The Definitive Guide to Living in the Capital , Cairo , Egypt

تسوق
برشكا – Bershka

برشكا: چينز وتي شيرتات مطرقعة في المهندسين

  • 36 شارع جزيرة العرب
  • ملابس رجالي
تم التقييم بواسطة
Cairo 360
قيم
قيم الآن
برشكا: چينز وتي شيرتات مطرقعة في المهندسين

«برشكا – Bershka»، الأخ
الثالث للمحلات الأسبانية الأصل «زارا – Zara» و«پول
اند بير – Pull and bear»، اقتحم
مؤخراً عالم الأزياء المصري بكل قوة، و فجأة بقى ملجأ الشباب الأساسي اللي ما
يقدروش يعملوا جولة تسوق من غير ما يعدّوا عليه.

خصوصاً فرع
المهندسين لإنه دورين وتحسه هو لوحده عبارة عن مول صغير، وأغلب الأوقات ماتعرفش
تقف فيه من كتر الزحمة. الدور الأول فيه الملابس الحريمي وأجدد الحاجات اللي وصلت،
والدور الثاني نصه رجالي، ونصه الحاجات القديمة شوية واللي عليها خصومات.

من أشهر الحاجات
اللي بـ يعملها «برشكا» هي الپلوفرات الخفيفة، والتي شيرتات بالألوان الفاقعة
والأحذية المصنوعة من جلد الثعبان اللي طالعة موضة قوي! ملابس «برشكا» المصري بـ
تميل قوي للطرقعة، خصوصاً في مجموعة الأحذية.

المحل دايماً بـ
يبقي فيه أجدد حاجة نازلة وأجدد الأفكار اللي في مجلات الموضة. من أول البنطلونات
اللى وسطها عالي High Waist ولغاية الأحذية الغريبة. وزي ما انتم أكيد مُتَخيلين، مش دايماً بـ
تبقى الحاجات المجنونة دي شكلها حلو.

البياعين عامةً بـ
يبقوا في حالهم، ومش بـ يفضلوا لازقين جنبك وانت بـ تتفرج، و دي حاجة دايماً بـ
تضايقنا في المحلات التانية. حتى في غرف القياس، اللي دايماً بـ يبقى فيه حد جنبك
عشان لو عايز لون أو مقاس تاني يجيبوه لك على طول، برضه مش بـ يبقوا موجودين.

 وانت داخل الپروڨا، بـ يدولك قطعة بلاستيك مكتوب
علها عدد الحاجات اللي أخدتها تقيسها، وانت خارج بقى بـ ترجعها تاني وتديهم
الحاجات اللي مش هـ تاخدها. ودي كمان حاجة حلوة قوي هناك، لأن في معظم
المحلات فيه ناس بـ تتكسف تفضل تقيس وما تشتريش حاجة في الآخر. إنما في «برشكا»، محدش
بـ يبقى مركز معاك أساساً حتى لو دخلت تقيس 20 مرة، فـ خد راحتك على الآخر
وماتقلقش!

أغلب الأوقات بـ
يبقى فيه هناك حاجات مرعبة قوي من كتر ما هي مش تقليدية، زي مثلاً الـچينز البهتان
ومرسوم ورد عليه كله. بس ماتتخضش ودَوَر كويس لأن بـ يبقى فيه حاجات تانية حلوة
قوي بس لازم تلقطها. ورغم أن الملابس هناك أغلبها شكلها غريب قوي، بس برضه بـ يبقى
عليها إقبال جامد جداً، وفيه ناس بـ تحب فعلاً تشتريها وتلبس الحاجات الغير
تقليدية دي.

ومن أحسن الحاجات في «برشكا»، أن مش كل الملابس اللي هناك على
نفس النمط ومش كلها غريبة قوي كده، يعني زي ما عنده كده، عنده برضه حاجات رقيقة، وحاجات
سهرات، ده غير الأساسيات Basics سواء تي
شيرتات، أو چواكيت أوچينزات.

بس في الآخر الحاجة المشتركة فى كل الحاجات اللي بـ يبيعها «برشكا»،
إن مفيش حاجة عنده مش ماشية مع الموضة.

نصيحة 360

«برشكا» يعتبر أحسن مكان عشان ملابس الصيف الملونة والخفيفة.

أحسن حاجة

وقت التخفيضات، ممكن تلاقي حاجات حلوة قوي وبأسعار مناسبة.

أسوأ حاجة

جودة الملابس في «برشكا» مش حلوة قوي. والملابس الخفيفة رغم إنها حلوة وما تحسش بيها، بس في أغلب الأوقات بـ تكش أو تتقطع بعد كام غسلة.

أكتب تقييم

أضف تعليقاً

يجب أنت تكون مسجل الدخول لتضيف تعليقاً.

مقترح