The Definitive Guide to Living in the Capital , Cairo , Egypt

تسوق
ديستينجو – Distingo

ديستينجو: آلات موسيقية وإكسسوارات مزيكا في المعادي

تم التقييم بواسطة
Hannah Cooper
قيم
قيم الآن
ديستينجو: آلات موسيقية وإكسسوارات مزيكا في المعادي

مش صعب أبداً إنك تلاقي محل آلات وأدوات موسيقية في القاهرة، عندك شارع محمد
علي وغيره من الشوارع المتخصصة تخدم الغرض ده بالذات. بس الشكل التقليدي للمحلات
هو الترابيزات المرصوص عليها العود الخشب والمندولين وشوية آلات بـ تستخدم في المزيكا
الشعبية زي المزمار والناي. وممكن تكون بـ تعرض كام جيتار على كام كمنجة، إنما لو
بـ تدور على حاجة محددة أو آلة مش لاقيها في أي حتة، إحنا لاقينالك المكان اللي هـ
يحللك مشكلتك.

بفرعين في المعادي والزمالك «ديستينجو» يعتبر المكان اللي بـ يروحله كتير
من المزيكاتية في القاهرة كل ما يحتاجوا حاجة. أول فرع فتح في شارع 9 الشهير في
المعادي سنة 2003 ومن ساعتها وهو له زبونه وشغال كويس جداً. المحل في الدور الثاني
في العمارة اللي بعد «كوستا كوفي».

رغم أن المحل صغير ومفيش مكان تتحرك فيه قوي، لكن لو عايز تقعد وتجرب آلة،
هـ تلاقي مكان كافي عشان تعمل كده. وممكن كمان توصَّل على الأمپليفاير الموجود
وتظبط الصوت وتقعد تلعب براحتك. ولو مالقتش الحاجة اللي بـ تدوَّر عليها ماتترددش
إنك تسأل الموظفين في المحل عشان ممكن تكون موجودة ومش معروضة. ده غير إنهم ظرفاء
وهـ يحبوا يساعدوك.

«ديستينجو» عنده ماركات من عينة «إل تي دي –LTD » و«آيبنز – Ibanez» و«جيبسون – Gibson» وطبعاً «فيندر – Fender» وده للجيتار والباص جيتار والأمپليفاير، وفيه مُحول
أصوات الجيتار Pedal Effects ماركات «Boss» أو«POD» أو «Korg»، وفيه جيتارات أكوستك وإليكتريك وكي بورد وسينثايزر
وآلات نفخ خشبية وهارمونيكا وحاجات تانية كتير.

هارمونيكا من مفتاح الـ “دو” بتـ تباع بـ 75 جنيه جوة علبة صغيرة
أنيقة، وفيه جيتار «ياماها – Yamaha» أكوستك/إليكتريك
بأوتار معدن موديل “FX 335” سعره 750 جنيه
بس بـ يتباع من غير كَيسة أو Cover.

 والمعروضات كلها مرصوصة بعناية وأي
حاجة خشب بـ تبقى بـ تلمع وفي أحسن حال.

إحنا كنا رايحين نشتري كًيسة جيتار غير مقوى «Soft Case» ولاقيناها بـ 80 جنيه وليها جيب شيك كدة من قدام.

ودي عينة من أسعار آلات عشان المهتمين: جيتار أكوستك «آيبنز كلاسيك 650» سعره
1150 جنيه، ونفس الموديل بس سيمي أكوستك «Semi – acoustic» يعني كلاسيك بس ممكن يتوصل بسلك عادي ويبقى زي
الإليكتريك ده سعره 1700 جنيه، الأورج والكيبورد بـ يبدأ من 2000 جنيه وفي موديلات
فيها Options قوية جداً وبرامج
توزيع ملحقة بيها بس دي طبعاً للمحترفين.

فيه كمان إكسسوارات الجيتار كلها بماركات مختلفة زي الأوتار الـ «Ernie
Ball Super Slinky»  والـ «Power Slinky» والوتر بـ يكون بـ 15 جنيه، وفيه ﭘيك للجيتار «Pick» وأوتوماتيك تيونرز Tuners للجيتار وكاﭘو Capo وحاجات تانية كتير ممكن تبقى عايزها ومش عارف تجيبها
منين.

مسؤولين البيع في «ديستينجو» فاهمين شغلهم قوي وهـ يعرفوا يساعدوك لآخر نفس
ولحد ما تاخد القرار الصح.

نصيحة 360

ممكن اللي انت مش لاقيه في فرع تلاقيه في الفرع الثاني للمحل، فـ إسأل لو الحاجة موجودة في فرع تاني.

أحسن حاجة

إنك تقدر تفاصل زي ما انت عايز، الأسعار مش نهائية.

أسوأ حاجة

آلات الإيقاع بـ تخلص بسرعة أو فيها ندرة عموماً.

أكتب تقييم

أضف تعليقاً

يجب أنت تكون مسجل الدخول لتضيف تعليقاً.

مقترح