إن الأديب الكبير نجيب محفوظ اتولد بالعقار رقم 8 بدرب قرمز، واتعلم واتربي في المكان ده لحد ما أصبح عمره 13 سنة، وبعدها انتقل مع أسرته للسكن في حي العباسية.

*المعلومات في المقال نقلًا عن موقع حكاية شارع التابع للجهاز القومي للتنسيق الحضاري.