The Definitive Guide to Living in the Capital , Cairo , Egypt

تسوق
فيجن مودرن لايتنج

فيجن مودرن لايتنج: إضاءات رخيصة ومطرقعة في المعادي

  • 7 ش النصر - المعادي
  • أثاث ومستلزمات منزل
تم التقييم بواسطة
Janan Omar
قيم
قيم الآن
فيجن مودرن لايتنج: إضاءات رخيصة ومطرقعة في المعادي

تجهيز وتصميم ديكورات بيتك في مصر ممكن يبقى تجربة صعبة
ومتعبة جدًا، محلات كثير بـ تقدم الموديلات الفرنسية الشيك والكلاسيكية العتيقة، ولكن
فيه اتجاه سائد لبعض المحلات اللي بـ تسعى أنها تعمل طفرة في الموديلات المودرن
وغير التقليدية لإكسسوارات البيت.

المشكلة أن لو الأسعار في «ديزاينوبوليس» و«سيتي ستارز»
معقولة في الحاجات الكلاسيكية، هـ تلاقي أسعار المعروضات المودرن خيالية وعالية
جدًا. ومع ذلك فيه بعض الاستثناءات في بعض الأماكن المستخبية في القاهرة؛ الفكرة
بس أنك تعرف إزاي توصل للأماكن دي. « فيجن مودرن لايتنج – Vision Modern Lighting» واحد من المحلات دي بـ يقدم إضاءات
حديثة وإكسسوارات بأسعار ممتازة.

المحل موجود في شارع النصر الحيوي في المعادي، المحل تصميمه
غريب بكل الأضواء النيون اللي بـ تزغلل العين والمدخل الخلفي بتاعه، وركن العربية أمامه
صعب جدًا. وما تتضايقش من الناس اللي هـ تطلع لك من تحت الأرض علشان تساعدك في
الركنة، كل دي تضحيات لازم تدفعها علشان في النهاية هـ تستفيد من العروض والأسعار
المذهلة في المحل، علشان توصل له لازم تطلع سلالم تعدي بها فوق الفوود كورت اللي
في المبنى، وتدخل أول يمين في الدور الأول.

المحل
دورين ومليان على آخره بكل معروضات الإضاءة اللي ممكن تخطر على بالك. من أول النجف
المدور الزجاجي العملاق (من 300 لـ 800 جنيه) لحد الأباجورات الصغيرة الفضية
وسبوتات الحمامات. المحل فيه كل حاجة وبأسعار منطقية، والخدمة ممتازة، والناقد
كاتب المقال كان معاه موظف بيع شاطر وفاهم جدًا وسهل مهمتنا في البحث كثير.

طبعًا
لازم نقول أن السعر على قدر الجودة، يعني مقابل الأسعار الزهيدة الجودة ممكن ما
تكونش أحسن حاجة ممكنة، ومعظم المعروضات مستوردة من الصين. المكان ده علشان تشتري
إضاءات مطرقعة ورخيصة بس مش معمرة، يعني ما نقدرش نقول أن هي دي حاجة العمر اللي
مش هـ تتغير.

معظم
التصميمات كانت فيها شوية مبالغة، كمية كريستالات وألوان كثير في مساحات
صغيرة، ومع ذلك لو دورت كفاية في المحل أكيد عينك هـ تقع على أباجورة أو نجفة اللي
لما تأخذها وتعلقها في بيتك أكيد شكلها هـ يتغير عن ما هي موجودة وسط مهرجان
المعروضات والألوان ده. وكاتب المقال وجد بالصدفة لمبات سقف من الأرابيسك ومليانة
تفاصيل دقيقة وشيك قوي بـ 120 جنيه الواحدة.

لسبب
ما المكان بـ يبيع لوحات زيت أصلية، إحنا ما انبهرناش قوي بها، بس الأكيد أن كل
حاجة ولها زبونها، فمافيش مانع تأخذ فكرة وتتفرج عليها بالمرة، وأن المحل له موقع
على الإنترنت متميز ومعتنى به جدًا وفيه كتالوج للمعروضات، ودي حاجة غير معتادة في
المحلات الصغيرة اللي مالهاش فروع ثانية.

نصيحة 360

زي ما قلنا الركنة مستحيلة أمام المحل، أركن بعدها بعمارة أو اثنين واتمشى شوية.  

أحسن حاجة

إضاءات مودرن ومجنونة بأسعار معقولة جدًا.

أسوأ حاجة

مشكلة الكم اللي غالب الكيف في كل حاجة في المحل.

أكتب تقييم

أضف تعليقاً

يجب أنت تكون مسجل الدخول لتضيف تعليقاً.

مقترح