The Definitive Guide to Living in the Capital , Cairo , Egypt

تسوق
كادر – Cadre

كادر: براويز ولوحات فنية مبتكرة في المعادي

تم التقييم بواسطة
Nagla Ashraf
قيم
قيم الآن
كادر: براويز ولوحات فنية مبتكرة في المعادي

كثير من الناس بـ يحبوا يزينوا البيت بتاعهم بلوحات فنية جميلة، وللأسف في الأغلب اللوحات دي بـ يبقى سعرها غالي جدًا، خاصة لو حاجة "سينييه" مشهورة،لكن في محل "كادر –Cadre " الموضوع مختلف تمامًا لأنك تقدر تلاقي الـ Tableau اللي أنت عاوزه بالسعر اللي أنت عاوزه.

الحقيقة أن دي مش أول مرة ندخل المحل ده، دائمًا كانت بـ تجذبنا اللوحات اللي جواه وكنا لازم نعدي عليه وإحنا بـ نلف في الجراند مول، أول ما بـ تدخل المحل بـ تلاقي براويز صغيرة سراميك ملونة، مكتوب عليها بخط عربي، منها اللي مكتوب عليه حكم زي " طيب الصبر وطبيب" "النبي تبسم"، وفيه منها المرسوم عليه بالألوان، زي لوحة لفلاح مصري أسمر لابس العمة وحوله بط ووز بألوان مختلفة بـ 89 جنيه، وفيه براويز صغيرة جدًا رخام قد كف الأيد مجرد رسمة ملونة فقط كأنها قطعة من لوحة كبيرة أو رسمة وردة مفرغة بـ 45 جنيه. كمان كان فيه صور فوتوغرافية لمشاهير وبراويز فاضية لو حد حابب يشتريها ويحط فيها الصور اللي يحبها وبـ تختلف أسعارها على حسب الحجم اللي أنت عاوزه.

أما القسم المفضل بالنسبة لنا كان القسم اللي فيه براويز عليها صور شخصيات ديزني، لأنه بـ يبقى مناسب جدًا في غرف الأطفال، ومش هـ يبوظ شكل الغرفة أو الحائط بل بالعكس هـ يزيد من جمالها. وسعرالبرواز بـ يبدأ من 49 جنيه لحد 99 جنيه.

كمان عجبنا قوي تابلوه خشب مستطيل، جواه ثلاثة تابلوهات مربعة مرسومة بالأيد وعليها رسومات جذابة زي مجموعة ورود وأشكال أخرى، لتزيين الحائط بالمنزل بـ 150 جنيه، والحقيقة أنه شكله كان لطيف جدًا وسعره مناسب، والمميز في كادر أنه عنده تابلوهات كثير، منها المرسوم الكبير فن تجريدي بـ يبدأ من 600 لـ 1800.

لكن اللي لفتانتباهنا بجد كانت لوحة مرسومة لرجال بـ يزمروا بالمزامير ألوانها كانت تحفة وكانت بـ 3900 جنيه، ولوحة فيها مآذن جوامع كانت أكبر ومليانة ألوان مبهجة أصفر وأخضر وموف وكانت بـ 6900 جنيه.

الحقيقة أننا بـ ننصحكم تزوروا "كادر" لو لسه بـ تكونوا أثاث بيتكم أو عاوزين تحطوا لوحة جميلة فيه.

نصيحة 360

المحل له فروع ثانية في المهندسين وسيتي ستارز.

أحسن حاجة

الأسعار والذوق الراقي.

أسوأ حاجة

المكان مش معروف للي خارج المعادي.

أكتب تقييم

أضف تعليقاً

يجب أنت تكون مسجل الدخول لتضيف تعليقاً.

مقترح